सातारा जिल्हा मध्यवर्ती बँकेच्या निवडणुकीत दहिवडी येथील मतदान केंद्रावर तोतया निवडणूक निरीक्षक बनून आलेल्या वैशाली अक्षदा देशपांडे (रा. पाषाण-सुस रोड, पुणे) या महिलेला पोलिसांनी अटक केली आहे. २०२३ मधील निवडणूक आयोगाचे जुने ओळखपत्र गळ्यात अडकवून ती केंद्रावर वावरत असताना, संशयास्पद हालचालींमुळे पोलिसांनी केलेल्या चौकशीत तिचे बिंग फुटले. सद्यस्थितीत या नावाच्या कोणत्याही निरीक्षकाची नियुक्ती नसल्याचे स्पष्ट होताच, पोलीस हवालदार अजय झुंजार यांच्या फिर्यादीवरून दहिवडी पोलीस ठाण्यात भारतीय न्याय संहिता कलम २०४ आणि २०५ अन्वये गुन्हा दाखल करण्यात आला असून पोलीस पुढील तपास करत आहेत.
