Babanrao Lonikar On Thackeray : निष्क्रिय अन् भ्रष्ट मुख्यमंत्री म्हणून तुमची ओळख होती, म्हणून तोंड सांभाळून बोला..

Jalna : ठाण्यातील युवतीसेनेच्या महिला पदाधिकाऱ्यावर शिंदे गटाकडून झालेल्या हल्यामुळे राज्यातील वातावरण चांगलेच तापले आहे. पक्षप्रमुख उद्धव ठाकरे (Uddhav Thackeray) यांनी गृहमंत्री देवेंद्र फडणवीस यांचा `फडतूस` असा केलेला उल्लेख भाजपच्या लोकप्रतिनिधींना रुचलेला नाही.

भाजपचे प्रदेशाध्यक्ष चंद्रशेखर बावनुकळे यांनी उद्धव ठाकरे यांना बाहेर फिरू देणार नाही, असा इशारा दिल्यानंतर ठाकरे विरुद्ध भाजप (Bjp) असा संघर्ष सुरू झाला आहे. यातच माजी मंत्री भाजप आमदार बबनराव लोणीकर (Babanrao Lonikar) यांनी उडी घेतली आहे.

उद्धव ठाकरे तुमची भ्रष्ट आणि निष्क्रिय मुख्यमंत्री म्हणून नोंद झालेली आहे, त्यामुळे तुम्ही आमच्या गृहमंत्र्यांना फडतूस म्हणून नका, अन्यथा राज्यातील १२ कोटी जनता तुम्हाला रस्त्यावर फिरू देणार नाही, असा दम लोणीकर यांनी माध्यमांशी बोलतांना भरला. कोरोना काळात लोक मरत असतांना तुम्ही घरात बसून होतात, त्यामुळे तुमची घरकोंबडा अशी प्रतिमा महाराष्ट्रात झाली होती.

या काळातील भ्रष्टाचार आणि मुख्यमंत्री म्हणून निष्क्रियतेचा ठपका तुमच्यावर आहे. त्यामुळे आमच्या नेत्याबद्दल, गृहमंत्र्यांवर बोलतांना जरा तोंड सांभाळून बोला. तुम्हाला अशी भाषा शोभत नाही, यापुढे तुम्ही अशा भाषेचा वापर केला तर राज्यातील १२ कोटी जनता तुम्हाला रस्त्यावर फिरू देणार नाही, तुमचे तोंड फोडल्याशिवाय राहणार नाही, हा आमचा इशारा समजा, असेही लोणीकर म्हणाले.