महाराष्ट्र राज्य महिला आयोगाने सर जे. जे. समूह रुग्णालयाच्या अधिष्ठात्यांना नोटीस बजावली आहे. स्त्रीरोग विभागातील महिला डॉक्टरने विभागप्रमुखाकडून होत असलेल्या मानसिक त्रासाबाबत १० जुलै २०२५ रोजी तक्रार दाखल केली होती. आयोगाने दोन वेळा मागवूनही रुग्णालय प्रशासनाने कार्यवाही अहवाल सादर न केल्याने सुनावणीतही समाधानी माहिती मिळाली नाही. महिला कर्मचाऱ्यांच्या तक्रारींकडे दुर्लक्ष आणि आयोगास सहकार्य न केल्याची गंभीर नोंद घेण्यात आली. अंतर्गत समितीची माहिती, तक्रारीवरील कारवाईचा अहवाल आणि संबंधित अधिकाऱ्यांना पुन्हा जबाबदाऱ्या देण्याबाबतचा खुलासा सात दिवसांत सादर करण्याचे निर्देश देण्यात आले.
मुख्यमंत्री देवेंद्र फडणवीस यांनी जगप्रसिध्द व्यावसायिक इलॉन मस्क यांच्या स्टारलिंक सॅटेलाईट कम्युनिकेशन्स प्रायव्हेट लिमिटेड कंपनीचा महाराष्ट्र सरकारचा करार झाल्याची माहिती दिली आहे. राज्यातील दुर्गम आणि अल्पसेवित भागांपर्यंत इंटरनेट सेवा पोहोचवण्याच्या दिशेनं वाटचाल होत असल्याचं फडणवीस यांनी म्हटलं.
आमदार रोहित पवार यांनी उपमुख्यमंत्री आणि काका अजित पवार यांना सल्ला दिला आहे. 'आम्हाला कुबड्यांची गरज नाही' या अमित शाह यांच्या वक्तव्याचा दाखला देत त्यांनी महायुतीत अजित पवार आणि एकनाथ शिंदे यांचे महत्त्व कमी करण्याचा हा प्रयत्न असल्याची टीका केली आहे. तसेच त्यांनी अजितदादांना त्यांच्याच पक्षातील विदर्भ आणि कोकणातील नेतेमंडळी अडचणीत आणत असल्याचा गंभीर आरोपही आमदार रोहित पवार यांनी केला.
शिवसेना उद्धव बाळासाहेब ठाकरे पक्षाचे खासदार संजय राऊत यांची प्रकृती आणखी बिघडली आहे. भांडूपच्या फोर्टिस रूग्णालयात त्यांना उपचारासाठी दाखल करण्यात आले आहे. तिथे त्यांच्यावर पुढील उपचार केले जाणार आहेत. खासदार संजय राऊत यांनी काही दिवसांपूर्वीच एका निवेदनाद्वारे प्रकृतीत बिघाड झाल्याची माहिती दिली होती.
स्थानिक स्वराज्य संस्थांच्या पार्श्वभूमीवर राजकीय वातावरण ढवळून निघालं आहे. बुधवारी(ता.5) राष्ट्रवादी काँग्रेस पक्षाची आढावा बैठक येथे पार पडली. यावेळी रायगडमध्ये स्थानिक स्वराज्य संस्थेच्या निवडणुकीत भाजपासोबत युती करूया, पण शिवसेनेसोबत नको, अशी भूमिका स्थानिक नेत्यांनी मांडली. यावर कोणासोबत युती करायची आणि कुणासोबत नाही, या संदर्भात स्थानिक स्तरावर निर्णय घ्या, अशा सूचना उपमुख्यमंत्री अजित पवार यांनी या बैठकीत दिले आहेत.
महाविकास आघाडीमध्ये मनसेला स्थान असेल की नाही, याबाबत काँग्रेसने भूमिका घेतली आहे. वरिष्ठ नेत्यांसमवेत यासंदर्भात बैठक झाली. बिहार विधानसभा निवडणुकांच्या पार्श्वभूमीवर राज ठाकरे यांच्यापासून काँग्रेस एक हात लांबच राहणार असल्याचे स्पष्ट झालं आहे. बिहार विधानसभा निवडणुकांच्या पार्श्वभूमीवर मनसेसोबतची युती काँग्रेसला परडवणारी नाही. त्यामुळे मनसेसोबत आघाडी न करण्याचा निर्णय घेतला आहे.
अजितदादांचे महत्व कमी करण्यासासाठी राष्ट्रवादीचे खासदार सुनील तटकरे आणि खासदार प्रफुल्ल पटेल हे मदत करत असल्याचा आरोप रोहित पवारांनी केला. "अजितदादांचे आणि एकनाथ शिंदेंचे महत्व कमी करण्याचे प्रयत्न केले जात आहेत. राज्याचा मुख्यमंत्री बनण्याची क्षमता अजितदादांकडे होती, पण ती आता कुठे दिसत नाही. कारण भाजपच त्यांची ताकद हळूहळू कमी करत आहे. त्यासाठी राष्ट्रवादीतील एक विदर्भातील आणि एक कोकणातील नेता भाजपला मदत करतोय.
रत्नागिरीतील भाजपचे जिल्हाध्यक्ष राजेश सावंत यांनी तडकाफडकी जिल्हाध्यक्षपदाचा राजीनामा दिला. चिपळूणमधील भाजपच्या एका कार्यक्रमातच त्यांनी प्रदेशाध्यक्ष रवींद्र चव्हाण यांच्याकडे आपला जिल्हाध्यक्षपदाचा राजीनामा दिला. भाजपमध्ये राजेश सावंत यांच्याकडे दक्षिण रत्नागिरीचा जबाबदारी होती. मात्र, नगरपालिका निवडणुकांपूर्वीच त्यांनी पदाचा राजीनामा दिला असून लेकीसाठी बापाने राजकीय करिअर पाणी सोडल्याची चर्चा मतदारसंघात होत आहे.
राष्ट्रवादी काँग्रेस शरदचंद्र पवार पक्षाने आगामी स्थानिक स्वराज्य संस्थांच्या निवडणुकांसाठी भाजप वगळता इतर कोणत्याही पक्षासोबत स्थानिक पातळीवर युती करण्याचे पूर्ण स्वातंत्र्य दिले आहे. 'भाजप सोडून जर इतर पक्षांसोबत तुम्हाला जाणं अनुकूल असेल तर तुम्ही नक्की त्या संदर्भात स्थानिक पातळीवर निर्णय घ्यावा,' अशा स्पष्ट सूचना बैठकीत देण्यात आल्या.
धाराशिव जिल्ह्यामध्ये शरद पवार यांच्या राष्ट्रवादी काँग्रेसला मोठा धक्का बसला आहे. पवार गटाचे जिल्हाध्यक्ष संजय पाटील दुधगावकर यांनी पदाचा राजीनामा दिला आहे. दुधगावकर यांनी जिल्हाध्यक्ष पदासह सक्रीय सदस्य व प्राथमिक सदस्यपदाचा देखील राजीनामा दिला आहे. दुधगावकर यांच्यासह राष्ट्रवादी शरद पवार पक्षाचे नेते संजय निंबाळकर यांनीही सदस्यत्वाचा राजीनामा दिला आहे. संजय पाटील निंबाळकरांनी 2019 मध्ये राष्ट्रवादीकडून विधानसभेची निवडणूक लढवली होती.
संजय राऊत यांची तब्ब्येत बिघडली आहे. त्यांना आता उपचारासठी भांडूपच्या फोर्टिस रूग्णालयात दाखल करण्यात आले आहे. या रूग्णालयात संजय राऊत यांच्यावर पुढील उपचार होणार आहेत. राऊत यांनी काही दिवसांपूर्वी प्रकृतीत बिघाड झाल्याची आणि उपचार सुरु असण्याची माहिती दिली होती. त्यानंतर आता त्यांची प्रकृती आणखी बिघडली असल्याची माहिती समोर आली आहे.
फलटण महिला डॉक्टर आत्महत्या प्रकरणात आतापर्यंतची सर्वात मोठी कारवाई करण्यात आली आहे. फलटण पोलीस ठाण्यातील निलंबित पोलीस उपनिरीक्षक गोपाळ बदनेला पोलीस खात्यातून बडतर्फ करण्यात आले आहे. विशेष पोलीस महानिरीक्षक सुनील फुलारी यांनी गोपाळ बदनेला सेवेतून केले बडतर्फ केले आहे. बदने सध्या न्यायालयीन कोठडीत असून पोलीस दलाची प्रतिमा मालिन केल्याचा ठपका ठेवत त्याला बडतर्फ करण्यात आले आहे.
नागपूर : राज्य निवडणूक आयोगाने स्थानिक स्वराज्य संस्थांच्या निवडणुकीच्या तारखा जाहीर केल्यानंतर राजकीय वातावरण तापू लागले आहे. या निवडणुकांमध्ये नगर परिषद आणि नगर पंचायतींचा समावेश असून, सर्वच पक्षांनी तयारी सुरू केली आहे. दरम्यान, राष्ट्रवादी काँग्रेस शरद पवार गटाचे नागपूर जिल्हाध्यक्ष प्रवीण कुंटे पाटील यांनी माध्यमांशी बोलताना निवडणूक आयोग आणि भाजप यांच्यातील साटेलोट्याचा गंभीर आरोप केला आहे.
शिवसेना ठाकरे पक्षाचे पक्षप्रमुख उद्धव ठाकरे हे सध्या मराठवाडा विभागाच्या दगाबाज रे संवाद दौऱ्यावर आहेत. या दौऱ्यादरम्यान आज उद्धव ठाकरेंनी बीड जिल्ह्यातील पाली गावात शेतकऱ्यांशी संवाद साधला. यावेळी त्यांनी केवळ दुष्काळग्रस्त शेतकऱ्यांशी संवाद साधत राज्य सरकारच्या महत्त्वाकांक्षी लाडकी बहीण योजनेवरही तीव्र टीका केली. यावेळी उद्धव ठाकरेंनी सरकारवर घराघरात भांडण लावण्याचा गंभीर आरोप केला. उद्धव ठाकरेंनी पाली गावातील शेतकरी महिलांना लाडकी बहीण योजेनेवर प्रश्न विचारले. या सभेला उपस्थित असलेल्या महिलांना थेट प्रश्न विचारत त्यांनी टीकेला सुरुवात केली. इथे अनेक महिला आल्या आहेत.
उद्धव ठाकरे आज मराठवाडा दौऱ्यावर असून त्यांनी बीड जिल्ह्यातील पाली गावात शेतकऱ्यांशी संवाद साधला. यावेळी शेतकऱ्यांनी आपल्या अडचणी आणि व्यथा उद्धव ठाकरेंसमोर मांडल्या. त्यांनी सांगितले की, सरकारने दिलेली मदत अपुरी आहे आणि कर्जमुक्ती तात्काळ मिळाली पाहिजे. तसेच सरकारने दिलेली आश्वासने पाळलेली नाहीत, अशीही शेतकऱ्यांची तक्रार आहे. उद्धव ठाकरे यांनी शेतकऱ्यांच्या समस्या लक्षपूर्वक ऐकून घेतल्या आणि त्यांच्या प्रश्नांवर तोडगा काढण्यासाठी प्रयत्न करण्याचे आश्वासन दिले.
राहुल गांधी यांनी आरोप केले की, हरियाणात जे घडले तेच आता बिहारमध्येही होणार आहे. बिहारमधील मतदार यादीत मोठी गडबड झाली असून अनेकांचे नावे यादीतून काढून टाकण्यात आली आहेत. त्यांनी पत्रकार परिषदेत काही मतदारांना मंचावर बोलावून दाखवले की त्यांच्या संपूर्ण कुटुंबाची नावेच मतदार यादीतून गायब आहेत.
राहुल गांधी म्हणाले की ही ब्राझीलची महिला हरियाणाच्या मतदार यादीत कशी आली? त्यांच्या म्हणण्यानुसार, हरियाणात पाच प्रकारात तब्बल 25 लाख बनावट मतं आढळली असून 5 लाखांहून अधिक डुप्लीकेट मतदार आहेत. राज्यात एकूण दोन कोटी मतदार असून प्रत्येक आठव्या मतदारात एक मतदार फेक असल्याचा दावा राहुल गांधींनी केला. यामुळे काँग्रेसचा पराभव झाल्याचे ते म्हणाले.
राहुल गांधी यांनी पत्रकार परिषदेत एक युवतीचा फोटो दाखवत मोठा आरोप केला आहे. त्यांनी सांगितले की या युवतीने वेगवेगळ्या नावांनी कधी सीमा, कधी सरस्वती अशा 22 ठिकाणी मतदान केले आहे.
काँग्रेसचे माजी अध्यक्ष आणि लोकसभेतील विरोधी पक्षनेते राहुल गांधी यांनी नवी दिल्लीतील इंदिरा भवन येथे "एच फाइल्स" या शीर्षकाखाली पत्रकार परिषद घेत आहेत. या वेळी त्यांनी निवडणुकीत मोठ्या प्रमाणात मतचोरी झाल्याचा गंभीर आरोप केला. बिहारमधील १२१ विधानसभा जागांसाठी पहिल्या टप्प्यातील मतदान काही दिवसांवर आले असताना ही पत्रकार परिषद घेण्यात येत आहे. काँग्रेसने त्यांच्या अधिकृत एक्स हँडलवर या पत्रकार परिषदेचे वर्णन “हायड्रोजन बॉम्ब लोडिंग” असे केले होते. राहुल गांधी म्हणाले की, लोकशाही वाचवण्यासाठी देशातील सर्व विरोधी पक्षांनी एकत्र येणे गरजेचे आहे.
स्थानिक निवडणुकीत सिंधुदुर्गात भाजपने एकला चलो रे चा नारा दिला आहे. सिंधुदुर्गात शिवसेनेसोबत युती नको स्वबळावरच लढूया, असा आग्रह भारतीय जनता पक्षाच्या कार्यकर्त्यांनी धरला आहे. सावंतवाडी येथे आज प्रदेशाध्यक्ष रवींद्र चव्हाण यांच्या प्रमुख उपस्थितीत भाजपची बैठक होणार आहे.
देश पातळीवर 1 डिसेंबरपासून व्याघ्रगणना सुरु होत आहे. तीन टप्प्यांमध्ये ही व्याघ्रगणना होणार आहे. जागतिक व्याघ्रदिनाच्या दिवशी 26 जुलै 2026रोजी ही व्याघ्रगणना जाहीर करण्यात येणार आहे.. यंदा वाघांची संख्या मोजण्यासाठी आधुनिक तंत्रज्ञानाचा वापर केला जाणार आहे.
उद्धव ठाकरे यांना स्थानिक निवडणुका पुढे ढकलायच्या आहेत, त्यांना टोमणे मारण्याशिवाय काय येते, विकासावर त्यांचे एक भाषण दाखवा, एक हजार रुपये मिळवा, असे आवाहन फडणवीस यांनी केले.
मराठवाड्यानं सर्वात मोठा पावसाचे संकट अनुभवले आहे. मी मुख्यमंत्री असताना शेतकऱ्यांना मदत केली होती. आता हे सरकार कशाचा अभ्यास करणार आहे, असा सवाल उद्धव ठाकरे यांनी उपस्थित केला. सरकारचं पॅकेज ही थट्टा आहे, असे ठाकरे म्हणाले. संकट आले असताना आपले मुख्यमंत्री देवेंद्र फडणवीस हे बिहार दौऱ्यावर आहेत, असे ठाकरे म्हणाले.
बिहार विधासभा निवडणुकीच्या पहिला टप्याच्या प्रचाराच्या तोफा आज थंडावणार आहेत. पहिल्या टप्यात १२१ जागांसाठी निवडणूक होणार आहे.
मनसेसोबत आगामी स्थानिक स्वराज संस्था निवडणुकीत युती करण्यास काँग्रेस नेत्यांची विरोध असल्याचे समोर आले आहे. काँग्रेसचे प्रदेशाध्यक्ष हर्षवर्धन सपकाळ हे मनसेसोबत युती करण्यास अनुकूल नसल्याचे सांगितले जात आहे.
माजी जिल्हा परिषद सदस्य अतुल देशमुख यांनी राष्ट्रवादी काँग्रेस शरदचंद्र पवार पक्षाला रामराम केला आहे. उपमुख्यमंत्री एकनाथ शिंदे यांच्या शिवसेनेत ते प्रवेश करणार आहे. हा पक्षप्रवेश सोहळा गुरुवारी (६ नोव्हेंबर) चाकण येथे होणार आहे.
भारताच्या प्रसिद्ध फिल्म निर्मात्या मीरा नायर आणि युगांडतील भारतीय वंशाचे लेखक महमूद ममदानी यांचे पुत्र जोहरान महमूद हे अमेरिकेतील न्यूयाॅर्क शहराचे महापौर म्हणून विजयी झाले आहेत.
आगामी बिहार विधानसभा निवडणुकीत एनडीचे पुन्हा सरकार येईल, असा अंदाज 'पोल ऑफ पोल्स'ने वर्तवला आहे. एनडीएला 143, महागठबंधनला 95 जागा मिळण्याचा अंदाज त्यांनी वर्तवला आहे. तसेच भाजप सर्वात मोठा पक्ष ठरणार असल्याचा अंदाज देखील वर्तवण्यात आला आहे.
विधानपरिषदेच्या उपसभापती डॉ. नीलम गोऱ्हे यांच्या “दाही दिशा' या पुस्तकाचे प्रकाशन उपमुख्यमंत्री एकनाथ शिंदे यांच्या हस्ते झाले. या वेळी बोलातना नीलम गोऱ्हे म्हणाल्या, एकनाथ शिंदेसाहेब हे महिलांच्या मनातील मुख्यमंत्री आहेत. आतापर्यंत मी 29 पुस्तके गेल्या 30 वर्षांत लिहिलेली आहेत. महिला धोरणे जी वेगवेगळी झाली, त्याचबरोबर स्त्रियांच्या अत्याचाराच्या विरोधात प्रतिबंध करण्यासाठी काय करता येईल, याची यशस्वी झालेली उदाहरणे या पुस्तकामध्ये लिहिलेली आहेत.
मुलांना डांबून ठेवून माजी मंत्र्यांशी बोलण्याचा आग्रह धरणाऱ्या रोहित आर्य एन्काऊंटर प्रकरणात मोठी अपडेट समोर आली आहे. एन्काऊंटर प्रकरणी मानवाधिकार आयोगाकडून चौकशीचे आदेश दिले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.