Chandrakant Khaire News : सोमय्या ईडीचा दलाल, त्याला कमिशन मिळते ; खैरेंचा दावा..

Jalna : ठाकरे गटाचे नेते चंद्रकांत खैरे यांनी भाजपच्या किरीट सोमय्या यांच्यावर गंभील आरोप केला आहे. सोमय्या (Kirit Somaiya) हे ईडीचे दलाल असून त्यांना ईडीच्या पैशातून कमीशन मिळत असल्याचा दावा खैरे यांनी केला आहे. जालना येथे प्रसार माध्यमांशी बोलतांना खैरे यांनी सोमय्या यांच्यावर अनेक आरोप केले आहेत.

राज्यात सध्या ईडीच्या कारवायांवरून वातावरण तापले आहे. विशेष म्हणजे या सगळ्या प्रकरणांमध्ये भाजपच्या किरीट सोमय्यांचे नाव सातत्याने पुढे येते. (Shivsena) ठाकरे गटाचे नेते अनिल परब यांच्या रिसाॅर्ट व आता राष्ट्रवादीचे नेते हसन मुश्रीफ यांच्यावर टाकलेली ईडीची धाड या सगळ्यांमध्ये सोमय्या यांचे कनेक्शन समोर आले आहे. या पार्श्वभूमीवर खैरे (Chandarakant Khaire) यांनी हे आरोप केले आहेत.

खैरे म्हणाले, किरीट सोमय्या ईडीचा दलाल आहे, त्याला ईडीच्या पैशातून मिळते. इन्कम टॅक्सला ज्या खबऱ्याने माहिती दिली, त्या खबऱ्याला त्यांना काहीतरी द्यावे लागत असते, तेच काम सोमय्या देखील करतो. ईडीच्या कारवाईबाबत आधीच या भाजपच्या माणसाला कसे काय कळते? की, उद्या अमूक एखाद्या नेत्यावर धाड पडणार आहे.

त्यामुळे काहीतरी मिलीभगत करून भाजप विरोधकांना त्रास देत आहे. या सगळ्या मागे किरीट सोमय्या हेच असून त्यांची स्वतःची अनेक लफडी आहे. तेव्हा सरकार येतात जातात हे त्यांनी ध्यानात ठेवावे. पुढे यांचे काय होते ते दिसेलच, असा इशारा देखील खैरे यांनी यावेळी दिला.

खैरेंनी याआधी देखील सोमय्या यांच्यावर अनेक आरोप केले आहेत. तसेच ते सोमय्या यांचा उल्लेख शक्तीकपूर असा करतात. खैरे यांनी शिवसेना हे नाव आणि धनुष्यबाण चिन्ह शिंदे गटाला गेले, तेव्हा देखील निवडणूक आयोगावर गंभीर आरोप केले होते.