सुनबाई विरोधात सासरे मैदानात; जडेजाच्या वडीलांकडूनच कॉंग्रेसला मतदान करण्याचे आवाहन

अहमदाबाद : गुजरात विधानसभा निवडणुकीच्या पहिल्या टप्प्यातील प्रचार मंगळवारी (२९ नोव्हेंबर) संपला. पहिल्या टप्प्यात अनेक हाय प्रोफाईल उमेदवार निवडणूक लढवत आहेत, त्यापैकी एक म्हणजे क्रिकेटर रवींद्र जडेजाची पत्नी रिवाबा जडेजा. रिबावा यांच्या जामनगर मतदार संघाकडे सर्वांचे लक्ष लागले आहे. गुजरात निवडणूकीत जडेजा कुटूंबातही मोठी फुट पडल्याचे दिसत आहे. एकीकडे रिबावा भाजपच्या तिकीटावर लढत असताना दुसरीकडे त्यांची नणंद नैना जडेजा या कॉंग्रेसच्या (Congress) स्टार प्रचारक म्हणून निवडणूकीच्या रिंगणात उभ्या आहेत.

यात आता आणखी एक ट्विस्ट निर्माण झाला आहे. नणंद भावजय यांच्यातील सामना रंगला असतानात आता या सामन्यात रवींद्र जडेया यांचे वडील अनिरुद्ध जडेजा यांनीही उडी घेतली आहे. रवींद्र जडेजा यांचे वडिल अनिरुद्ध सिंह जडेजा यांचा एक व्हिडीओ सध्या सोशल मिडीयावर चांगलाच व्हायरल होत आहे.

या व्हिडीओत ते आपली सुनबाई रिबावा जडेजा यांना मतदान करण्याऐवजी कॉंग्रेस उमेदवाराला मतदान करण्याचे आवाहन करताना दिसत आहे. त्यामुळे सर्वांच्याच भुवया उंचावल्या आहेत. 'मी अनिरुद्ध सिंह जडेजा काँग्रेस उमेदवार बिपेंद्र सिंह जडेजा यांना मतदान करण्याचे आवाहन करत आहे. तो माझ्या धाकट्या भावासारखा आहे. मी विशेषतः राजपूत मतदारांना भुपेंद्र सिंह यांना मतदान करावं,' असं आवाहन त्यांनी या व्हिडीओतून केले आहे.

दरम्यान, रवींद्र जडेजा यांची बहीण नैना जडेजा निवडणूक लढविण्यास इच्छुक होत्या आणि त्या काँग्रेस पॅनलच्या यादीत होत्या. पण भाजपने रिवाबा जडेजाच्या नावाची घोषणा केल्यावर काँग्रेसने नैना यांना डावलून बिपेंद्र सिंह यांना उमेदवारी दिली. त्यानंतर नैना यादेखील आक्रमकपणे काँग्रेस उमेदवाराचा प्रचार करताना दिसत आहेत. गुजरातमध्ये १ आणि ५ डिसेंबरला दोन टप्प्यात निवडणुका आहेत. गुजरातमध्ये निवडणुकीपूर्वी राजकीय गोंधळ सुरूच आहे. गुजरात विधानसभा निवडणुकीचे निकाल 8 डिसेंबरला जाहीर होणार आहेत.