Maharashtra Politics Live Update : संजय शिरसाटांनी शिवसेनेच्या मेळाव्यातच केलं MIM अन् भाजपच्या कामाचं कौतुक

 इंधन धरवाढीचा फटका बसल्यामुळे नागपुरहून उडणारी अनेक विमानं एक जूनपासून बंद करण्याचा निर्णय घेण्यात आला आहे. विमानाचा संचालन खर्च ५५ ते ६० टक्क्यांवर पोहोचल्याने नागपुरहून उडणारी अनेक विमानं बंद केली जाणार आहेत. याचा मोठा फटका प्रवाशांना बसणार आहे.

'एसआयआर' चा विषय सगळ्यांनी समजून घेतला पाहिजे. येणाऱ्या पिढीसाठी आणि तुमच्या आमच्या भवितव्यासाठी यावर लक्ष देणे खूप गरजेचे आहे. हैदराबादहून ओवेसी या शहरात येतो काय? आपल्या कार्यकर्त्यांना अॅप देऊन एसआयआरची माहिती दिली जाते, त्यांची कार्यशाळा होऊन ते कामालाही लागतात? मग असे काम आपल्यालाल का जमत नाही? असा सवाल करत पालकमंत्री संजय शिरसाट यांनी एसआयआरच्या विषयावर एमआयएमने केलेल्या कामाचे कौतुक केले. त्यांची लोक मोठ्या प्रमाणात नोंदणी करत आहेत, त्यांचे कार्यकर्ते कामाला लागले आहेत, आपण मात्र काहीच करायला तयार नाही, अशी खंत शिरसाट यांनी व्यक्त केली. शिवाय भाजपाच्या संघटनात्मक कामाकडे पहा. त्यांचा कोणताही कार्यकर्ता भेटला की तो म्हणतो, आमच्या मागे पक्षाने खूप कामे लावली आहेत. या पक्षाच्या दीडशेहून अधिक वेगवेगळ्या विंग पक्षासाठी काम करतात. आपण मात्र गाफील आहोत, असंही ते यावेळी म्हणाले.

उल्हासनगर शहरातील कॅम्प ५ परिसरातील कैलाश कॉलनी चौकात गुरुवारी रात्री जुन्या वादातून झालेल्या अंदाधुंद गोळीबारात दोन सख्ख्या भावांचा जागीच मृत्यू झाल्याची धक्कादायक माहिती समोर आली आहे.