पुणे : आम्हाला सर्वसाधारण सभेत बोलण्याची संधी मिळत नाही, प्रभागातील कामे मार्गी लागत नाहीत, नागरिकांचा रोष ओढावून घ्यावा लागत आहे. प्रमुख पदाधिकारी अधिकाऱ्यांना पाठिशी घालत असल्याने आम्हाला हे अधिकारी दाद देत नाहीत. सत्ताधारी म्हणून आपला प्रशासनावर अंकुशच नाही. सर्वांना समान वागणूक द्या, चार-चार वेळा निवडून येऊनही आमचे म्हणणे कोणी ऐकून घेत नाही, आमचा मान राखला जात नाही अशा शब्दात भाजपच्या नगरसेवकांनी महापालिकेतील कारभाऱ्यांची नावे न घेता आणि प्रशासनावर टीकेची झोड उठवली. हे सर्व ऐकून ‘गेल्या सहा महिन्यात आमच्या मदतीने काही चांगली कामे केली आहेत, ती देखील बैठकीत मांडा’ अशी सूचना पदाधिकाऱ्यांनी केली.
अकोला : केशवनगर परिसरात भरधाव थार वाहनाने दुचाकीला जोरदार धडक दिल्याने सेंट्रिंग कामगार गंभीर जखमी झाल्याची घटना ५ सप्टेंबर रोजी घडली. या अपघातप्रकरणी युवासेना (उद्धव बाळासाहेब ठाकरे) गटाचे महाराष्ट्र सहसचिव असल्याचे सांगितले जाणारे सोनू उर्फ प्रविण चंद्रकांत वाटमारे यांच्याविरुद्ध खदान पोलिसांनी गुन्हा दाखल केला आहे. अपघातात राहुल मधुकर कांबळे (४९) यांच्या डाव्या पायाला गंभीर दुखापत झाली असून, त्यांच्यावर खासगी रुग्णालयात शस्त्रक्रिया करण्यात आली.
सुमारे २० ते २२ दिवसांच्या खंडानंतर राज्याच्या काही भागात रिमझिम पाऊस बरसला आहे. विदर्भातील नागपूरमध्ये पावसाच्या हलक्या सरी पडल्या आहेत. भंडारा-गोंदियामध्ये तासभर चांगला पाऊस झाला आहे. या शिवाय मराठवाड्यातील परभणीतही पाऊस झाला आहे. विदर्भात पुढील दोन दिवस पावसाचा अंदाज वर्तविण्यात आलेला आहे.
ठाण्यातील मुंब्र्यात एटीएसने मोठी कारवाई केली असून फरारी इंडियन मुजाहिद्दीनचा दहशतवादी तारीक खानच्या मुलीला अटक करण्यात आली आहे. तिने खोट्या माहितीच्या आधारे पासपोर्ट मिळविला होता. त्या पासपोर्टच्या आधारे तिने सौदी अरेबिया, पाकिस्तानमध्ये प्रवास केल्याचा संशय व्यक्त करण्यात येत आहे.
ब्रीक्स परिषदेसाठी मुख्यमंत्री देवेंद्र फडणवीस हे सध्या दिल्लीच्या दौऱ्यावर आहेत. बैठकीला जाण्याआधी फडणवीस यांनी दिल्ली मेट्रोतून प्रवास केला. या वेळी त्यांनी सर्वसामान्य प्रवाशांबरोबर चर्चा करत प्रवास केला. काही नागरिकांनी देवेंद्र फडणवीस यांच्यासोबत सेल्फीही घेतला आहे.
विलास घुले हत्या प्रकरणाच्या पुरवणी जबाबत खासदार बजरंग सोनवणे यांचे पुत्र सौरभ सोनवणे यांचे नाव आल्यानंतरही गुन्हा दाखल न झाल्याने घुले कुटुंबीय आक्रमक झाले आहेत. अहमदपूर-अहिल्यानगर महामार्गावर टाकळी फाटा येथे कुटुंबीयांसह कार्यकर्त्यांनी रास्ता रोको आंदोलन केले. या वेळी महिला आणि महिला पोलिस कर्मचाऱ्यांमध्ये बाचाबाची झाली. खासदार पुत्राला अटक होईपर्यंत आम्ही बाजूला हटणार नाही, असा इशाराही घुले कुटुंबाने दिला आहे.
ठाकरेंच्या शिवसेनेचे खासदार संजय राऊत यांनी केलेल्या टीकेला देखील त्यांनी उत्तर दिले आहे. राऊत हे अदखल पात्र माणूस असून ते जे बोलतात त्याला आपण भीक देखील घालत नाही, असा पलटवार नीलेश राणेंनी केला आहे. तर राऊत हा माणूस कोण आहे? असा सवाल करत तो जनतेतून निवडून आला आहे का? या माणसाने पाच पैशांची मदत कोणाला केली आहे का? राजकारणात त्या माणसाचे योगदान आहे काय किंवा कोणतं समाज उपयोगी काम केलं आहे? अशा माणसाला बद्दल का विचारता आणि मी अशा माणसाबद्दल उत्तर देणार नाही, असेही राणेंनी म्हटलं आहे.
राज्य सरकारने मराठा समाज बांधवांना न्याय देण्यासाठी आणि त्यांच्या मागण्या पूर्ण करण्यासाठी नेहमीच सातत्याने भूमिका घेतली आहे. या आंदोलनावर चर्चा आणि संविधानाच्या चौकटीत राहूनच मार्ग निघू शकतो, असा विश्वास ग्रामविकास मंत्री जयकुमार गोरे यांनी मनोज जरांगे पाटील यांच्या आंदोलनावर प्रतिक्रिया देताना व्यक्त केला आहे. तर मराठा आरक्षणासाठी चर्चा आणि संविधानाचा आदर ठेवावा असे देखील त्यांनी आवाहन केलं आहे.
मनोज जरांगे पाटील यांच्या वक्तव्यांवर प्रतिक्रिया देताना नीलेश राणे यांनी त्यांना भाषा जपून वापरण्याचा सल्ला दिला आहे. “जरांगेंनी भाषा नीट वापरावी,” असं म्हणत राणे यांनी जरांगेंच्या वक्तव्यांवर आक्षेप घेतला आहे.
दोन दिवसांपूर्वी नंदुरबार शहरात शिवसेना शिंदे गटाच्या वतीने एका भव्य कार्यकर्ता मेळाव्याचे आयोजन करण्यात आले होते. या मेळाव्यासाठी राज्याचे उद्योग मंत्री उदय सामंत आणि पाणीपुरवठा मंत्री गुलाबराव पाटील विशेष उपस्थित होते.याच कार्यक्रमात बोलताना शिवसेनेचे विधान परिषदेचे आमदार चंद्रकांत रघुवंशी यांना जिल्ह्या निधी वाटपात भेदभाव होत असल्याची खंत व्यक्त करताना अश्रू अनावर झाले.पालकमंत्र्यांकडून हवा तसा निधी मिळत नसल्याचा गंभीर आरोप त्यांनी दोन्ही मंत्र्यांसमोर केला. या भावनिक आणि राजकीय मुद्द्यामुळे संपूर्ण सभेत एकच खळबळ उडाली होती. यावरून राष्ट्रवादीचे जिल्हाध्यक्ष अभिजीत मोरे यांनी अत्यंत आक्रमक भूमिका घेत विकास होत नाही म्हणून पालकमंत्र्यांवर खापर फोडू नका. आमच्या नेत्यावर कोणी डाग लावत असेल तर ते आम्ही अजिबात खपवून घेणार नाहीत असा इशारा दिला आहे.
बंजारा समाजाला अनुसूचित जमातीचे (ST) आरक्षण लागू करण्याच्या मागणीसाठी जिंतूरमध्ये आंदोलन तीव्र झाले आहे. गेल्या आठ दिवसांपासून बंजारा नेते विनोद आडे हे आरक्षणाच्या मागणीसाठी उपोषणाला बसले आहेत. त्यांच्या उपोषणाला पाठिंबा देण्यासाठी आज बंजारा समाजाच्या वतीने जिंतूरमध्ये रस्ता रोको आंदोलन करण्यात आले. दरम्यान, सुरुवातीला शांततेत सुरू असलेल्या या आंदोलनाला काही वेळाने वेगळे वळण मिळाले. आंदोलनातील एका गटाने बाजारपेठेच्या दिशेने जात हातात लाठ्या काठ्या घेत दुकाने बंद करण्याचा प्रयत्न केला आहे. यामुळे काही काळ तणावाचे वातावरण निर्माण झाले होते.
एकीकडे सांगोला तालुक्यात दुष्काळी परिस्थिती निर्माण झाली असून चारा-पाण्याची तीव्र टंचाई जाणवत असताना दुसरीकडे टेंभू उपसा सिंचन योजनेचे लाखो लिटर पाणी पाईपलाईन फुटल्यामुळे वाया जात असल्याचा धक्कादायक प्रकार समोर आला आहे. पाटबंधारे विभागाच्या नियोजनशून्य कारभारामुळे शेतकऱ्यांमध्ये संताप व्यक्त होत आहे.
पुण्यात पुन्हा एकदा वाहनांची तोडफोड झाल्याची घटना समोर आली आहे. सिंहगड रोड परिसरात मध्यरात्री एका तरुणाने हातात कोयता घेऊन रस्त्यावर उभ्या असलेल्या अनेक चारचाकी आणि दुचाकींची तोडफोड केल्याची माहिती समोर आली आहे. या घटनेमुळे परिसरात भीतीचं वातावरण निर्माण झालं असून, सीसीटीव्हीच्या आधारे पोलीस तपास करत आहेत.
लक्ष्मण हाके यांनी मनोज जरांगे पाटील यांच्या मुंबई आंदोलनाला विरोध करत मोठं वक्तव्य केलं आहे. “मुंबईत येण्याआधीच जरांगेंना अटक करा,” अशी मागणी हाके यांनी केली आहे.
मुंबई गोवा महामार्गावर माणगाव-इंदापूरजवळ मोठी वाहतूक कोंडी झालीये. कोकणात जाणाऱ्या लेनवर वाहनांच्या लांबच लांब रांगा लागल्याय. गणेशोत्सवासाठी गावी निघालेल्या कोकणवासियांना वाहतूक कोंडीचा फटका बसला असून, वाहतूक सुरळीत करण्यासाठी पोलिस बंदोबस्त तैनात आहे...
मनोज जरांगे पाटील यांनी अखेर मुंबईला जाण्याचा निर्णय घेतला. 15 सप्टेंबरला अंतरवली सराटीमधून मुंबईच्या दिशेने निघणार. 19 सप्टेंबरला मुंबईच्या आझाद मैदानात उपोषण करणार. मनोज जरांगे पाटील मराठा आंदोलकांसह पाटण, श्रीगोंदा, हडपसर आणि खोपोली या चार ठिकाणी मुक्काम करतील.
आजपासून (ता. 12) मुंबईला येईपर्यंत सरकारला संधी आहे. मराठ्यांचे प्रश्न मार्गी लावायचे. सरकारला तयारीसाठी वेळ देत आहोत. सरकारली ही चौथी संधी आहे. एक तर तु्म्ही अंतरवालीत या, मुख्यमंत्र्यांनी मराठ्यांना सांगा की, मराठ्यांच्या मागण्या मान्य आहेत. संधी जाहीर करताना, मुंबईत येण्यापासून मराठ्यांना रोखल्यास, भाजपपासून मतदान लांब गेले म्हणून समजा, असा इशारा जरांगे पाटील यांनी दिला.
मनोज जरांगे पाटील यांनी मराठा आरक्षणासाठी निर्णायक आंदोलनाची, मुंबईला जाण्याची घोषणा करत असताना, त्यांना हुंदका फुटला. डोळ्यातून अश्रू बाहेर पडले. मराठा आरक्षणासाठी सरकारला अनेक संधी दिल्या आहेत. म्हणून आता मुंबईला यावा लागत आहे.
ही शेवटची आणि निर्णायक लढाई आहे. ही लढाई सुवर्ण अक्षराने लिहिली जाणार आहे. घरात झोपून राहू नका. या लढाईचे साक्षीदार व्हा, असे आवाहन करत मराठ्यांना आंदोलन मार्गावर एकत्र येण्याचे आवाहन मनोज जरांगे पाटील यांनी केले.
मुंबईत जाईपर्यंत आणि तेथून येईपर्यंत शांततेच आंदोलन झाले पाहिजे. दंगा नको, दगडफेक करायची नाही, जाळपोळ झाली नाही पाहिजे. काल न्यायालयाने देखील आपल्या बाजूने कौल दिला आहे. सरकार आपल्या बाजूने नसले तरी न्यायालया आपल्या बाजून आहे.
मराठा आरक्षणासाठी मुंबईला जाण्याचे मनोज जरांगे पाटील यांनी निश्चित केले असून, मुक्काम करत करत मुंबईला पोहोचण्याचा निर्णय घेतला आहे. बीड (पाटोदा), अहिल्यानगर (श्रीगोंदा), पुणे (हडपसर), रायगड (खोपोली) आणि मुंबईत आझाद मैदानात बेमुदत उपोषणाला बसणार आहे, असे जाहीर केले आहे.
वाशिम तालुक्यातील घोटा गावात स्वाभिमानी शेतकरी संघटनेचे कार्यकर्ते आणि शेतकऱ्यांनी पावसा अभावी सुकलेलं सोयाबीनचं पीक स्मशानभूमीत जमा करून त्याची होळी केली आहे. या परिसरात गेल्या 40 दिवसांपासून पाऊस नसल्यानं खरिपाची पिकं पूर्णतः सुकून गेली आहेत. त्यामुळे सरकारनं पंचनामे करून शेतकऱ्यांना तात्काळ भरीव मदत जाहीर करावी, अशी मागणी शेतकऱ्यांकडून केली जात आहे. मदत लवकर जाहीर न केल्यास तीव्र आंदोलन करण्याचा इशाराही स्वाभिमानी शेतकरी संघटने कडून सरकारला देण्यात आला.
कोरड्या दुष्काळामुळे शेतातील पीक सुकून जात असल्याने नैराश्यात येऊन आत्महत्या केलेल्या हिंगोलीच्या औंढा तालुक्यातील गोजेगावच्या महिला शेतकरी कमलबाई कांदे यांच्या घरी थोड्याच वेळात शिवसेना उद्धव बाळासाहेब ठाकरे सेना पक्षाचे नेते व राज्याचे माजी विरोधी पक्ष नेते अंबादास दानवे भेटीला जाणार आहेत. आत्महत्येच्या घटनेला दोन दिवसाचा कालावधी उलटून गेला असताना देखील सरकारचा सक्षम अधिकारी या महिलेच्या दारापर्यंत पोहोचलेला नाही.
परवाना बंदीमुळे पूर्वी जारी करण्यात आलेल्या इरादापत्रांना नवीन ऑटोरिक्षा वाहन नोंदणीसाठी मुदतवाढ देण्यात आली आहे. ज्या इरादापत्रांची १८० दिवसांची मुदत १ जानेवारी २०२६ रोजी किंवा त्यानंतर संपली आहे, तसेच ज्या अर्जदारांनी ३० सप्टेंबर २०२६ पूर्वी मुदतवाढीसाठी अर्ज केला आहे, अशा इरादापत्रांना एकदाच १८० दिवसांची मुदतवाढ देण्याचा निर्णय घेण्यात आला आहे.
तसेच, ९ मार्च २०२६ पर्यंत नवीन ऑटोरिक्षा नोंदणीसाठी अर्ज सादर केलेल्या, मात्र नोंदणी क्रमांक अद्याप जारी न झालेल्या इरादापत्रांनाही १८० दिवसांची मुदतवाढ देऊन वाहन नोंदणीसाठी सादर करण्याची मुभा देण्यात आली आहे.
लोकशाही व्यवस्थेत मतदानाचा अधिकार हा प्रत्येक पात्र नागरिकाचा अत्यंत महत्त्वाचा घटनात्मक अधिकार आहे. अनुसूचित जाती तसेच तृतीयपंथी समाजातील पात्र नागरिकांनी विशेष सखोल व पुनरिक्षण प्रक्रियेअंतर्गत मतदार यादीत नाव नोंदणी करावी, असे आवाहन समाज कल्याण विभागाचे सहाय्यक आयुक्त विशाल लोंढे यांनी केले आहे.
आपल्या मताच्या माध्यमातून लोकशाही प्रक्रियेत सक्रिय सहभाग नोंदविणे ही प्रत्येक नागरिकाची जबाबदारी आहे. या मतदार यादीमध्ये नाव नसल्यास पात्रतेनुसार आवश्यक कागदपत्रांसह आपल्या मतदारसंघातील मतदार नोंदणी अधिकारी (BLO) यांच्याशी संपर्क साधून मतदार नोंदणीची प्रक्रिया तातडीने पूर्ण करावी. मतदार यादीतील नाव, पत्ता, वय, लिंग किंवा अन्य तपशीलात काही त्रुटी असल्यास आवश्यक ती दुरुस्ती करून घ्यावी.
आमदार डॉ राजेंद्र पाटील यड्रावकर यांचा ताफा सैनिक टाकळी (ता. शिरोळ) गावात आला असता, येथील माजी सैनिक, पूरग्रस्त नागरिक व शेतकऱ्यांनी काळे झेंडे दाखवत निषेध व्यक्त केला.
मनोज जरांगे-पाटील यांच्या अन्नत्याग आंदोलनाला नाशिकच्या युवकांनी सक्रिय पाठिंबा दिला आहे. सरकारने आणि सत्ताधारी आमदारांनी समाजाचा अंत पाहू नये. अन्यथा आक्रमक आंदोलक मुंबईत शिरतील असा इशारा देण्यात आला. नाशिक जिल्ह्यात चांदवड, मनमाड, येवला, देवळा यांसह विविध ठिकाणी रास्ता रोको करण्यात आला. शुक्रवारी नाशिक शहरात महिला वनी येथे नाशिक त्रंबक रास्ता अडविण्यात आला. युवा आंदोलकांनी यावेळी मनोज रांगे पाटील यांना समर्थन जाहीर केले.
मनोज जरांगे पाटील मुंबईत जाण्यावर ठाम असून तिथे आम्ही लोकशाही मार्गाने आंदोलन करू, असं त्यांनी स्पष्ट केलं आहे.
आज १२ सप्टेंबर रोजी दुपारी १२ वाजता या मराठी समर्थकांची अंतरवाली सराटीत बैठक होणार आहे. मुंबईतील आझाद मैदानात आंदोलनास परवानगी मागितली असून सरकार ती देईल, असे जरांगे यांनी म्हटले आहे.
जिल्हा परिषदेच्या शाळांची दयनीय अवस्था, सुविधांचा अभाव यावरून नेहमीच ओरड होत असते. अशातच जालन्याच्या पालकमंत्री पंकजा मुंडे यांनी जिल्हा परिषदेच्या जिल्ह्यातील पाचशे शाळांचा दर्जेदार विकास करण्याचा निर्णय घेतला आहे. पुढील दोन वर्षांत जालना जिल्ह्यातील पाचशे जिल्हा परिषद शाळांचा दर्जेदार विकास करण्याचे निर्देश पंकजा मुंडे यांनी मंत्रालयातील आढावा बैठकीत संबंधित विभागाला दिले. 'नवीन वर्षात नवी शाळा’ या संकल्पनेसह राज्याने जालन्याचा आदर्श घ्यावा, असे काम करा, अशा सूचनाही त्यांनी बैठकीत केल्या.
गणेशोत्सवानिमित्त एसटी बसगाड्या आणि गणेशोत्सवाच्या खरेदीसाठी घराबाहेर पडलेल्या नागरिकांच्या वाहनांमुळे शुक्रवारी रात्री ठाणे आणि नवी मुंबईतील प्रमुख रस्त्यांवर मोठ्या प्रमाणात वाहतूक कोंडी झाली. या कोंडींचा फटका प्रवाशांना बसला आहे.
सध्याची देशातील आणि महाराष्ट्रातील राजकीय परिस्थिती पाहता महायुती सरकार आपला कार्यकाळ पूर्ण करणार नाही. हे सरकार २०२९ पूर्वीच जाईल, असा दावा शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी केला. ते नांदेड येथील 'मराठवाड्याचा विकास तुमसे ना हो पायेगा' या जनआंदोलनादरम्यान बोलत होते.
काँग्रेसचे माजी प्रवक्ते रत्नाकर महाजन यांचं पुण्यात निधन झालं असून ते राज्य नियोजन मंडळाचे माजी अध्यक्ष होते. आज दुपारी त्यांच्यावर अंत्यसंस्कार केले जाणार आहेत.
शिर्डी येथील श्री साईबाबा मंदिर आणि परिसराच्या सुरक्षेसाठी केंद्रीय औद्योगिक सुरक्षा दलाची (सीआयएसएफ) सुरक्षा पुरविण्याबाबत संस्थानने पाठविलेल्या पत्रावर ८ आठवड्यांत योग्य ती कार्यवाही करण्याचे निर्देश मुंबई उच्च न्यायालयाच्या औरंगाबाद खंडपीठाने सीआयएसएफच्या महासंचालकांना दिले.
कोल्हापूर जिल्ह्यातील नांदणी मठाची माधुरी यातील गेल्या 13 महिन्यांपासून गुजरात इथल्या वनतारा या ठिकाणी होती. न्यायालयीन प्रक्रिया आणि हाय पॉवर कमिटीने दिलेल्या आदेशानंतर माधुरी हत्तीनीला तिच्या स्वगृही आणण्यात आले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.