Ashok Chavan News : 'काँग्रेससह विरोधकांना कोणत्याच निवडणुकीत यापुढे निवडून देऊ नका..'अशोक चव्हाणांनी टाकली महिलांवर जबाबदारी

Nanded News : महिलांना 14 टक्के राजकीय आरक्षण मिळायला 67 वर्ष लागली. केंद्रातील मोदी सरकारने पन्नास टक्के आरक्षण देण्यासाठी संसदेत बील आणले. पण काँग्रेससह सगळ्या विरोधी पक्षांनी ते मंजूर होऊ दिले नाही. दोन तृतीयांश बहुमत नसताना सरकारने हे बिल आणले, कारण महिलांना राजकारणात पन्नास टक्के आरक्षण मिळणार होते, त्यामुळे विरोधक या बिलाला साथ देतील, असा आम्हाला विश्वास होता. पण त्यांनी हे बिल रोखून देशातील महिलांवर अन्याय केला, अशी टीका खासदार अशोक चव्हाण यांनी केली.

नांदेडमध्ये भाजपच्या एका कार्यक्रमात राज्यसभा खासदार अशोक चव्हाण यावेळी म्हणाले, काँग्रेस व इतर विरोधी पक्ष यांना जिल्हा परिषद असो की अन्य कोणतीही निवडणूक, यापुढे ते निवडून येणार नाही, याची जबाबदारी आता महिलांनीच घ्यावी, असे आवाहनही त्यांनी केले.

काँग्रेस पक्ष आणि अन्य विरोधकांमुळेच आज देशातील महिला राजकीय आरक्षणापासून वंचित राहिल्या आहेत. या बीलाच्या विरोधात काँग्रेसने उलटसुलट बोंबा मारल्या. दक्षिणेतील लोकसभेच्या जागा कमी होणार, असे सांगत त्यांनी खोटी माहिती सांगितल्याचा आरोपही चव्हाण यांनी केला.

प्रत्यक्षात देशाचे गृहमंत्री अमित शाह यांनी कुठल्याही राज्यातील जागा कमी होणार नाही, सरसकट सगळ्या राज्यांमध्ये पन्नास टक्के जागा वाढवून देण्याचे आश्वासन संसदेत दिले होते. पण महिलांना आरक्षण मिळू नये, त्यांना राजकारणात प्रतिनिधित्व करता येऊ नये, यासाठी काँग्रेससह विरोधकांनी महिला आरक्षण बिल पास होऊ दिले नाही. ते पास झाले असते तर लोकसभेत 272 महिला खासदार झाल्या असत्या.

आता ज्या पक्षांनी महिलांच्या आरक्षणाला विरोध केला, बिलाच्या विरोधात मतदान केले, त्यांना निवडणुकीत पाडण्याची जबाबदारी माझ्या महिला भगिनींनी घेतली पाहिजे. कोणतीही निवडणुक असो, जिल्हा परिषद, विधानसभा, लोकसभा तिथे काँग्रेससह विरोधकांचा पराभव करा, असे आवाहन अशोक चव्हाण यांनी केले.