Congress Candidate List : काँग्रेसच्या 'या' विद्यमान आमदाराचा पत्ता कट, युवा चेहऱ्याला संधी

Ahilyanagar News : काँग्रेसचे ज्येष्ठ नेते माजी मंत्री आमदार बाळासाहेब थोरात यांचे कट्टर समर्थक आमदार लहू कानडे यांच्या उमेदवारीला धक्का बसला आहे. काँग्रेसने त्यांची विधानसभेची दुसरी टर्म रोखली आहे.

काँग्रेसने दुसऱ्या यादी जाहीर करताना आमदार कानडे यांना वगळून युवा नेते हेमंत ओगले यांना संधी दिली आहे. काँग्रेसच्या या निर्णयावर लहू कानडे काय भूमिका घेतात, याकडे आता लक्ष लागलं आहे.

काँग्रेसने (Congress) विधानसभा निवडणुकीसाठी दुसरी यादी जाहीर केली आहे. यात 23 जणांना उमेदवारी जाहीर केली आहे. अहिल्यानगर जिल्ह्यातील राखीव श्रीरामपूर विधानसभा मतदारसंघातून विद्यमान आमदार लहू कानडे यांना उमेदवारी देण्याऐवजी युवा नेते हेमंत ओगले यांना संधी देण्यात आली आहे.

आमदार लहू कानडे आणि हेमंत ओगले यांच्यात उमेदवारीसाठी रस्सीखेच होती. दोघांनी मतदारसंघात उमेदवारी मिळवण्यापूर्वी यात्रा काढल्या होत्या. हेमंत ओगले यांना युवा नेते करण ससाणे यांचे मोठे समर्थन मिळाले. हेमंत ओगले आमदार कानडेंविरोधात चांगलेच आक्रमक झाले होते. आमदार कानडे यांनी देखील जशास, तसे उत्तर देते.

काँग्रेसचे पक्ष निरीक्षक शिर्डीत (Shirdi) आल्यावर तिथं आमदार कानडे आणि ओगले समर्थक यांच्यात वाद झाला होता. हेमंत ओगले यांनी आमदार कानडे यांच्यावर पक्ष निरीक्षकांसमोर गंभीर आरोप केले होते. यानंतर दोघांमध्ये चांगलेच वातावरण तापले. उमेदवारी मिळवण्यासाठी हेमंत ओगले यांनी संपूर्ण ताकद पणाला लावली होती. त्याचवेळी आमदार कानडे यांनी देखील ताकद लावली होती. परंतु आमदार कानडे कमी पडले आणि हेमंत ओगले यांनी संधी साधली.

आमदार कानडे आणि हेमंत ओगले यांच्यात वाद वाढत असताना, काँग्रेसची प्रतिष्ठा जपा असा सल्ला ज्येष्ठ नेते आमदार बाळासाहेब थोरातांनी दिला होता. हेमंत ओगले यांना मोठेपणा दाखवा, असे सांगून आमदार कानडे यांना देखील संयम राखण्याचा सल्ला दिला होता. आता हेमंत ओगले यांना उमेदवारी जाहीर झाल्याने आमदार कानडे काय भूमिका घेतात, याकडे आता लक्ष लागलं आहे.