अकोल्यात महायुतीत बिघाडी झाल्याचे समोर येत असून भाजप पुरेशा जागा देत नसल्याने राष्ट्रवादीकडून स्वबळाचा नारा देण्यात आला आहे. याबाबत राष्ट्रवादीचे मंत्री इंद्रनील नाईक आणि आमदार अमोल मिटकरी यांनी सूचक वक्तव्य केलं आहे. त्यांनी, सन्मानपूर्वक जागा नसेल तर वेगळा निर्णय घेऊ? जिथे सन्मान तिथेचं आम्ही जाऊ हीच आमची आणि राष्ट्रवादीच्या नेत्यांची भूमिका असल्याचे म्हटलं आहे.
उल्हासनगरमध्ये शिवसेनेच्या शिंदे गटातील अंतर्गत नाराजी चव्हाट्यावर आली आहे. पक्षाचे 200 हून अधिक पदाधिकारी आणि कार्यकर्ते जाहीर राजीनामे देण्याच्या तयारीत असल्याने राजकीय वर्तुळात खळबळ उडाली आहे.
उल्हासनगर मध्ये भाजपला मोठा धक्का बसला आहे. भाजपच्या पॅनल 1 च्या माजी नगरसेविका जयश्री ज्ञानेश्वर पाटील यांनी पक्षाला सोडचिठ्ठी देत टीम ओमी कलानी मध्ये प्रवेश केला आहे. त्या तीन वेळा पॅनल 1 मधून निवडून आल्या आहेत. या वेळी टीम ओमी कलानीचे वरिष्ठ पदाधिकारी उपस्थितीत होते. या पॅनल मध्ये शिवसेनेचे माजी नगरसेवक दिलीप गायकवाड यांच्या पॅनलला ताकद मिळाली असून या पॅनल मधून आणखीन एक मोठा प्रवेश टीम ओमी कलानी मध्ये होणार असल्याची चर्चा आहे.
पिंपरी चिंचवड शहरात महापालिका निवडणुकांच्या अनुषंगाने भारतीय जनता पक्षाच्या आधीच अजित पवारांच्या राष्ट्रवादीने प्रचारात आघाडी घेतली आहे. उपमुख्यमंत्री अजित पवार यांनी उमेदवारी अर्ज दाखल करण्याआधीच आपल्या उमेदवारांच्या प्रचाराचा शुभारंभ केला आहे.
आमदार महेंद्र थोरवे यांनी पुन्हा एकदा सुनील तटकरे यांच्यावर घणाघात करत टीका केली आहे. त्यांनी मंगेश काळोखे यांच्या हत्येनंतर अद्याप सुधाकर घारे यांना अटक झालेली नसल्याने संताप व्यक्त केला आहे. तसेच काळोखे यांच्या हत्येच्या निषेधार्थ उद्या खोपोलीत शिवसेनेच्या माध्यमातून कॅडल मार्च काढण्यात येणार असून मंगेशच्या सर्व आरोपींना अटक होत नाही तोपर्यंत खोपोली स्टेशनला नातेवाइकांसह ठिय्या देणार असल्याचे त्यांनी म्हटलं आहे. तसेच त्यांनी तटकरे हे सुधाकर घारे याचा हात नाही अस कर्जत मध्ये येऊन सांगतात. यामुळे ते आता धनंजय मुंडे आणि सूरज चव्हाण यांना वाचवले तसेच घारेंसह भरत भगत यांना वाचवत असल्याचा आरोप केला आहे.
मुंबईतील वॉर्ड क्रमांक दोनमधून भाजपच्या तेजस्वी घोसाळकर या दहिसरच्या प्रभाग क्रमांक 2 मधून भाजपच्या उमेदवार असतील, हे आता जवळपास निश्चित झाले आहे. सोमवारी त्या भाजपकडून उमेदवारी अर्ज दाखल करणार आहेत. तेजस्वी घोसाळकर यांचे सासरे विनोद घोसाळकर हे उद्धव ठाकरे यांच्या शिवसेनेचे निष्ठावंत म्हणून ओळखले जातात.
महापालिका निवडणुकीची रणधुमाळी सुरू झाली असून, त्यातच आता मोठी बातमी समोर येत आहे. एमआयएमला राज्यात मोठा धक्का बसला आहे. एमआयएमचे प्रदेश कार्याध्यक्ष आणि सोलापूरचे शहराध्यक्ष फारूक शाब्दि यांनी पक्षाचा तडकाफडकी राजीनामा दिला आहे. हा राज्यात एमआयएमला मोठा धक्का मानला जात आहे. एमआयएमचे नेते एम्तियाज जलील यांच्या नंतर फारुख शाब्दी हे एमआयएमचे राज्यातील दुसरे मोठे नेते आहेत. त्यामुळे त्यांच्या राजीनाम्यामुळे पक्षाला मोठं खिंडार पडलं आहे. सोलापूर शहर मध्य विधानसभेतून फारुख शाब्दि यांनी दोन वेळा निवडणूक लढवली होती, दोन्ही वेळेस फारुख शाब्दि हे दुसऱ्या क्रमांकावर होते.
मंत्री गुलाबराव पाटील यांनी विश्रामगृहात मंत्री गिरीश महाजन यांच्याशी बंददाराआड चर्चा केली नंतर निराश होऊन गुलाबराव पाटील विश्रामगृहातून बाहेर पडले
गुलाबराव पाटील विश्रामगृहातून बाहेर पडल्यानंतर लगेच काही वेळानंतर गिरीश महाजन ही विश्रामगृहातून नाशिककडे रवाना
शरद पवारांच्या राष्ट्रवादी काँग्रेसचं नक्की काय सुरू आहे?
पुणे येथील महाविकास आघाडीच्या बैठकीला शरद पवारांच्या राष्ट्रवादी गैरहजर
काँग्रेस आणि शिवसेना ठाकरे पक्षाची काँग्रेस भवन येथे बैठक सुरू
राष्ट्रवादी शरदचंद्र पवार पक्षाचे नेते बैठकीला उपस्थित राहीले नाहीत
राष्ट्रवादी शरदचंद्र पवार पक्षाचे सर्व प्रमुख नेते "नॉट रिचेबल", काँग्रेस आणि सेनेकडून तक्रार
शरद पवारांची राष्ट्रवादी पुन्हा राष्ट्रवादी अजित पवारां सोबत जाणार ?
मुंबई महापालिका निवडणुकीसाठी राष्ट्रवादी काँग्रेसची सुमारे पहिली यादी आज जाहीर होणार आहे. या पहिल्या यादीत ३५ जणांची नावे असणार आहेत. ही यादी शनिवारी सायंकाळीच जाहीर केली जाणार होती. मात्र, त्या ऐनवेळी रद्द करण्यात आली, त्यामुळे ती आज येण्याची शक्यता आहे.
अमरावती महापालिकेसाठी काँग्रेस आणि शिवसेना उद्धव बाळासाहेब ठाकरे पक्षाची युती होण्याचे संकेत मिळत आहेत. काँग्रेस आणि ठाकरेंच्या शिवसेनेच्या पदाधिकाऱ्यांची अमरावतीत बैठक झाली असून काँग्रेस नेते सुनील देशमुख आणि ठाकरेंच्या शिवसेनेचे जिल्हाप्रमुख पराग गुडधे यांच्यात सध्या चर्चा सुरू आहे. सोमवारी सायंकाळपर्यंत काँग्रेस शिवसेना उद्धव बाळासाहेब ठाकरे पक्षाच्या युतीची घोषणा होण्याची शक्यता आहे
कल्याण डोंबिवलीमध्ये महायुतीमधील शिवसेना आणि भाजपमध्ये मोठा तणाव निर्माण झाला आहे. भाजपच्या स्थानिक नेत्यांनी शिवसेनेसोबत युती करण्यास तीव्र विरोध दर्शविला आहे. तसेच, आंदोलनही केले आहे. युती नको मैत्रीपूर्ण लढत होऊ द्या, अशी मागणी भाजपची आहे. त्यावर भाजपचे प्रदेशाध्यक्ष रवींद्र चव्हाण यांनी भाजप कार्यकर्त्यांची तातडीने बैठक बोलावली आहे. त्यात आहे त्या जागांवर समाधान माना, युतीमध्येच लढा, अशी सूचना त्यांनी भाजप कार्यकर्त्यांला दिल्या आहेत.
महापालिका निवडणुकीच्या पार्श्वभूमीवर सोलापूर भारतीय जनता पक्षात सुरू असलेल्या घडामोडींमुळे दोन्ही देशमुख नाराज झाले आहेत. दुसरीकडे, भाजपकडून शिवसेनेला अवघ्या १५ जागा सोडण्याची चर्चा असतानाच सोलापूरमध्ये मोठी राजकीय घडामोड पुढे आली आहे. त्यामुळे महायुतीमधील शिवसेना आणि राष्ट्रवादी काँग्रेसची युती घोषित झाली आहे. शिवसेना आणि राष्ट्रवादी काँग्रेस पक्ष हे महापालिकेच्या १०२ जागांपैकी प्रत्येकी ५१ जागा लढवणार आहेत. दोन्ही पक्षांनी निम्या जागा वाटून घेण्याचा निर्णय घेतला आहे.
आम्ही ज्यांना मोठे केले आज तेच आमच्यावर वार करत आहेत. दोन गुजराती आपल्याला गिळायला निघाले आहेत. इतकी वर्ष लढाई लढलो मुंबई कोणीही आमच्यापासून हिसकावू शकत नाही. आजपर्यंत भाजपाने उपयोग करून घेतला. असा घणाघात शिवसेना उबाठाचे उद्धव ठाकरे यांनी केला.
माजी खासदार समीर भुजबळ यांच्या हस्ते पणन हंगाम शासकीय आधारभूत किंमत योजनेअंतर्गत शासकीय गोदाम, कोपरगाव रोड,येवला येथे मकरंद सोनवणे यांच्या सहकार महर्षी गोविंदराव (नाना) सोनवणे विविध कार्यकारी सेवा सहकारी सोसायटी मका खरेदीचा शुभारंभ करण्यात आला.
शेतकऱ्यांच्या शेतमालाला योग्य दर मिळावा तसेच शेतमालाचे नुकसान होऊ नये यासाठी महायुती सरकार कटिबद्ध आहे. त्यादृष्टीने येवल्यात मंत्री छगन भुजबळ यांच्या माध्यमातून अधिक गोडाऊन उभारण्यात येईल असे प्रतिपादन माजी खासदार समीर भुजबळ यांनी केले.
कृष्णराज महाडिक कोल्हापूर महापालिकेच्या निवडणुकीतून घेणार माघार
महापालिकेची निवडणूक कार्यकर्त्याची असल्याने खासदार धनंजय महाडिक यांचा निर्णय
कालच त्यांनी प्रभाग ३ उमेदवारी अर्ज दाखल केला होता.
रायगडच्या खोपोलीमध्ये नगरसेविकेचे पती मंगेश काळोखे यांच्या निघृण हत्येचे पडसाद रायगडमध्ये उमटायला सुरुवात झाली असून आज शिवसेना रायगड जिल्हाप्रमुख राजा केणी यांच्या नेतृत्वाखाली शिवसैनिक रस्त्यावर उतरले आहेत. राष्ट्रवादीचे जिल्हाप्रमुख सुधाकर घारे, जिल्हा प्रवक्ते भरत भगत यांचा या हत्येमागे हात असल्याचा आरोप करीत आरोपींना फाशीची शिक्षा आणि प्रमुख सूत्रधारांचा शोध घेण्याची मागणी यावेळी करीत शिवसैनिकांनी घटनेचा निषेध केला.
लातूरच्या चाकूर तालुक्यातील नायगाव इथं, सिगारेट उधार दिली नसल्याने, एका बार मालकाची धारदार शस्त्राने हत्या करण्यात आली. दरम्यान मारहाण करतानाची ही सगळी घटना बारमधील सीसीटीव्ही कॅमेऱ्यामध्ये कैद झाली आहे. या प्रकरणी लातूरच्या स्थानिक गुन्हे शाखेने, हत्या करणाऱ्या तीन आरोपींना 24 तासाच्या आत जेरबंद केले आहे.
नांदेड महापालिकेच्या माजी महापौर शीला भवरे यांनी भाजपत प्रवेश केला. अशोक चव्हाण यांच्या उपस्थितीत शीला भवरे यांनी भाजपमध्ये प्रवेश केला. 2014 साली त्या काँगेसकडून महापालिकेच्या महापौर होत्या. शीला भवरे यांचे पती माजी नगरसेवक यांनी देखील काँग्रेस सोडून आता भाजपमध्ये प्रवेश केला.
महापालिका सार्वत्रिक निवडणुकांच्या पार्श्वभूमीवर नवी मुंबई शहरामध्ये राष्ट्रवादी काँग्रेस पार्टी शरदचंद्र पवार पक्षाचे माजी जिल्हा उपाध्यक्ष महादेव पवार यांनी एकनाथ शिंदे शिवसेनेत प्रवेश केला आहे. शिवसेना जिल्हाप्रमुख किशोर पाटकर यांच्या जनसंपर्क कार्यालयात हा प्रवेशाचा कार्यक्रम झाला.
सांगलीच्या राजकारणात आता माजी मुख्यमंत्री वसंतदादा पाटील यांचे पणतू आणि माजी केंद्रीय राज्यमंत्री यांचे पुत्र व खासदार विशाल पाटलांचे पुतणे हर्षवर्धन पाटलांची एंट्री झाली आहे. हर्षवर्धन पाटील हे आता सांगली महापालिका निवडणूक लढवणार आहेत. हर्षवर्धन पाटील हे प्रतीक पाटील यांचे मोठे पुत्र आहेत. पुणे एमआयटी मधून शिक्षण घेत थेट इंग्लंडमधून एमएस शिक्षण पूर्ण करून हर्षवर्धन पाटील आता थेट सांगलीच्या राजकीय आखाड्यात उतरले आहेत.
अमरावती इथल्या महापालिका निवडणुकीसाठी भाजप, एकनाथ शिंदे शिवसेना व युवा स्वाभिमान पार्टी या महायुतीचे जागावाटप अंतिम टप्प्यात येत असतानाच पुन्हा रखडले आहे. त्यावर तोडगा काढण्यासाठी भाजपचे राज्य निवडणूक प्रमुख व जिल्ह्याचे पालकमंत्री चंद्रशेखर बावनकुळे आज अमरावतीत येणार आहे. बैठक झाल्यानंतर दुपारी चार वाजता अंतिम निर्णय जाहीर होण्याची शक्यता आहे.
देशभरात चांदीचे भाव दिवसेंदिवस रेकॉर्ड ब्रेक वाढत आहेत. खामगाव इथला प्रसिद्ध चांदीच्या बाजारपेठेत चांदीचा आजचा भाव हा 2,63,000 रु GST सह प्रति किलो झालेला आहे. आज वरचा हा सर्वात उच्चांकी भाव असल्याचं चांदीचे व्यापारी सांगतात. जगभरातील राजकीय परिस्थिती व विकसित देशांमध्ये लागलेल्या व्यावसायिक स्पर्धेमुळे हा भाव सातत्याने वाढत असल्याचं जाणकार सांगत आहेत. 1 जानेवारी 2025ला प्रतिकिलो 90 हजार 500 रुपये असलेला चांदीचा भाव आज उच्चांक वाढला आहे.
बीडच्या नेकनूर इथल्या भाजप आणि अजित पवारांच्या राष्ट्रवादीच्या स्थानिक नेत्यांमध्ये मोठा वाद झाला आहे. गेल्या तीन दिवसांपासून हा वाद धुसफूसत होता. काल दुपारी 12 वाजता दोन्ही बाजूच्या गटातील 30 ते 40 लोकांकडून अहमदपूर-अहिल्यानगर या राष्ट्रीय महामार्गावर एकमेकांना लोखंडी पाईप, लाठ्या-काठ्या आणि दगडाने बेदम मारहाण केली. या घटनेचा एक व्हिडिओ देखील समोर आला आहे. या घटनेत 8 ते 10 जण जखमी झाले आहेत. अद्याप पोलिसात कुठलीही तक्रार दाखल झालेली नसून काहीही कारवाई करण्यात आलेली नाही.
बारामतीतील शरदचंद्र पवार सेंटर ऑफ एक्सलन्स इन आर्टिफिशियल इंटेलिजन्सचं उद्घाटन करण्यासाठी उद्योगपती गौतम अदानी बारामती आले आहेत. ते नुकतेच बारामती विनातळावर दाखल झालेत.
31 डिसेंबरच्या पार्श्वभूमीवर शहरातील कायदा उत्सव व्यवस्था अबाधित ठेवण्यासाठी विविध उपाय योजना करण्याच्या सूचना पोलीस आयुक्तांनी सर्व वरिष्ठ अधिकाऱ्यांना बैठकीत दिल्या आहेत.यामध्ये दारू पिऊन गाडी चालविणाऱ्या वाहन चालकांना अटकाव करण्यासाठी शहर पोलिसांकडून पुढील पाच दिवस शहरात विविध ठिकाणी नाकाबंदी केली जाणार आहे.
महायुतीत जागावाटप संदर्भात मॅरेथॉन बैठका होऊनही अद्याप घोळ मिटत नसल्याने इच्छुकांचा जीव टांगणीला लागला होता. अखेर मंत्री मुश्रीफांनी घटक पक्षाला घाम फोडत समानधारक जागा घेत तोडगा काढल्याची खात्रीलायक माहिती समोर आली आहे. महायुतीचा फॉर्म्युला ठरला असून भाजप ३५, शिवसेना ३२ आणि राष्ट्रवादी १४ जागा घेत असल्याची माहिती आहे.
वंचित बहुजन आघाडीने महाविकास आघाडीला पुणे शहरातील 41 प्रभागांमध्ये असलेल्या 41 उमेदवारांचा प्रस्ताव दिला होता. मात्र काँग्रेस राष्ट्रवादी काँग्रेस शरदचंद्र पवार पक्ष आणि शिवसेना यांच्यामध्ये 50-50-50 चा फॉर्म्युला ठरला आहे. तर जिथे भाजपविरोधात मविआला उमेदवार सापडत नाही तिथे आम्हाला स्थान दिलं जातंय, त्यांच्या या खेळीला आम्ही बळी पडणार नाही, त्यामुळे सध्या तरी आमच्यात कुठलीही युती नाही असं वंचित बहुजन आघाडीचे शहराध्यक्ष अरविंद तायडे यांनी सांगितलं आहे.
प्रसिद्ध उद्योगपती गौतम अदानी आज बारामतीत येणार आहेत. त्यांच्या हस्ते बारामतीत शरदचंद्र पवार सेंटर ऑफ एक्सलन्स इन आर्टिफिशियल इंटेलिजन्सचं उद्घाटन केलं जाणार आहे. या कार्यक्रमाला जेष्ठ नेते शरद पवार उपमुख्यमंत्री अजित पवार खासदार सुप्रिया सुळे सुनेत्रा पवार विद्या प्रतिष्ठानचे खजिनदार युगेंद्र पवार उपस्थित असणार आहेत.
उपमुख्यमंत्री अजित दादा पवार आज बारामती दौऱ्यावर आहेत. पहाटे पाच वाजता त्यांनी बारामतीतील बस स्थानकाची पाहणी केली. यावेळी बस स्थानक परिसरात होणारी वाहतूक कोंडी टाळण्यासाठी कोणत्या नवीन उपाययोजना करता येतील, यासंदर्भात अधिकाऱ्यांशी चर्चा केली.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.