संजय राऊतांमुळेचं भाजपला यश ; गिरीश महाजनांनी सांगितलं विजयाचं गमक

जळगाव : "भाजपचे विरोधी पक्षनेते देवेंद्र फडणवीस यांचे नियोजन, टीमवर्क आणि शिवसेना नेते संजय राऊत (Sanjay Raut) यांनी वायफळ बडबड करून अपक्षांचा केलेला अपमान यामुळे भारतीय जनता पक्षाला राज्यसभेत यश मिळाले," असा टोला भाजपचे नेते, माजी मंत्री गिरीश महाजन (Girish Mahajan) यांनी लगावला आहे. (Girish Mahajan latest news)

राज्यसभा निवडणुकीत (rajya sabha election result) भारतीय जनता पक्षाचा तिसरा उमेदवार विजयी करण्याची जबाबदार माजी मंत्री गिरीश महाजन यांच्यावरही होती. विरोधी पक्षनेते देंवेंद्र फडणवीस यांचे विश्‍वासू व भाजपचे ते ‘संकटमोचक’समजले जातात. राज्यसभेत भाजपचे उमेदवार धनजंय महाडिक विजयी होणारच, असा दावाही त्यांनी छातीठोकपणे ‘सरकारनामा’शी बोलतांना केला होता. तो विश्‍वास त्यांचा सार्थ ठरला आहे.

राज्यसभेतील विजयानंतर त्यांच्याशी संपर्क केला असता ते म्हणाले,"विरोधी पक्षनेते देवेंद्र फडणवीस याचे टीम वर्क, नियोजन आणि जिंकण्यासाठी लढण्याची जिद्द यामुळे भाजपला यश मिळाले आहे. शिवसेना नेते संजय राऊत हे दररोज सकाळी उठून टीव्हीवर बडबड करीत असतात. त्यांच्या या वायफळ बडबडीचाही पक्षाला या निवडणुकीत फायदा झाला. त्यांनी आपल्या अपक्ष उमेदवारांचा ‘घोडेबाजार’म्हणून अपमान केला, त्यामुळे अपक्ष उमेदवार दुखावले गेले आणि त्यांनी महाविकास आघाडीची साथ सोडून भाजपला मतदान केले.

एमआयएमकडे लाचारी

शिवसेनेवर टीका करतांना महाजन म्हणाले, "आपला उमेदवार विजयी होण्यासाठी शिवसेनेने अक्षरक्ष:लाचारी पत्करली दोन मतांसाठी एमआयएम समोर गुडघे टेकले तरीही त्यांना यश मिळाले नाही,"

तुम्ही दाखविलेल्या अमिषाचे काय?

राज्यसभा निवडणूकीत भाजपने पैशाचा पाऊस पाडला, असा आरोप संजय राऊत यांनी केला. त्याचा समाचार घेताना महाजन म्हणाले, "अपक्षांनी आम्हाला मतदान केले तर पैशाचा पाऊस,ईडी,सीबीआयचा धाक दाखविला असा आरोप केला जातो. तुम्हाला मतदान केले तर ते पवित्र पध्दतीने झाले असे तुम्ही म्हणतात, परंतु निवडणुकीत तुम्ही अपक्ष तसेच इतर लहान पक्षाना मतदानासाठी निधी देण्याचे आश्‍वासन दिले आहे. हे तुमचे अमिष नाही का? याचेही उत्तर त्यांनी द्यावे,"