Nilanga Election : 'निलंगेकर आहोत आम्ही, अन् ही निलंग्याची माती आहे... आमचा नाद करायचा नाही...'; संभाजीराव पाटलांनी डिवचलं

Nilanga Election News : आम्ही निलंगेकर आहोत आमचा नाद बाभळगावकरांनी करायचा नाही... निलंगा ची माती आहे येर्या..गबाळ्याचे काम नाही निलंगा नगरपरिषदेवर भाजपचा झेंडा फडकवणार हे निश्चित आहे परंतु लातूर महानगरपालिकेवर सुद्धा महायुतीचा झेंडा फडकणारच, असा इशारा माजी मंत्री आमदार संभाजीराव पाटील निलंगेकर यांनी माजी मंत्री अमित देशमुख यांना दिला.

संभाजी पाटील निलंगेकर व अमित देशमुख यांच्यात गेल्या अनेक काळापासून वेगवेगळी पद्धतीची जुगलबंदी चालत असते त्यातच सध्या नगरपालिका निवडणुकीचे वातावरण ढवळून निघाले असून प्रचाराचा अंतिम टप्पा सुरू झाला आहे. सर्वच पक्षांकडून जाहीर सभा आयोजित केल्या जात आहेत. निलंगा आमचा स्वाभिमान आहे ही माती निलंग्याची आहे आणि या मातीमध्ये बाबळगाव चे देशमुख येऊन आपला झेंडा रोवण्याचा प्रयत्न करत असेल तर ते कदापी होऊ देणार नाही. असे अनेक वेळा माजी मंत्री आमदार संभाजीराव पाटील निलंगेकर यांनी ठणकावून सांगितले आहे.

निलंगा येथे भाजपा उमेदवाराच्या निवडणुकीच्या प्रचारात जाहीर सभेचे आयोजन करण्यात आले होते. यावेळी माजी आमदार गोविंद केंद्रे, अल्पसंख्यांक मोर्चाचे प्रदेशाध्यक्ष इदरीस मुलतानी, प्रदेश सचिव अरविंद पाटील निलंगेकर, पॅनल प्रमुख बाळासाहेब शिंगाडे या सह सर्व उमेदवार उपस्थित होते.

यावर संभाजीराव पाटील निलंगेकर म्हणाले की आम्ही विकासाला महत्त्व देतो निलंगा शहरांमध्ये कोट्यावधी रुपयाची विकास कामे झाले आहेत, तरीपण विरोधकाकडून विकास झाला नाही म्हणून चुकीचा अपप्रचार केला जात आहे. अशा प्रवृत्तीच्या लोकांकडे आम्ही लक्ष देत नाही आमचं ध्येय या निलंगा शहराचा सर्वांगीण विकास कसा होईल हेच आहे. त्यामुळे 'हत्ती चले अपने चाल' 'कुत्ते भोके हजार.... अशी उपरोधिक टिकाही त्यांनी केली.

देशमुख हे मंत्री असताना निलंगा शहराच्या विकासासाठी एक खडकूही दिली नाही. विकास निधी न देणाऱ्यांना निलंगाच्या राजकारणावर बोलण्याचा नैतिक अधिकार नाही. असे त्यांनी यावेळी सांगितले. अल्पसंख्यांक मोर्चाचे प्रदेश अध्यक्ष इदरीस मुलतानी म्हणाले की भारतीय जनता पार्टीने मुस्लिम समाजासाठी अनेक योजना जाहीर केलेल्या आहेत. त्यामुळे काँग्रेसकडूनच मुस्लिम समाजामध्ये द्वेष, संभ्रम निर्माण केला जात आहे. त्यामुळे गेल्या अनेक वर्ष अशाच पद्धतीने मुस्लिम मताचा वापर काँग्रेसने करून घेतला. त्यामुळे अशा भुलथापाना बळी पडू नका असेही त्यांनी यावेळी सांगितले.

दरम्यान सध्या निलंगा नगरपालिका निवडणुकीत देशमुख विरुद्ध निलंगेकर असा सामना सुरू असून आम्ही निलंगेकर आहोत आमचा स्वाभिमान निलंगा आहे ही निलंगाची माती आहे त्यामुळे येथे इतरांना हस्तक्षेप करू देणार नाही असा प्रचार सध्या भारतीय जनता पार्टी कडून केला जात आहे. त्यामुळे अमित देशमुख विरुद्ध निलंगेकर च्या या निवडणूक प्रचारात निलंगेकर कोणाला दाद देणार आहे हे येत्या काळात स्पष्ट होणार आहे. मात्र या निवडणुकीनंतर महानगरपालिका व जिल्हा परिषद पंचायत समिती निवडणुका होणार असल्यामुळे भाजपाकडून जिल्हा परिषद व महानगरपालिकेची रचना आतापासूनच आखली जात आहे येत्या काळात देशमुख कसे तोंड देणार हे दिसणार आहे.