महापालिकेच्या निवडणुकीत सभागृहामध्ये १०१ नगरसेवक नव्याने निवडून आलेले आहेत. त्यांना महापालिकेच्या काराभाराची व्यवस्थित माहिती मिळावी, कायदे कळावेत. अधिकार आणि कर्तव्य याचीही माहिती व्हावी यासाठी प्रशासनातर्फे नगरसेवकांसाठी यशदामध्ये प्रशिक्षण आयोजित केले जाणार आहे.
कुर्ल्याच्या न्यू मिल रोड इथं आकाश सिंग, आदित्य पानसे, असीम सिंग यांच्यावर फेरीवाल्यांनी मिळून प्राणघातक हल्ला केला. या हल्ल्यात आकाश सिंग यांच्या डोक्यावर थेट पेव्हर ब्लॉकने वार करण्यात आला असून धारदार शस्त्रांनीही हल्ला झाला आहे. डोक्याला गंभीर दुखापत झाल्याने त्यांची प्रकृती चिंताजनक आहे. आदित्य पानसे व असीम सिंग यांनाही गंभीर मारहाण करण्यात आली आहे. घटनेनंतर संतप्त सकल हिंदू समाजाने कुर्ला पोलीस ठाण्याबाहेर सुमारे दोन ते तीन तास ठिय्या आंदोलन केले. दोषींवर तात्काळ कठोर कारवाई करावी अशी मागणी करण्यात येत आहे. धंद्यासमोर गाडी लावण्याच्या कारणावरून ही मारहाण झाली असल्याचे समोर येत आहे.
राज्यातील अराजपत्रित गट-ब आणि गट-क संवर्गातील सर्व पदे ‘महाराष्ट्र लोकसेवा आयोगा’मार्फत (एमपीएससी) भरण्याचा निर्णय घेऊनही, प्रत्यक्षात मात्र सरकारला आपल्याच निर्णयाचा विसर पडल्याचे चित्र आहे. राज्य सरकारतर्फे एका वर्षापूर्वी गट-ब (अराजपत्रित) आणि गट-क संवर्गातील पदे आयोगाच्या कक्षेत आणण्याचा निर्णय जाहीर करण्यात आला होता. मात्र प्रत्यक्षात आजही सरळसेवा भरती खासगी कंपन्यांद्वारे घेण्यात येत आहेत. त्यामुळे विद्यार्थ्यांनी तीव्र नाराजी व्यक्त केली आहे.
शिवसेना ठाकरे गटाकडून निवडून आलेल्या सर्व नगरसेवकांना जिल्हाप्रमुख शरद पाटील यांनी सूचना पत्र दिले आहे. गट स्थापनेसंदर्भात उद्या होणाऱ्या बैठकीस उपस्थित राहण्याचे आदेश या पत्रात देण्यात आले आहेत. बैठकीस अनुपस्थित राहिल्यास पक्षविरोधी कृती मानून कारवाई केली जाईल, असा इशारा देण्यात आला आहे. मधूर म्हात्रे व किर्ती ढोणे घरी नसल्याने त्यांच्या कुटुंबीयांकडे पत्र देण्यात आले.
जिल्हा परिषद निवडणुकीसाठी दोन्ही राष्ट्रवादी काँग्रेसच्या युतीवर जवळपास शिक्कामोर्तब झाला असला तरी पुण्यातील माजी मंत्री दिलीप वळसेंच्या आंबेगाव तालुक्यात चित्र वेगळे दिसत आहे. शरद पवार गटाचे जिल्हाध्यक्ष देवदत्त निकम स्वतंत्र लढण्यावर ठाम आहेत. अजित पवारांनी सुद्धा देवदत्त निकमांशी रोहित पवारांसमोर एकत्र लढण्याबाबत चर्चा केली तरीही निकम आपल्या भूमिकेवर ठाम राहिले. विधानसभा निवडणुकीतील दिलीप वळसेंसोबतच्या संघर्षामुळे आंबेगावात मैत्रीपूर्ण लढतीची शक्यता वर्तवली जात आहे.
राज्यात नगरपालिका आणि महानगरपालिकांच्या निवडणुकीनंतर आता जिल्हा परिषद व पंचायत समितीच्या निवडणुकांची जोरदार तयारी सुरू झाली आहे. अर्ज दाखल करण्याच्या दुसऱ्या दिवशी रायगड जिल्ह्यात शिंदे सेनेकडून अलिबागमध्ये दिलीप भोईर यांचा एकच अर्ज दाखल झाला आहे. तर तटकरे शिंदे गटाच्या नेत्यांकडून एकमेकांवर आरोप-प्रत्यारोप केले जात आहेत.
सोलापूर जिल्हा परिषद व पंचायत समिती निवडणुकीत राष्ट्रवादी शरद पवार गट आणि राष्ट्रवादी अजित पवार गट एकत्र लढणार असल्याची माहिती राष्ट्रवादी अजित पवार पक्षाचे जिल्हाध्यक्ष उमेश पाटील यांनी दिली. चार आमदारांच्या मतदारसंघात तुतारी किंवा घड्याळ या चिन्हावर निवडणूक होईल. दोन्ही राष्ट्रवादी आमने-सामने नसून जागावाटप करून लढणार आहेत. भाजपाविरोधात काही ठिकाणी सर्वपक्षीय आघाडी होण्याची शक्यता असून बहुमताचा आकडा गाठू, असा विश्वास उमेश पाटील यांनी व्यक्त केला.
सांगली जिल्हा परिषद निवडणुकीसाठी आता रणधूमाळी सुरू झाली आहे. भाजपकडून निवडणूक लढवण्यासाठी जोरदार तयारी सुरू करण्यात आली असून इच्छुक उमेदवारांच्या मुलाखती घेण्यात आल्या आहेत. सांगलीमध्ये जिल्हा परिषदेच्या 61 गट आणि पंचायत समितीच्या 122 गणासाठी 876 जणांनी मुलाखती पार पडल्या. भाजप आमदार गोपीचंद पडळकर, जिल्हाध्यक्ष सम्राट महाडिक आणि माजी आमदार पृथ्वीराज देशमुख यांच्या अध्यक्षतेखाली या मुलाखती झाल्या. तर आगामी जिल्हा परिषदेच्या आणि पंचायत समितीच्या निवडणुका स्वबळावर लढवण्याची तयारी भाजप करत आहे.
पुण्याच्या जुन्नर मध्ये परिस्थिती च्या शहाणपणातून राष्ट्रवादीचे दोन्ही गटाच्या नेत्यांनी एकत्र येऊन घड्याळ चिन्हावर निवडणुक लढविणार असल्याचे जाहिर केलं मात्र ही निवडणूक लढत असताना ठाकरेंच्या मशालीची साथ सोबत घेतलीय. त्यामुळे पवारांचे दोन शिलेदार ठाकरेंना सोबत घेऊन शिंदेच्या शिवसेनाचा सामना करणार आहेत. त्यामुळे जुन्नर तालुक्यातील जिल्हा परिषद आणि पंचायत समितीच्या निवडणुका रंगदार होणार आहे.
देशभरात प्रसिद्ध असलेल्या खामगाव येथील चांदीच्या बाजारपेठेत आज चांदीचा भाव उच्चांक स्तरावर पोहोचला आहे. खामगाव येथील चांदीच्या बाजारपेठेत चांदीचे आजचे भाव तीन लाख चार हजार रुपये प्रति किलो झाले असून अमेरिकेने लादलेले निर्बंध, टेरिफ, इराण आणि वेनिंजुएलामधील अस्थिरता, व्याजदरात झालेली कमतरता यामुळे चांदी आणि सोन्याचे भाव वाढल्याचे व्यापाऱ्यांचं म्हणणं आहे.
कुर्ल्याच्या न्यू मिल रोड परिसरात भाजप कार्यकर्त्यांवर फेरीवाल्यांनी प्राणघातक हल्ला केला आहे. या हल्ल्यात भाजप कार्यकर्ते जखमी झालेत. त्यांच्यावर रुग्णालयात उपचार सुरु आहे. क्षुल्लक वादातून हल्ला केल्याची माहिती आहे. हल्लेखोर फेरीवाल्यांवर कारवाई करण्याच्या मागणीसाठी कुर्ला पोलीस ठाण्याबाहेर भाजप कार्यकर्त्यांनी ठिय्या आंदोलन केलं.
मुंबईतील भांडुपमधून मनसेतून बंडखोरी करत अपक्ष निवडणूक लढलेल्या मनसेच्या माजी नगरसेविका अनिषा माजगावकर यांनी मनसे नेते संदीप देशपांडेंची भेट घेतली. अनिषा माजगावकर इच्छुक असलेली जागा युतीमध्ये ठाकरेसेनेला गेली होती. त्यामुळे अनिषा माजगावकर यांनी बंडखोरी करत अपक्ष निवडणूक लढवली. आज संदीप देशपांडे यांची भेट घेत अनिषा माजगावकर यांनी सविस्तर चर्चा केली.
हिंगोलीत 'लाडकी बहीण' योजनेचा हप्ता बंद झाल्याने महिला आक्रमक झाल्या आहेत. 'निवडणुकीनंतर सरकारची बहीण दोडकी झाली का?' असा सवाल विचारत पाचही तालुक्यातील शेकडो महिलांनी जिल्हाधिकारी कार्यालयावर धडक दिली. हप्ता सुरू होईपर्यंत न उठण्याचा पवित्रा महिलांनी घेतला असून, निवासी उपजिल्हाधिकाऱ्यांची समजूत काढण्याचा प्रय़त्न सुरू आहे.
महापालिका निवडणुका पार पडल्यानंतर आता महापौर पदाच्या आरक्षणाची सोडत २२ जानेवारीला निघणार आहे. नगरविकास खात्याच्या राज्यमंत्र्यांच्या अध्यक्षतेखाली मुंबईत आरक्षण सोडत काढली जाईल.
मुंबई महापालिका निवडणुकीत भाजपचे ८९ नगरसेवक निवडून आले आहेत. महापालिकेत भाजपचाच महापौर बसणार, हे स्पष्ट आहे. पण त्यासाठी अद्याप आठवडाभराचा कालावधी लागू शकतो. त्यामुळे पुढील आठ दिवस मुंबईतून बाहेर जाऊ नका, अशा सूचना पक्षाच्या नेत्यांनी नगरसेवकांना दिल्याचे समजते.
कल्याण डोंबिवली महानगरपालिकेच्या निवडणुकीत निवडून आलेले उद्धव ठाकरेंच्या शिवसेनेचे सर्व नगरसेवक माजी खासदार विनायक राऊत यांच्या संपर्कात असल्याची माहिती आहे. त्यांनी सर्व नगरसेवकांची भेट घेतल्याचेही समजते. नगरसेवक नॉटरिचेबल असल्याची जोरदार चर्चा कल्याण डोंबिवलीमध्ये आहे.
कल्याण डोंबिवली महापालिकेवर महायुतीचे स्पष्ट बहुमत असले, तरी एकनाथ शिंदे शिवसेना अन् भाजपकडून स्वबळावर महापौर बसवण्याचे प्रयत्न सुरू असल्याचे माहिती सूत्रांनी दिली. या पार्श्वभूमीवर एकनाथ शिंदे शिवसेनेकडून शिवसेना उद्धव बाळासाहेब ठाकरे सेना पक्षासह मनसेच्या नगरसेवकांना गळ घालण्याचे प्रयत्न सुरू आहेत. या पार्श्वभूमीवर शिवसेना ठाकरे सेनेने बचावत्मक पवित्रा घेतला असून, नवनिर्वाचित नगरसेवकांना अज्ञात स्थळी हलवलं आहे.
जळगावच्या नशिराबाद इथं नगरपालिका निवडणुकीतील कामावरून दोन गटात तुफान हाणामारी होऊन, दगडफेकीची घटना झाली. दोन्ही गटांकडून दगड, विटांचा तसेच लाठ्याकाठ्या, पाइप, कुऱ्हाडीचा वापर झाल्याने, यात तब्बल 16 जण जखमी झाले. जखमींना उपचारासाठी शासकीय वैद्यकीय महाविद्यालय व रुग्णालयात दाखल करण्यात आले आहे. याप्रकरणी रात्री उशिरापर्यंत नशिराबाद पोलिस ठाण्यात दोन्ही गटाच्या परस्पर तक्रारीवरून 30 ते 35 जणांविरुद्ध दोन गुन्हे दाखल झाले आहे.
छत्रपती संभाजीनगरसह राज्यात 'AIMIM'ला मिळाल्या यशाबद्दल, प्रदेशाध्यक्ष इम्तियाज जलील यांच्यावर त्यांच्या समर्थकांनी पैशाची उधळण केली आहे. या घटनेचा व्हिडिओ समाज माध्यमांवर व्हायरल झाला आहे. यानंतर टीकेची झोड उठवण्यात आली आहे.
'मुंबईसाठी कुणाला महापौर करायचं हे भाजप आणि गौतम अदानी ठरवतील. ज्या प्रकारचे आकडे मुंबईकरांनी दिले आहेत. त्यानुसार भाजप कितीही विजय करत असला, तरीही त्यांचा विजय झाला नाही,' असंही संजय राऊतां यांनी म्हटले आहे. मुख्यमंत्री देवेंद्र फडणवीस आणि उद्धव ठाकरेंची मुंबईच्या महापौरपदासाठी चर्चा झाल्याची, या सगळ्या वृत्तपत्रातील बातम्या असून, त्या सूत्रांवर आम्ही विश्वास ठेवत नाही, असेही संजय राऊत यांनी म्हटलं आहे.
नाशिकच्या मालेगाव महापालिकेत सर्वात मोठा पक्ष म्हणून समोर आलेल्या इस्लाम पार्टी-समाजवादी पार्टीच्या युतीला महापौर पदासाठी केवळ 3 सदस्यांची गरज आहे. मात्र मालेगाव शहर विकासासाठी सर्वांनी एकत्र यावे, अशी इस्लाम पार्टीच्या असिफ शेख यांनी आवाहन केले आहे. 'AIMIM'चे आमदार मौलाना मुफ्ती इस्माईल यांनी युतीच्या चर्चेसाठी आम्ही तयार असून इस्लाम पार्टीकडून तसा प्रस्ताव आल्यास नक्की शहराच्या विकासाबद्दल मदत करू, अशी भूमिका घेतल्याने ट्विस्ट निर्माण झाला आहे.
अक्कलकुवा शहरात चोरांनी एकाच रात्री धुमाकूळ घालत, पाच ठिकाणी घरफोडी केल्याची धक्कादायक घटना घडली आहे. विशेष म्हणजे, अक्कलकुवा पोलिस ठाण्यापासून हाकेच्या अंतरावर असलेल्या पोलिस वसाहतीतील एका कर्मचाऱ्याचे घरही चोरांनी लक्ष्य केल्याने परिसरात मोठी खळबळ उडाली आहे.
अहिल्यानगर जिल्ह्यातील संगमनेर तालुक्यात वाळू माफियांचा हैदोस घातला आहे. सोशल मीडियावर 'रील' व्हायरल करत प्रशासनाला थेट आव्हान दिलं आहे. संगमनेरच्या पिंपरणे परिसरातील वाळू माफियाचे थेट महसूल प्रशासनाला आव्हान दिल्याने, प्रशासनाच्या कारभाराविषयी चर्चांना तोंड फुटलं आहे. वाळू वाहतूक करतानाचा 'रील' व्हायरल झाल्याने प्रशासन नेमकं करतंय काय, असा प्रश्न नागरिक करत आहेत.
सांगली महापालिका निवडणुकीमध्ये पती-पत्नी सलग तिसऱ्यांदा निवडून आले आहेत. काँग्रेसकडून मेंढे दांपत्याने ही विजयाची हॅट्रिक केली आहे. मिरजेच्या प्रभाग क्रमांक पाच मधून संजय मेंढे व त्यांची पत्नी बबीता मेंढे हे दोघेही सलग तिसऱ्यांदा निवडून आले आहेत. सांगली महापालिकेत निवडून जाणारे मेंढे दाम्पत्य एकमेव ठरले आहे. सांगली महापालिका निवडणुकीमध्ये यंदा सहा दाम्पत्य निवडणुकीच्या रिंगणात उतरले होते.
एमआयएम पक्षाचे महापालिका निवडणुकीत तब्बल 125 नगरसेवक निवडून आले. आता सोलापूर जिल्ह्यातील जिल्हा परिषद आणि पंचायत समितीच्या 25 जागा एमआयएम स्वबळावर लढविणार आहे. सोलापूर महानगरपालिकेत त्यांचे 8 नगरसेवक विजयी झाले होते.
हापौरपदासाठी भाजप आणि शिंदेंच्या शिवसेनेत सुरू असलेल्या रस्सीखेचमध्ये शिंदेंनी ठाकरेंना मोठा दणका दिला आहे. शिंदेंनी कल्याण-डोंबिवलीमध्ये उद्धव ठाकरेंचे तीन नगरसेवक फोडल्याचे वृत्त एका मराठी वृत्तवाहिनीने दिले आहे.
कल्याणमध्ये डोंबिवलीमध्ये महापौरपदासाठी शिंंदे शिवसेना आणि भाजपमध्ये चढाओढ लागली आहे. या घडामोडींमध्ये ठाकरेसेनेचे ११ नगरसेवक अज्ञातस्थळी रवाना झालेत. शिंदेसेनेला महापौरपदासाठी ९ नगरसेवकांची गरज असल्याने ठाकरेसेनेच्या नगरसेवकांना फोडण्याचे प्रयत्न सुरू असल्याची चर्चा आहे. अशात ठाकरेसेनेने ११ नगरसेवकांना सुरक्षित स्थळी हलवलंय...
गेले अनेक वर्षे रखडलेला श्री मलंगगड फ्युनिक्युलर प्रकल्प अखेर मार्गी लागला असून, ही सेवा आता अधिकृतपणे भाविकांच्या सेवेत दाखल झाली आहे. देशातील सर्वात लांब पल्ल्याची फ्युनिक्युलर सेवा म्हणून ओळखल्या जाणाऱ्या या प्रकल्पाचे रविवारी भाजपा आमदार किसन कथोरे आणि सुलभा गायकवाड यांच्या हस्ते लोकार्पण करण्यात आले.
शिंदे यांना नगरसेवक फूटण्याची भीती असल्याचे राऊत म्हणाले होते. त्याला शिंदेंनी प्रत्युत्तर देताना म्हणाले की, ठाकरेंनाच त्यांचे नगरसेवक फूटण्याची भीती आहे. त्यांनी त्यांचे नगरसेवक संभाळावेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.