Pandharpur, 24 January : जिल्हा परिषद, पंचायत समिती निवडणुकीच्या निमित्ताने पालकमंत्री जयकुमार गोरे आणि मोहिते पाटील यांच्यातील वादाला नव्याने तोंड फुटले आहे. राष्ट्रवादी काँग्रेस पक्षाच्या प्रचाराच्या सभेत खासदार धैर्यशील मोहिते पाटील यांनी पालकमंत्री गोरे यांना डिवचले आहे. सोलापूर जिल्ह्यातील जनता स्वाभिमानी आहे. त्यांना डिवचायला जाऊ नका. लोकसभा, विधानसभा आणि नगरपालिका निवडणुकीत तुमचा सुपडासाफ केला. आता झेडपी निवडणुकीतही तुमचा सुपडा साफ करू आणि सोलापूरचे पाणी काय असते, हे दाखवून देऊ, असा इशारा मोहिते-पाटील यांनी दिला आहे.
माजी उपमुख्यमंत्री विजयसिंह मोहिते पाटील यांच्या उपस्थितीत शुक्रवारी (ता.२४ जानेवारी) मेंढापूर (ता.पंढरपूर) येथे दुधेश्वर मंदिरात नारळ फोडून प्रचाराचा शुभारंभ करण्यात आला. त्या सभेत बोलताना खासदार धैर्यशील मोहिते पाटील (Dhairyasheel Mohite Patil) यांनी पालकमंत्री गोरे यांना थेट इशारा दिला आहे.
दरम्यान, ‘तिजोरीच्या चाव्या ह्या उपमुख्यमंत्री अजित पवार यांच्याकडे आहेत. आमचा निधी आता कोणी आडवू शकत नाही,’ अशा शब्दांत आमदार अभिजित पाटील (Abhijeet Patil) यांनी भाजप नेत्यांना डिवचले आहे. त्यांच्या विधानावरून पुन्हा एकदा राजकीय वादाला तोंड फुटण्याची शक्यता आहे.
खासदार मोहिते पाटील म्हणाले, पालकमंत्री जयकुमार गोरे हे सोलापूर जिल्ह्यातील महाविकास आघाडीच्या खासदार आणि आमदारांना डीपीडीसीचा निधी देताना दुजाभाव करतात. अधिकाराचा गैरवापर करून नियम धाब्यावर बसवून जे पराभूत झाले आहेत, अशा लोकांना निधीची खिरापत वाटली जात आहे, या प्रश्नावर आता उच्च न्यायालयात जाऊ.
पंढरपूर तालुक्यातील मेंढापूर हे सोलापूर जिल्ह्याचे मध्यवर्ती ठिकाण आहे. या भागात एक हजार एकर जमीन उपलब्ध करून विमानतळ उभारण्यासाठी आमचे प्रयत्न सुरू आहेत. येथून कार्गो विमानसेवा सुरू झाली, तर जिल्ह्यातील शेतकऱ्यांना याचा मोठा फायदा होणार आहे. पंढरपूरकडे येणारे सर्व महामार्ग झाले आहेत. यासाठी विजयसिंह मोहिते-पाटील यांच्या माध्यमातून आम्ही प्रयत्न केले. यापुढच्या काळात या भागाचा विकास करण्यासाठी आमचे प्रयत्न सुरू राहणार आहेत, असेही मोहिते पाटील यांनी स्पष्ट केले.
ते म्हणाले, भीमा नदीचे प्रदूषण रोखण्यासाठी केंद्रीय प्रदूषण नियंत्रण मंडळाकडे पाठपुरावा केला आहे. त्यानुसार येत्या २८ ते ३० जानेवारी पासून दिल्ली येथील प्रदूषण नियंत्रण मंडाळचे अधिकारी पुणे ते पंढरपूरदरम्यान सर्वे करुन अहवाल तयार करणार आहेत. तो अहवाल केंद्र आणि राज्य सरकारला देणार आहेत. नदी प्रदूषणाचा प्रश्नही लवकरच मार्गी लागेल.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.