मेळाव्याला परवानगी नाकारली, मुस्कान खानलाही शहरात येण्यास बंदी ; वंचित कोर्टात..

औरंगाबाद : वंचित बहुजन आघाडीच्या वतीने अॅड. प्रकाश आंबेडकर यांच्या उपस्थितीत होणाऱ्या आजच्या मेळाव्याला पोलिसांनी परवानगी नाकारली आहे. (Vanchit Bahujan Aghadi) तसेच या मेळाव्यात सत्कारासाठी उपस्थीत राहणाऱ्या हिजाब प्रकरणातील तरुणी मुस्कान खान हिला देखील शहरात येण्यास बंदी घालण्यात आल्याची नोटीस पोलिसांनी बजावली. (Aurangabad) त्यामुळे वंचितचा मेळावा रद्द झाला आहे. (Marathwada)

दरम्यान, पोलिसांनी ऐनवेळी परवानगी नाकारल्यानंतर वंचितने औरंगाबाद खंडपीठात धाव घेतली, परंतु या प्रकरणाची सुनावणी २१ मार्च रोजी ठेवण्यात आल्याने तुर्तास वंचितचा मेळावा आणि मुस्कानचा सत्कार कार्यक्रम रद्द झाला आहे. या पार्श्वभूमीवर वंचितचे सर्वेसर्वा प्रकाश आंबेडकर हे पत्रकार परिषद घेऊन आपली भूमिका मांडणार आहेत.

कर्नाटकातील हिजाब प्रकरणातील मुस्कान खान हिचा वंचित बहुजन आघाडीच्या वतीने आज शहरातील आमखास मैदानातील जाहीर मेळाव्यात सत्कार करण्यात येणार होता. भाजपने सुरुवातीपासूनच या कार्यक्रमाला विरोध दर्शवत रस्त्यावर उतरण्याचा इशारा दिला होता. या कार्यक्रमामुळे कायदा व सुव्यवस्थेचा प्रश्न निर्माण होऊ शकतो हे कारण देत पोलिसांनी या मेळाव्याला काल रात्री परवानगी नाकारली.

पोलिस राजकीय हेतूने परवानगी नाकारत आहेत, असा आरोप आयोजकांनी करत पोलिसांच्या निर्णयाविरोधात थेट कोर्टात धाव घेतली. मुंबईच उच्च न्यायलायाच्या औरंगाबाद खंडपीठात वंचितची याचिका दाखल करून घेण्यात आली असून त्यावर २१ मार्च रोजी सुनावणी होणार आहे. दरम्यान, या मेळाव्यासाठी प्रकाश आंबेडकर हे औरंगाबादेत दाखल झाले होते. या संपुर्ण घटनाक्रम व पोलिसांनी नाकारलेल्या परवानगीवर ते पत्रकार परिषद घेऊन सविस्तर भूमिका मांडणार आहेत.