Ajit Pawar : अजित पवार यांच्या बालेकिल्ल्यात भाजपची अधिकृत एन्ट्री; दादांची अध्यक्षपदी तर मुरलीधर मोहोळांची उपाध्यक्षपदी निवड

Ajit Pawar vs Murlidhar Mohol : शेवटच्‍या क्षणापर्यंत रंगतदार ठरलेल्‍या महाराष्ट्र ऑलिंपिक संघटनेच्‍या निवडणुकीत उपमुख्यमंत्री अजित पवार यांनी बिनविरोध बाजी मारली. एकमताने निवड झाल्यानंतर ते चौथ्यांदा अध्यक्षपदी विराजमान झाले आहेत. तर केंद्रीय राज्यमंत्री मुरलीधर मोहोळ यांची वरिष्ठ उपाध्यक्ष म्हणून निवड करण्यात आली आहे.

मुंबईत रविवारी सायंकाळी महाराष्ट्र ऑलिंपिक संघटनेची विशेष बैठक पार पडली. यात उपमुख्यमंत्री अजित पवार यांनी बिनविरोध निवड करण्यात आली. त्यानंतर कार्यकारिणी निवडीचे सर्व अधिकार अजित पवार यांच्‍याकडे सोपवण्यात आले. यानंतर कार्यकारिणीतील इतर सदस्यांची निवड झाली असून, काही नावांवर चर्चा सुरू आहे.

सचिवपदावर एकमत न झाल्‍याने कार्यकारिणी जाहीर न करण्याचा निर्णय झाला. मुख्यमंत्री देवेंद्र फडणवीस यांच्याशी चर्चा करून नव्या कार्यकारिणीतील उर्वरित सदस्यांच्या नावांची घोषणा उद्या (ता. ३) करण्यात येणार आहे. मुख्यमंत्री देवेंद्र फडणवीस बिहारमध्ये असून, त्यांच्याशी चर्चा करून अंतिम कार्यकारिणी जाहीर करण्यात येणार असल्याची माहिती आहे.

या संघटनेच्या अध्यक्षपदासाठी आधी मुरलीधर मोहोळ यांनीही अर्ज दाखल केला होता. पण खेळात राजकारण नको, असा विचार करून वरिष्ठ नेत्यांनी चर्चेनंतर निवडणूक बिनविरोध करण्याचा निर्णय घेतला. त्याचवेळी मुरलीधर मोहोळ यांची वरिष्ठ उपाध्यक्ष म्हणून संधी देण्यावरही एकमत झाले.

या निवडीनंतर मुरलीधर मोहोळ यांच्या रुपाने अजित पवार यांचे वर्चस्व असलेल्या महाराष्ट्र ऑलिंपिंक संघटनेत पहिल्यांदाच भाजपची धडाक्यात एन्ट्री झाली आहे. या विशेष बैठकीला उपमुख्यमंत्री अजित पवार, केंद्रीय राज्यमंत्री मुरलीधर मोहोळ, क्रीडामंत्री माणिकराव कोकाटे, निवडणूक निर्णय अधिकारी निवृत्त जिल्‍हा न्‍यायाधीश एस. एन. सरदेसाई उपस्‍थित होते.