Rajsthan Politics: काँग्रेसचे ग्रहण सुटेना; आता सचिन पायलटही वेगळ्या वाटेवर?

Congress News काँग्रेस (Congress) नेते आणि राजस्थानचे माजी उपमुख्यमंत्री सचिन पायलट यांनी मंगळवारी (11 एप्रिल) आपल्याच सरकारकडून झालेल्या भ्रष्टाचाराविरोधात कारवाई करण्याची मागणी करत एक दिवसीय उपोषण केले. पण आता त्यांच्या या आंदोलनामुळे वेगळ्याच चर्चा सुरु झाल्या आहेत. सचिन पायलट दुसऱ्या मार्गावर आहेत की काय अशा चर्चा राजकीय वर्तुळात सुरु झाल्या आहेत. (National Political news)

काँग्रेसच्या राज्य युनिटने त्यांचे हे आंदोलन पक्षाच्या हिताच्या विरोधात असल्याचे आधीच सांगितले होते. पण तरीही त्यांनी हे उपोषण केल्याचे सांगितले जात आहे. एवढचं नाही तर पायलट यांनी अशोक गेहलोत यांच्याशी अंतर्गत वाद सोडवावेत, असा कडक संदेशही हायकमांडने पायलट (Sachin Pilot) यांना दिला होता.पण तरीही पायलट उपोषणावर ठाम राहिले.

सचिन पायलट (Sachin जयपूरच्या शहीद स्थळाच्या ठिकाणी उपोषण करत होते. पण तिथे पक्षाचे नाव किंवा चिन्ह किंवा पोस्टर्स यापैकी काहीही दिसत नव्हते. त्यामुळे सचिन पायलट आता वेगळ्या विचारात आहेत की काय अशा चर्चा सुरु झाल्या आहेत.

सचिन पायलट यांच्या उपोषणाच्या स्टेजच्या मागे एक मोठा बॅनर होता. ज्यावर फक्त महात्मा गांधी आणि महात्मा फुले यांचा फोटो होता. पण सत्ताधारी काँग्रेस पक्षाचा एकही आमदार आंदोलनस्थळी पोहोचला नाही. मात्र, त्यांचे समर्थक व इतर नेते मोठ्या संख्येने पोहोचले. यामध्ये माजी आमदार संतोष सहारन आणि रामनारायण गुर्जर यांचा समावेश होता.

विशेष म्हणजे दिवसभराच्या या उपोषणादरम्यान पायलट यांचा एकही समर्थकाकडेही काँग्रेसचा झेंडा किंवा चिन्ह दिसले नाही. पायलटच्या या भूमिकेमुळेते काँग्रेसला सोडचिठ्ठी देऊन नव्या वाटेवर जाणार की काय अशी अटकळ जोर धरू लागली आहे. तसेच पायलटने काँग्रेस सोडल्यास त्यांचे पुढचे पाऊल काय असेल? अशाही चर्चा सुरु आहेत.

याशिवाय या वर्षाच्या अखेरीस होणाऱ्या विधानसभा निवडणुकीपूर्वी राजस्थानमधील नेतृत्वाचा प्रश्न सोडवण्यासाठी पक्षावर दबाव आणण्याचा शेवटचा प्रयत्न म्हणून सचिन पायलट यांच्या उपोषणाकडे पाहिले जात आहे. सचिन पायलट यांनी याआधीही असा प्रयत्न केला होता. मात्र त्यांना अशोक गेहलोत यांच्यासमोर त्यांना पराभवाचा सामना करावा लागला.