Nashik Crime: धोत्रे हत्या प्रकरण; भाजप नेते उद्धव निमसे यांची अटकपूर्व जामिनासाठी वरीष्ठ न्यायालयात धाव?

Uddhav Nimse News: शहरातील राहुल धोत्रे खून प्रकरणावरून वातावरण अद्यापही तापलेले आहे. यावरून राजकीय आरोप आणि प्रत्यारोप सुरूच आहेत. दरम्यान या प्रकरणात सोमवारी आणखी दोन संशयीतांना पोलिसांनी अटक केली आहे.

राहुल धोत्रे खून प्रकरणात भारतीय जनता पक्षाचे माजी नगरसेवक उद्धव निमसे यांच्यावर आरोप होत आहेत. ही घटना घडल्यानंतर श्री निमसे हे फरारी आहेत. पोलिसांची चारही पथके त्यांचा शोध घेऊ शकलेली नाहीत. त्यामुळे पोलिसांवरही या संदर्भात दबाव आहे.

दरम्यान फरारी असलेले भाजपचे माजी नगरसेवक उद्धव निमसे यांचा एक व्हिडिओ व्हायरल झाला आहे. या व्हिडिओमध्ये त्यांनी धोत्रे प्रकरणावर आपली भूमिका स्पष्ट केली आहे. धोत्रे प्रकरणात आपण मध्यस्थी करून वाद मिटवण्याचा प्रयत्न केला. संदर्भात पोलिसांशी संपर्क करून हे प्रयत्न केल्याचे त्यांनी सांगितले.

राहूल धोत्रे खून प्रकरणाशी आपला काहीही संबंध नाही. या प्रकरणात आपण पूर्णतः निर्दोष आहोत. यासंदर्भात पोलिसांनाही त्याची कल्पना आहे. धोत्रे कुटुंबीयांनी माझे या प्रकरणात नाव का घेतले? हे अनाकलनीय आहे, असे त्यांनी सांगितले.

दरम्यान श्री निमसे वरिष्ठ न्यायालयातून अटकपूर्व जामीन घेण्याच्या प्रयत्नात आहेत. त्यासाठी त्यांनी काही कायदेतज्ञांशीही संपर्क केल्याचे कळते. मात्र अद्याप त्यामध्ये त्यांना यश आलेले नाही. एकीकडे पोलिसांचा दबाव वाढत असल्याने श्री निमसे यांच्या अडचणी रोज वाढत आहेत.

दरम्यान पोलिसांनी सोमवारी संतोष बाळू मते आणि स्वप्निल मदन बागुल या दोघांना अटक केली. स्थानिक पोलिसांनी या प्रकरणाच्या चौकशीसाठी यापूर्वीच एसआयटी निर्माण केली आहे. परिस्थिती तणावपूर्ण असल्याने माजी नगरसेवक निमसे यांच्या निवासस्थानी अद्यापही पोलिसांचा बंदोबस्त ठेवण्यात आला आहे.

------