पाठिंबा द्यायची सवय आता बंद करावी लागेल; राष्ट्रवादीच्या भूमिकेनं आघाडीत अस्वस्थता

सांगोला : आपल्या तालुक्यात कायमच इतरांना पाठिंबा देण्याची सवय लागली आहे. पण आता ही सवय बंद करायला हवी. तालुक्याला जे-जे हवे आहे, अत्यावश्यक आहेत ती सर्व कामे प्राधान्याने पूर्ण केली जातील. परंतु तालुक्यातील राष्ट्रवादी पक्ष संघटना सक्षम, मजबूत करण्यासाठी एकजुटीने प्रयत्न केला पाहिजे असे आवाहन जलसंपदा मंत्री आणि राष्ट्रवादी काँग्रेसचे (NCP) प्रदेशाध्यक्ष जयंत पाटील (Jayant Patil) यांनी केले. सांगोला तालुक्यात राष्ट्रवादी काँग्रेसची परिवार संवाद यात्रा रामकृष्ण व्हीला सभागृहात संपन्न झाली. यावेळी ते बोलत होते.

जयंत पाटील पुढे म्हणाले, तालुक्यातील टेंभू-म्हैसाळ योजनचे सर्व प्रश्न मार्गी लावण्याचा निश्चितपणे प्रयत्न करण्यात येईल. दीपक आबांनी तालुक्यातील कामांबाबत जी निवेदन दिली आहेत, त्याबाबत कृष्णा खोरे महामंडळाच्या अधिवेशन काळात बैठक लावून सर्व कामे पूर्ण करण्यासाठी व योजनेचे प्रत्येक गावाला पाणी देण्यासाठी प्रयत्न केला जाईल. परंतु तालुक्यातील राष्ट्रावादी काँग्रेसची संघटना मजबूत करण्यासाठी कोणाला तरी पाठिंबा द्यायची सवय बंद करुन संघटनेचा प्रभाव कसा वाढेल याकडे प्रत्येकाने लक्ष द्यायला हवे, असेही ते म्हणाले.

तसेच आगामी जिल्हा परिषद, महानगरपालिका निवडणुकांमध्ये ताकदीने लढा आणि चांगले यश मिळवा. या भागातील शिरापूर, आष्टी योजना २०२३ आधी पूर्ण करण्याचा सरकारचा प्रयत्न आहे. जेवढा निधी लागेल तेवढा देण्याचे काम करू. तसेच इतरही योजना पूर्ण केल्या जातील. आपल्या भागाचा विकास करण्यासाठी राष्ट्रवादी काँग्रेस अधिक सक्षम करा, असेही कार्यकर्त्यांना आवाहन करताना जयंत पाटील म्हणाले. मात्र जयंत पाटील यांच्या या वक्तव्याचे राज्यातील राजकारणावर परिणाम होणार का? या विचाराने आघाडीच्या नेत्यांमध्ये अस्वस्था पसरली आहे.

यावेळी सोलापूरचे पालकमंत्री दत्तात्रय भरणे, महिला प्रदेशाध्यक्ष रुपाली चाकणकर, जिल्हाध्यक्ष बळीराम साठे, माजी आमदार दिपक साळुंखे, कार्याध्यक्ष उमेश पाटील आदींसह पक्षाचे पदाधिकारी व कार्यकर्ते उपस्थित होते. सांगोलासोबतच काल मोहोळमध्येही राष्ट्रवादी काँग्रेसची संवाद यात्रा पार पडली