Riteish Deshmukh : रवींद्र चव्हाणांचा 'घाव' देशमुख बंधुंच्या जिव्हारी; रितेशने दोन वाक्यातच दिलं 'सणसणीत' उत्तर

महाराष्ट्रातील महापालिका निवडणुकांच्या पार्श्वभूमीवर राजकीय वातावरण दिवसेंदिवस अधिकच तापताना दिसत आहे. सत्ताधारी आणि विरोधकांमधील आरोप-प्रत्यारोपांच्या फैरी वाढल्या असून, त्यातूनच आता एका वादग्रस्त विधानामुळे मोठी चर्चा सुरू झाली आहे. भाजपचे प्रदेशाध्यक्ष रवींद्र चव्हाण यांनी लातूरमध्ये केलेल्या वक्तव्यामुळे राजकीय वर्तुळात खळबळ उडाली आहे.

लातूर महापालिका निवडणुकीच्या प्रचारासाठी रवींद्र चव्हाण शहरात आले होते. यावेळी आयोजित सभेत बोलताना त्यांनी दिवंगत माजी मुख्यमंत्री विलासराव देशमुख यांच्याबाबत विधान केलं. कार्यकर्त्यांचा उत्साह पाहून त्यांनी लातूर शहरातून विलासराव देशमुख यांच्या आठवणी पुसल्या जातील, असं वक्तव्य केलं. त्यांच्या या वक्तव्यामुळे लगेचच वाद निर्माण झाला आणि काँग्रेसकडून तीव्र प्रतिक्रिया उमटू लागल्या आहेत.

विलासराव देशमुख हे लातूरचे लोकप्रिय नेतृत्व मानले जात होते. त्यांनी मुख्यमंत्रीपदाच्या काळात आणि त्याआधीही लातूर जिल्ह्याच्या विकासासाठी मोठं योगदान दिलं होतं. त्यामुळे त्यांच्या आठवणी पुसल्या जातील, असं विधान केल्याने अनेकांच्या भावना दुखावल्या गेल्या. काँग्रेस नेत्यांनी या वक्तव्याचा निषेध करत भाजपवर जोरदार टीका केली.

या वादात आता अभिनेता आणि विलासराव देशमुख यांचे सुपुत्र रितेश देशमुख यांनीही आपली प्रतिक्रिया दिली आहे. रितेशने सोशल मीडियावर एक व्हिडीओ शेअर करत ठाम शब्दांत उत्तर दिलं. "लोकांसाठी जगलेल्या माणसांची नावं मनावर कोरलेली असतात, ती सहज पुसता येत नाहीत, असं म्हणत त्याने आपल्या भावना व्यक्त केल्या. लिहिलेलं पुसता येतं, पण मनावर कोरलेलं नाही," अशा शब्दांत त्याने अप्रत्यक्षपणे टीकाकारांना उत्तर दिलं. रितेशचा हा व्हिडीओ सोशल मीडियावर मोठ्या प्रमाणात व्हायरल होत असून अनेकांनी त्याला पाठिंबा दर्शवला आहे.

या प्रकरणावरून सध्या लातूरसह संपूर्ण राज्यात राजकीय चर्चांना उधाण आलं आहे. महापालिका निवडणुकीच्या तोंडावर अशा वक्तव्यांमुळे राजकीय वातावरण आणखी तापण्याची शक्यता आहे. पुढील काळात या वादाचा निवडणुकीवर नेमका काय परिणाम होतो, याकडे सर्वांचं लक्ष लागलं आहे.