कुणामुळे भाजप खासदारांच्या मुलाबाळांना तिकीटे मिळाली नाहीत; खुद्द मोदींनीच सांगितले..

नवी दिल्ली : आज झालेल्या भाजपच्या (BJP) संसदीय बैठकीत पंतप्रधान नरेंद्र मोदी (Narendra Modi) यांनी घराणेशाही असलेले पक्षांवर जोरदार टीका केली. घराणेशाही असलेले पक्ष देशालाच पोखरून टाकत असल्याची टीका घराणेशाहीची पकड असणाऱ्या राजकीय पक्षांवर केली. ही टीका करत असतांना भाजपच्याही ज्या खासदारांच्या मुलाबाळांना तिकीटे मिळाली नाहीत ती माझ्यामुळेच मिळाली नाही हे देखील मोदींनी यावेळी स्पष्ट केले.

उत्तर प्रदेशासह चारही राज्यांत भाजपने सत्ता राखल्यावर आज झालेली ही पहिलीच भाजप संसदीय बैठक होती. या बैठकीला पक्षाचे बहुतांश खासदार उपस्थित होते. या ऐतिहासिक यशाचे शिल्पकार म्हणून पंतप्रधान मोदी यांचा यावेळी भव्य पुष्पहार घालून सत्कार करण्यात आला. गृहमंत्री अमित शहा, भाजपाध्यक्ष जे पी नड्डा, राजनाथसिंह, रस्ते व महामार्गमंत्री नितीन गडकरी, संसदीय कामकाजमंत्री प्रल्हाद जोशी, अल्पसंख्यांक मंत्री मुख्तार अब्बास नक्वी, अर्थमंत्री निर्मला सीतारामन आदी सारे मंत्री बैठकीला हजर होते. आंबेडकर आंतरराष्ट्रीय केंद्रात ही बैठक झाली. यावेळी पंतप्रधान मोदी यांनी घराणेशाहीवर जोरदार टीका केली आणि भाजपमधील नेत्यांच्या मुलांना कुणामुळे तिकीटे मिळाले नाही हे स्पष्ट करत भाजपमधील नेत्यांना एकप्रकारे इशाराही दीला आहे.

राजकीय जाणकारांच्या मते उत्तर प्रदेशात रीता बहुगुणा जोशी यांनी आपली खासदारकी पणाला लावून व स्वामीप्रसाद मोर्य यांनी भाजपलाच सोडचिठ्ठी दिली तरी त्यांच्या व अनेक भाजप खासदारांच्या मुलामुलींना भाजपने अखेरपर्यंत तिकीट दिले नाही. राजकीय निरीक्षकांच्या मते घराणेशाहीचा टोकाचा तिटकारा करण्याची भाजप नेतृत्वाची भूमिका स्पष्ट आहे. पण दुसरीकडे संरक्षणमंत्री राजनाथसिंह यांचे पुत्र पंकज उत्तर प्रदेशात मंत्री बनण्याच्या वाटेवर आहेत. हिमाचलातील भाजप नेते प्रेमकुमार धूमल यांचे पुत्र अनुराग ठाकूर केंद्रीय मंत्री आहेत. दिवंगत प्रमोद महाजन, गोपीनाथ मुंडे, बी एस येदियुरप्पा, यशवंत सिन्हा आदी कित्येक आजी-माजी भाजप नेत्यांची पुढची पिढी भाजपमध्येच सक्रिय आहे हेही वास्तव आहे. या पार्श्वभूमीवर पंतप्रधानांनी घराणेशाहीवर आज पुन्हा जे टीकास्त्र सोडले त्याकडे पाहिले जाते.

२०२४ च्या लोकसभा निवडणुकीत आपल्याला या घराणेबाज पक्षांच्या कारवायांना काश्मीरपासून कन्याकुमारीपर्यंत उघडे पाडायचे आहे. घराणेशाहीमुळेच जातीयवाद वाढतो. हे पक्ष देशालाच पोखरतात, असे मोदींनी आपले मत मांडले आहे.

दरम्यान, युध्दग्रस्त युक्रेनमधून बहुतांश भारतीय विद्यार्थ्यांना सुखरूप परत आणण्याचे ऑपरेशन गंगा यशस्वीपणे राबविल्याबाबतच्या प्रतिक्रियांवर बोलताना मोदींनी जामनगरच्या राजाने दुसऱ्या माहयुध्दात पोलंडच्या लोकांना आश्रय दिला होता, त्याचे उदाहरण दिले. त्याच पोलंडच्या मार्गाने व त्या देशाच्या सहकार्याने युक्रेनमधून आमची मुले सुखरूप आली हा जामनगरच्या राजाने तेव्हा केलेल्या मदतीची परत-पावती होती, असेही निरीक्षण मोदींनी मांडले. तसेच, नुकत्याच प्रदर्शित झालेल्या बहुचर्चित 'द कश्मीर फाइल्स' चित्रपटाची मोदींनी मुक्तकंठाने प्रशंसा केली. असे चित्रपट वारंवार तयार व्हायला हवेत असेही त्यांनी नमूद केले.