भाजप जिल्हाध्यक्षपदाचा राजीनामा दिलेल्या तेलींना फडणवीसांनी दिला 'हा' कानमंत्र

सिंधुदुर्गनगरी : सिंधुदुर्ग जिल्हा सहकारी बॅंकेच्या निवडणुकीत (Sindhudurg District Bank Election) पराभूत झाल्यानंतर भारतीय जनता पक्षाचे जिल्हाध्यक्ष राजन तेली (Rajan Teli) यांनी आपल्या पदाचा राजीनामा दिला होता. बॅंकेच्या निवडणुकीत केंद्रीय मंत्री नारायण राणे (Narayan Rane) यांच्या नेतृत्वाखालील भाजपप्रणीत पॅनेलने वर्चस्व मिळविले. पण, जिल्हाध्यक्ष राजन तेली यांचा मात्र या निवडणुकीत पराभव झाला, त्यामुळे भाजपची अवस्था गड आला पण सिंह गेला, अशी झाली. त्या पराभवानंतर राजन तेली यांनी विरोधी पक्षनेते देवेंद्र फडणवीस (Devendra Fadnavis) यांनी भेट घेतली.

राजन तेली यांनी फडणवीस यांची गोव्यात रविवारी रात्री उशीरा भेट घेतली. त्यावेळी फडणवीस यांनी त्यांना पराभवामुळे खचून जाऊन नका पक्षाचे जोमाने काम करा, असा सल्ला दिला. जिल्हाध्यक्षपदाच्या राजीनामा दिल्यानंतर तेली म्हणाले होते, वरिष्ठ नेतेमंडळींशी बोलणे झाल्यानुसार मी भाजप जिल्हाध्यक्षपदाचा राजीनामा देत आहे. हा राजीनामा वैयक्तिक कारणासाठी देत असून यापुढे भाजपचा कार्यकर्ता म्हणून काम करणार आहे.

तेली म्हणाले होता की शिवसेनेसह महाविकास आघाडीच्या नेतेमंडळींनी आमच्या नेत्यांना केसेसमध्ये अडकवले; तरीही आम्ही सिंधुदुर्ग जिल्हा बँकेवरील सत्ता खेचून आणली आहे. भाजपचे नेतेमंडळी आणि कार्यकर्त्यांचा हा विजय आहे. सिंधुदुर्ग जिल्हा बँकेवर 2008 पासून भाजप नेते खासदार नारायण राणे यांच्या नेतृत्वाखाली सत्ता होती. मात्र, यंदाची निवडणूक प्रतिष्ठेची बनली होती, त्यामुळे भाजप नेते नारायण राणे, रवींद्र चव्हाण, नीतेश राणे यांच्या नेतृत्वाखाली सर्व कार्यकर्त्यांनी प्रामाणिक प्रयत्न केले. यामुळेच पुन्हा जिल्हा बँकेवर आम्ही सत्ता खेचून आणू शकलो.

सिंधुदुर्ग जिल्हा बॅंकेच्या निवडणुकीसाठी महाविकास आघाडीचे मंत्री, खासदार, आमदार, जिल्ह्यात दाखल होऊन सर्व ताकद लावली होती. पोलिस प्रशासनाने दडपशाही दाखवली, तरीही आमचाच विजय झाला आहे. आमच्या नेतेमंडळींना नाहक केसेसमध्ये अडकविले; नाहीतर जिल्हा बँकेच्या 19 जागांपैकी किमान 15 जागा आम्ही जिंकल्या असत्या. तरीही 11 जागा जिंकून आमची सत्ता आली आहे, याचे समाधान आहे, असे तेली यांनी नमूद केले होते.