Latur Congress News : भाजपाचे आमदार रमेश कराड यांनी लातूरमध्ये काल झालेल्या दिवंगत लोकनेते गोपीनाथ मुंडे यांच्या स्मारक अनावरण कार्यक्रमात भाषण केले. यात त्यांनी लातूर ग्रामीण या आपल्याच मतदारसंघाचा उल्लेख पाकिस्तानात तिरंगा झेंडा लावण्यासारखा असल्याचे वक्तव्य केले. यातून त्यांनी काँग्रेसचे माजी आमदार धीरज देशमुख यांच्यावर निशाणा साधला. याचे तीव्र पडसाद लातूरमध्ये उमटताना दिसत आहेत. धीरज देशमुख यांनी कराड यांचे विधान अशोभनीय असल्याचे म्हणत त्यांनी जनतेची माफी मागावी, अशी मागणी केली आहे.
धीरज देशमुख (Dhiraj Deshmukh) यांनी या संदर्भात संतप्त प्रतिक्रिया समाज माध्यमातून व्यक्त केली. लातूर ग्रामीण मतदारसंघाला पाकिस्तान संबोधने, हे अशोभनीय आहे. या वक्तव्याचा मी निषेध करतो. हे वक्तव्य लातूर ग्रामीणच नव्हे तर सबंध महाराष्ट्राला न आवडणारे आहे. त्यामुळे लातूर ग्रामीणच्या आमदारांनी तातडीने जनतेची माफी मागावी.
लातूर (Latur) ग्रामीणवर आदरणीय विलासराव देशमुख साहेब आणि आदरणीय गोपीनाथ मुंडे साहेब यांचा विशेष जिव्हाळा होता. इथल्या जनतेवर विशेष प्रेम होते. त्यांच्या मैत्रीला उजाळा देणाऱ्या कार्यक्रमातच लातूर ग्रामीणच्या आमदारांनी ही मुक्ताफळे उधळली आहेत, असे म्हणत धीरज देशमुख यांनी संताप व्यक्त केला आहे.
काय म्हणाले होते कराड?
आमदार रमेशअप्पा कराड यांनी आपल्या प्रास्ताविकात त्यांनी लातूर ग्रामीण मतदारसंघात निवडून येतांना काँग्रेसकडून आपल्याला कसा त्रास दिला गेला, याचा पाढा मुख्यमंत्र्यांसमोर वाचला. माझा लातूर ग्रामीण मतदारसंघ म्हणजे पाकिस्तानात भारताचा तिरंगा झेंडा लावण्यासारखा असल्याचे खळबळजनक विधान त्यांनी केले. आम्हाला सतरंज्या मिळत नव्हत्या, सभेला लोक येत नव्हते, आम्हाला रामराम करणाऱ्यांचा ऊस वाळवला जात होता, असा आरोप करत कराड यांनी अप्रत्यक्षरित्या धीरज, अमित देशमुख या भावांवर तोफ डागली होती.
मुंडेसाहेब गेले तेव्हापासून माझ्या रेणापूरमध्ये एक मुरूमाचं टोपलं देखील या काँग्रेसवाल्यांनी टाकलं नाही. अतिशय दयनीय अवस्था आमच्या ग्रामीण रस्त्यांची आहे. एमआयडीसी, उपजिल्हा रुग्णालय, पंचायत समिती, तहसिल, कोर्ट कार्यालयांची दुरावस्था आहे, त्यासाठी नवी इमारत होणे आवश्यक आहे. आपल्या खात्यांतर्गत पोलीस स्टेशनसाठी वसाहत याला मंजूरी द्यावी, अशी मागणी कराड यांनी केली होती.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.