Market Committee Election : बाजार समिती निवडणुकीत भुमरे, बागडे, बंब यांचा लागणार कस..

Chhatrapati Sambhajinagar : राजकीय पक्ष आणि त्यांच्या नेते, पदाधिकारी, कार्यकर्त्यांचे डोळे लागून असलेल्या कृषी उत्पन्न बाजार समितीच्या (Market Committee) निवडणूकीचा बिगुल अखेर वाजला आहे. प्रशासक राज संपवून बाजर समित्यांचा कारभार आपल्या हाती घेण्यासाठी उत्सूक असणाऱ्या जिल्ह्यातील सर्वच राजकीय पक्षांचा कस या निमित्ताने लागणार आहे.

विधानसभा मतदारसंघ तसेच जिल्ह्यातील राजकारणात बाजार समित्यांना आर्थिक दुष्ट्या अतिशय महत्व असते. (Haribhau Bagde) अनेक नव्यानेच राजकारणात दाखल झालेल्यांचे राजकारण हे या समित्यांच्या माधमातूनच फुलत असते. (Marathwada) कोरोनामुळे लांबणीवर पडलेल्या जिल्ह्यातील छत्रपती संभाजीनगर, गंगापूर, लासूर स्टेशन, पैठण, फुलंब्री, वैजापूर, कन्नड या सात बाजार समितीच्या निवडणूकीचा कार्यक्रम जाहिर झाला आहे.

त्यानूसार २८ एप्रिलला प्रत्यक्ष मतदान होणार आहे. २७ मार्चपासून नामनिर्देशनपत्र दाखल करण्याची प्रक्रिया सुरु होणार आहे. या संदर्भात मतदारांची अंतीम यादीही प्रसिध्द करण्यात आली असल्याची माहिती जिल्हा उपनिबंधक मुकेश बारहाते यांनी बुधवारी (ता.२२) दिली. स्थानिक राजकारणात महत्वाची भुमिका बजावणारी आणि शेतकऱ्यांशी थेट जोडणारी संस्था म्हणजे बाजार समिती.

या समित्या ताब्यात असणाऱ्या नेत्यांसाठी जिल्हा परिषद व इतर स्थानिक स्वराज संस्थामधील निवडणुका सोप्या होतात. त्यामुळे अगदी मंत्री देखील या निवडणुकांमध्ये जातीने लक्ष घालतात. नऊ महिन्यांपुर्वी राज्यात सत्तांतर झाले आणि जिल्ह्याला तीन मंत्री मिळाले. त्यामुळे यंदाच्या निवडणुका अधिक चुरशीच्या होण्याची शक्यता आहे. जिल्ह्यातील सात बाजार समितीपैकी सर्वांचे लक्ष हे छत्रपती संभाजीनगर, गंगापुर, लासूर, फुलंब्री बाजार समितीवर आहे. या ठिकणी मोठी टक्कर पाहायला मिळणार आहे.

जिल्ह्यातील प्रमुख असलेली छत्रपती संभाजीनगरची बाजार समिती ताब्यात घेण्यासाठी आमदार हरिभाऊ बागडे यांच्या नेतुत्वाखाली तयारी सुरु आहे. दुसरीकडे माजी आमदार,काँग्रेसचे जिल्हाध्यक्ष डॉ.कल्याण काळे यांनीही त्यांना शह देण्यासाठी जोरदार फिल्डींग लावली आहे. कोरोनानंतर अनेक बाजार समित्यांवर अशासकीय प्रशासक नेमेले होते, तर काही बाजार समित्यांच्या संचालकांना मुदतवाढ देण्यात आली होती.

नव्याने निवडणूक झालेल्यांना ग्रामपंचायत सदस्य तसेच विविध कार्यकारी सोसायट्यांच्या सभासदांची नावेही अंतिम यादीत समाविष्ट करण्यात आली आहेत. २७ मार्चपासून नामनिर्देशनपत्र दाखल करण्यास सुरुवात होणार आहे. अंतिम यादी प्रसिध्द करण्यात आली आहे. त्याची तपासणी मतदारांनी करावी, असे आवाहन जिल्हा उपनिबंधक मुकेश बारहाते यांनी केले आहे.