Manoj Jarange News : मुंडेंच्या परळीत धडाडणार जरांगे पाटलांची तोफ; घोंगडी बैठकीत काय बोलणार ?

Beed News : आगामी काळात होत असलेल्या विधानसभा निवडणुकीच्या पार्श्वभूमीवर सर्वच पक्षांमध्ये लगीनघाई सुरु आहे. महायुती व महाविकास आघाडीचे जागावाटप सुरु झाले आहे. त्यामुळे सर्वांचे त्याकडे लक्ष लागले आहे.

विधानसभा निवडणुकीसाठी मतदारसंघ कोणाला सुटणार यावरून उत्सुकता ताणली गेली असतानाच मराठा आरक्षण (Maratha Reservation) आंदोलक मनोज जरांगे पाटील यांच्या उपस्थितीत रविवारी मुंडेंच्या परळीत घोंगडी बैठकीचे आयोजन करण्यात आले आहे. या निमित्ताने परळीत जरांगे पाटलांची तोफ धडाडणार आहे. परळी मतदारसंघ मंत्री धनंजय मुंडे, माजी मंत्री पंकजा मुंडे यांचा गड मानला जातो. त्यामुळे यावेळी ते काय बोलणार याकडे सर्वांचे लक्ष लागले आहे. (Manoj Jarange News)

मनोज जरांगे पाटील (Manoj Jaranage) यांच्या उपस्थितीत रविवारी मुंडेंच्या परळीत घोंगडी बैठकीचे आयोजन करण्यात आले आहे. सकाळी 11 नंतर शहरातील हलगी गार्डन येथे ही घोंगडी बैठक होणार असून या बैठकीतून जरांगे पाटील काय बोलणार ? याकडे मराठा बांधवांचे लक्ष लागले आहे.

दरम्यान, या घोंगडी बैठकीच्या पार्श्वभूमीवर परळी शहरात मोठमोठे होर्डिंग देखील उभारण्यात आले असून सर्वत्र भगवे ध्वज लावण्यात आले आहेत. जरांगे पाटील यांची गेवराई, तेलगाव येथे यापूर्वी घोंगडी बैठक झाली असून यानंतर आता परळी येथे होणाऱ्या या बैठकीकडे सर्वांचे लक्ष लागले आहे.

दरम्यान, गेल्या काही दिवसापासून मनोज जरांगे पाटील यांनी आगामी विधानसभा निवडणुका डोळ्यासमोर ठेऊन रणनीती आखण्यावर भर दिला आहे. त्यासाठी विधानसभा निवडणुकीची रणनिती ठरविण्यासाठी सप्टेंबर महिन्यात जिल्ह्यातील सर्वच सहाही मतदारसंघांत घोंगडी बैठकांचे आयोजन केले आहे. या बैठकांच्या निमंत्रणासाठी मराठा सेवक गावोगाव पिंजून काढत असून या दौऱ्यांना मोठा प्रतिसाद मिळत आहे.

विशेष म्हणजे महिलांचीही उपस्थिती लक्षणीय दिसत आहे. आगामी विधानसभा निवडणुकीत मराठा आरक्षणाला विरोध करणाऱ्या उमेदवारांचा करेक्ट कार्यक्रम करण्यासाठी आता जरांगे पाटलांचा मास्टर प्लॅन ठरला आहे. त्यानुसार रणनीती आखली जात आहे.