Kolhapur Politics : नेत्यांनी शब्द फिरवला, जनसुराज्यात दुफळी; पाडळीच्या सरपंच पदाचं नेमकं झालं?

Kolhapur Political News : हातकणंगले तालुक्यातील पाडळी येथे जनसुराज्यची एकहाती सत्ता आहे. मात्र स्थानिक नेत्यांतील दुफळीमुळे सरपंचपदाची निवडणूक होऊन ऐनवेळी अर्ज भरलेल्या डॉ. विभा पाटील यांना दुसऱ्यांदा संधी मिळाली.

आता नेत्यांनी शब्द देऊनही सुजाता पाटील यांना सरपंचपदापासून दूर रहावे लागले. अध्यक्षस्थानी मंडल अधिकारी अमीत लाड होते.

2021 च्या निवडणुकीत येथील ग्रामपंचायतीवर सर्व 11 सदस्य जनसुराज्य शक्ती पक्षाचे निवडून आले होते. येथील सरपंचपद सर्वसाधारण महिला पदासाठी राखीव असल्याने सुरवातीला डॉ. विभावरी पाटील यांना सरपंचपदाची संधी मिळाली.

अडीच वर्षांनंतर त्यांनी ठरल्याप्रमाणे डाॅ. पाटील यांनी राजीनामा दिला. यानंतर याच पक्षातील ऐश्वर्या पाटील व सुजाता पाटील या सरपंच पदासाठी इच्छुक होत्या. हा वाद कोल्हापूर जिल्हा बँकेचे संचालक विजयसिंह माने व पक्षप्रमुख आमदार विनय कोरे Vinay Kore यांच्यापर्यंत पोहचला. वाद न मिटल्याने अखेर सरपंच निवड रद्द करावी लागली.

दरम्यान, माने व कोरे यांनी हातमिळवणी केली आणि ऐश्वर्या पाटील बिनविरोध सरपंच झाल्या. त्यानंतर सुजाता पाटील यांना सरपंच करण्याचा शब्द दिला. पण गेल्या सहा महिन्यात गावातील पक्षातील अंतर्गत वादातून स्थानिक नेत्यांनी सुजाता पाटील यांना सरपंचपद देण्यास विरोध केला. मात्र विजयसिंह माने व पक्षप्रमुख विनय कोरे यांनी सुजाता पाटील यांना सरपंचपदी निवड करावी असा आदेश गावातील स्थानिक नेत्यांना दिला.

अखेरच्या क्षणी स्थानिक नेत्यांनी डॉ. विभावरी पाटील यांचा अर्ज भरला. त्यामुळे मतदान घेण्यात आले. डाॅ. विभा पाटील यांना पाच मते तर विरोधातील सुजाता पाटील यांना तीन मते पडली. उर्वरीत तीन सदस्य अनुपस्थित राहिल्याने विभा पाटील यांना सरपंच म्हणून मंडळ अधिकारी अमित लाड यांनी घोषित केले. या घटनेने पाडळीच्या जनसुराज्य पक्षात सरळ सरळ दोन गट पडल्याचे सिध्द झाले.

(Edited by Sunil Dhumal)