MP Ajit Gopchade News : लग्नाळूंची फसवणूक रोखा ; विवाह नोंदणी वेबसाईटवर नियंत्रण आणा! अजित गोपछडे यांची मागणी

BJP News : भाजपचे राज्यसभेतील खासदार डॉ. अजित गोपछडे यांनी एका वेगळ्याच सामाजिक विषयाला हात घातला. विवाह इच्छूकांच्या नोंदणी करणाऱ्या वेबसाईटचा सुळसुळाट झाल्याने फसवणूकीचे प्रमाण वाढले आहे. ते रोखण्यासाठी अशा वेबसाईटवर नियंत्रण आणण्याची मागणी गोपछडे यांनी राज्यसभेत केली. देशभरात वेगवेगळ्या विवाह नोंदणी वेबसाईटच्या माध्यमातून अविवाहित, परीतक्त्या, विधवा व विधुर अशा विवाह इच्छुक नागरिकांची मोठ्या प्रमाणात फसवणूक केली जाते.

या विषयाकडे गोपछडे यांनी सभागृहाचे लक्ष वेधले. विवाह इच्छुकांच्या फसवणूक प्रकाराला आळा घालण्यासाठी केंद्र सरकारने अशा वेबसाईटवर नियंत्रण आणावे, अशी मागणी डॉ. अजित गोपछडे यांनी केली आहे. (Marriage) देशभरात वेगवेगळ्या भाषांमध्ये आणि विविध नावांनी चालणाऱ्या विवाह नोंदणी वेबसाईटद्वारे अमिष दाखवून, विश्वास संपादन करून नागरिकांची लूट केली जाते.

यामध्ये नात्याच्या नावाखाली फसवणूक, खोटी माहिती, आणि काही प्रकरणांमध्ये लैंगिक शोषणासारख्या गंभीर गुन्ह्यांची नोंद होत आहे. (BJP) छत्तीसगडमधील बिलासपूर येथील एका व्यक्तीने सहा बनावट वेबसाईट तयार करून तब्बल पाचशे लोकांची फसवणूक केल्याचा धक्कादायक प्रकार नुकताच समोर आला आहे.

याचप्रमाणे पुणे शहरात एका महिलेला जम्मू-काश्मीरमधील एका व्यक्तीने विवाहाच्या अमिषाने फसवून लैंगिक शोषण केल्याचा गुन्हा दाखल करण्यात आला आहे. मद्रास उच्च न्यायालयाने देखील अलीकडेच अनियंत्रित विवाह नोंदणी वेबसाईटबाबत चिंता व्यक्त केली असून, या क्षेत्रासाठी स्वतंत्र नियमावली तयार करण्याचे निर्देश दिले आहेत.

अशा वेबसाईटवर काटेकोर नियंत्रण ठेवणारे कायदे तयार करावेत, नियमावली लागू करावी आणि दोषींवर कठोर कारवाई करण्यात यावी, जेणेकरून कोणत्याही नागरिकाची फसवणूक होणार नाही. अनेकांचे संसार उध्वस्त करणाऱ्या या ऑनलाइन फसवणुकीवर केंद्र सरकारने तातडीने लक्ष घालून कठोर पावले उचलावीत, अशी अपेक्षा आता सर्वसामान्य नागरिक व्यक्त करत असल्याचे गोपछडे यांनी सभागृहात सांगीतले.