Devendra Fadnavis On Babanrao Lonikar : मोदीजी स्वतःला प्रधान सेवक सांगतात, आम्हीही सेवकच मालक होता येणार नाही! लोणीकरांना समज देणार!

Maharashtra Political News : भाजपाचे आमदार बबनराव लोणीकर यांनी केलेल्या वादग्रस्त विधानानंतर राज्यभरातून त्यांच्यावर टीकेची झोड उठली आहे. लोणीकरांनी शेतकरी आणि सर्वसामान्य जनतेची माफी मागावी, त्यांना रस्त्यावर फिरू देऊ नका, अशा प्रकारचा संताप समाज माध्यमांवरून व्यक्त केला जात आहे. अखेर मुख्यमंत्री देवेंद्र फडणवीस यांनी बबनराव लोणीकर यांनी केलेल्या वादग्रस्त विधानाची दखल घेत त्यांचे वक्तव्य पूर्णपणे चुकीचे असून त्यांना समज देण्यात येईल, असे म्हटले आहे.

देशाचे प्रधानमंत्री ज्यावेळेस सांगतात की, मी प्रधान सेवक आहे आणि आम्ही सर्व जण जनतेचे सेवक आहोत. तर आम्हाला मालक बनता येणार नाही, अशा शब्दात मुख्यमंत्र्यांनी लोणीकरांची (Babanrao Lonikar) कानउघाडणी केली आहे. काल परतूर येथील एका कार्यक्रमात बोलताना बबनराव लोणीकर यांनी सोशल मीडियावर सरकार आणि स्वतःच्या विरोधात टीका करणाऱ्या तरुणांविषयी संताप व्यक्त केला होता.

कुचरवट्यावर बसलेली काही रिकामटेकडी कार्टी सोशल मीडियावर पंतप्रधान नरेंद्र मोदी आणि मुख्यमंत्री देवेंद्र फडणवीस (Devendra Fadnavis) यांना अंधभक्त म्हणतात. हीच कार्टी कूचरवट्यावर बसून चर्चा करत असतात पण त्यांच्यापैकी काहींच्या आईचा पगार व बापाचे पेन्शन बबनराव लोणकर यांनीच दिलं आहे. नरेंद्र मोदींनी तुझ्या बापाला पेरणीसाठी सहा हजार रुपये दिले, असे वादग्रस्त वक्तव्य लोणीकर यांनी केले. यानंतर राज्यभरातील विविध पक्षाचे नेते लोणीकर यांच्यावर तुटून पडले आहेत.

या संदर्भात मुख्यमंत्री देवेंद्र फडणवीस यांना विचारण्यात आले, तेव्हा बबनराव लोणीकरांचं विधान हे पूर्णपणे चुकीचं आहे. त्यांनी जरी काही लोकांना उद्देशून असं वक्तव्य केलं असलं तरीही अशा प्रकारचं विधान करायचा कुणालाही अधिकार नाही. देशाचे प्रधानमंत्री ज्यावेळेस सांगतात की, मी प्रधान सेवक आहे आणि आम्ही सर्व जण जनतेचे सेवक आहोत. तर आम्हाला मालक बनता येणार नाही. त्यामुळे बबनराव लोणीकरांचे जे वक्तव्य आहे ते पूर्णपणे चुकीचे असून अशा प्रकारचे वक्तव्य योग्य नाही. याची समज बबनराव लोणीकर यांना देण्यात येईल, असे स्पष्ट केले.

लोणीकर म्हणाले, आमचेच पैसे घेतो अन् ..

ते कुचकळवाट्यावर बसलेले पाच-सहा कारटे, त्याच्या मायचा पगार बबनराव लोणीकरने केला. त्याच्या बापाला पेरणीसाठी सहा हजार पंतप्रधान मोदी यांनी दिले. तुझ्या मायच्या, तुझ्या बहिणीच्या व बायकोच्या नावावर लाडकी बहीण योजनेचे पैसे आले. तुझ्या अंगावरचे कपडे आमच्या सरकारने दिले आहेत. तुझ्या पायातील बूट अथवा चप्पल आमच्यामुळेच आहेत. तुझ्या हातातलं डबडं, तो देखील आमच्यामुळेच आहे. आमचेच पैसे घेतो आणि आमच्याच तंगड्या वर करतो. आमचंच घेतो आणि आम्हालाच बोलतो का? आमचं घेऊन आमच्याबद्दल लिहितोस का?", असं वादग्रस्त वक्तव्य त्यांनी केले होते.