Sujay Vikhe on Satyajeet Tambe BJP : सत्यजीत तांबेंच्या भाजप प्रवेशाची चर्चा; विखे म्हणाले, 'मामा, भाचे, पुतणे कोणीही आलं तरी...'

Satyajeet Tambe BJP entry : नाशिक पदवीधर मतदारसंघाचे अपक्ष आमदार सत्यजीत तांबे यांचा भाजप प्रवेशाच्या चर्चांवर माजी खासदार सुजय विखे यांची पहिली प्रतिक्रिया समोर आली आहे.

सुजय विखे यांनी संगमनेरच्या राजकारणावरून थोरात-तांबे, मामा-भाचाशी राजकीय संघर्षाचे संकेत दिले आहे. 'कोणी पक्षात नवीन येत असेल, तर त्याला मी विरोध करणे संयुक्तिक होणार नाही. मामा, भाचे, पुतणे कोणीही आलं तरी जनतेच्या हितासाठी आम्हाला जे योग्य वाटतं ते आम्ही करत राहणार', असे म्हणत राजकीय संघर्षाचे संकेत सुजय विखे यांनी दिले आहे.

आमदार सत्यजीत तांबे यांची मुख्यमंत्री देवेंद्र फडणवीस (Devendra Fadnavis) यांच्याशी जवळीक वाढली आहे. यातून त्यांच्या भाजपच्या प्रवेशाच्या चर्चा वाढल्या आहेत. काँग्रेसचे ज्येष्ठ नेते बाळासाहेब थोरात यांचा संगमनेर विधानसभा मतदारसंघात पराभव झाल्यानंतर या चर्चांना बळ वाढलं आहे. आमदार तांबे यांनी सकाळ माध्यम समूहाच्या 'सरकारनामा' डिजिटलशी संवाद साधताना, देवेंद्र फडणवीस आणि मार्गदर्शकांच्या सूचनेनुसार योग्य वेळी निर्णय घेऊ, असे संकेत दिले.

भाजपचे माजी खासदार सुजय विखे यांनी सत्यजीत तांबे (Satyajeet Tambe) यांच्या भाजप प्रवेशाच्या चर्चेवर प्रतिक्रिया दिली. ते म्हणाले, "याबाबत काय निर्णय घ्यायचा, ते मुख्यमंत्री आणि भाजपचे वरिष्ठ निर्णय घेतील. कोणाशीही मैत्री ही मैत्रीच्या जागेवर असते. आम्ही देखील भाजपत आलो, त्यावेळेस काही लोकांना आवडलं नसेल. मात्र पक्षाने त्यावेळी योग्य तो निर्णय घेतला".

'भाजप पक्षात कोणी नवीन येत असेल, तर त्याला मी विरोध करणे संयुक्तिक होणार नाही. तिकडं काय व्हायचं ते होऊ दे, संगमनेर तालुक्याच्या महत्त्वाच्या प्रश्नांमध्ये आम्ही मागे हटणार नाही. भविष्यात एका पक्षात असलो, तरी स्थानिक राजकारण हे वेगळं असतं ते कायम राहील', अशी भूमिका सुजय विखे यांनी घेतली.

कोणी पक्षात आलं किंवा नाही आलं, तरी आमच्या 50 वर्षांत जे राजकारण झालं ते यापुढेही सुरूच राहील. मामा, भाचे, पुतणे कोणीही आलं तरी जनतेच्या हितासाठी आम्हाला जे योग्य वाटतं ते आम्ही करत राहणार, असे म्हणत सुजय विखे यांनी थोरात अन् तांबे, मामा-भाचे यांना सूचक इशारा दिला.