Yashashri Munde : गाजावाजा करून 'एन्ट्री', शांततेत 'एक्झिट' : गोपीनाथ मुंडेंच्या तिसऱ्या मुलीच्या राजकीय लाँचिंगला ब्रेक

Pankaja Munde | Yashashri Munde News : पर्यावरण मंत्री पंकजा मुंडे यांची बहीण यशश्री मुंडे यांनी वैद्यनाथ अर्बन को-ऑपरेटिव्ह बँकेच्या संचालक मंडळाच्या निवडणुकीतून माघार घेतली आहे. जुन्या संचालक मंडळाने माजी खासदार प्रीतम मुंडे यांच्याकडेच नेतृत्व देण्याचा निर्णय घेतल्याने यशश्री यांनी त्यांचा अर्ज मागे घेतला आहे.

वैद्यनाथ अर्बन को-ऑपरेटिव्ह बँकेच्या संचालक मंडळाची निवडणूक प्रक्रिया पार पडत आहे. यशश्री मुंडे यांनी या निवडणुकीसाठी मोठा गाजावाजा करत अर्ज दाखल केला होता. त्यामुळे दिवंगत गोपीनाथ मुंडे यांची तिसरी कन्याही राजकीय पदार्पणासाठी तयार झाल्याचे स्पष्ट झाले होते. पण मंगळवारी अर्ज मागे घेण्याच्या अखेरच्या दिवशी त्यांनी अचानक अर्ज मागे घेतला.

यशश्री मुंडे यांनी यापूर्वी साखर कारखान्यामध्ये लक्ष घातले होते. पण जुन्या संचालक मंडळाच्या निर्णयानुसार त्यांनी बँकेच्या निवडणुकीतून माघार घेतली आहे. आता महिलांमध्ये माजी खासदार प्रीतम मुंडे आणि सुरेखा मेनकुदळे बिनविरोध निवडून आल्या आहेत. आता 10 ऑगस्ट रोजी मतदान होणार असून 12 ऑगस्ट रोजी मतमोजणी होणार आहे.

वैद्यनाथ बँकेवर गेली कित्येक दशकं मुंडे कुटुंबाचं निर्विवाद वर्चस्व राहिले आहे. यंदा तर धनंजय मुंडे आणि पंकजा मुंडे एकत्र आल्यामुळे बँकेची निवडणूक मुंडे कुटुंबियांसाठी फार सोपी झाली होती. पण यशश्री मुंडे मैदानात उतरल्यामुळे या निवडणुकीकडे सर्वांचेच लक्ष लागलेले होते. मात्र त्यांनी माघार घेतल्याने त्यांचे राजकीय पदार्पण लांबल्याचे दिसून येते.

कोण आहेत यशश्री मुंडे?

यशश्री मुंडे या पेशाने वकील आहेत. काही वर्षांपूर्वी त्यांचा अमेरिकेतील कार्नेल विद्यापीठाकडून प्रॉमिसिंग आशियाई स्टुडन्ट म्हणून गौरवही करण्यात आला. पंकजा मुंडे आणि प्रीतम मुंडे या दोघींचे शिक्षण मराठी माध्यमातून झाले. तर यशश्री यांनी शिक्षण इंग्रजी माध्यमातून पूर्ण केले आहे. स्थानिक राजकारणात सक्रिय असतात.