BJP Monika Rajale : आक्रमक जमाव, बचावासाठी भाजप महिला आमदाराने स्वतःला घेतलं कोंडून, कारण...

Ahilyanagar News: अहिल्यानगर जिल्ह्याच्या मतदानाच्या शेवटची शेवगाव-पाथर्डी विधानसभा मतदारसंघात मोठा गोंधळ झाला.

जमावाच्या रोषापासून वाचण्यासाठी भाजप महिला आमदार मोनिका राजळे यांनी स्वतःला समर्थकांसह खोलीत कोंडून घेतलं. हा प्रकार शेवगाव-पाथर्डी मतदारसंघातील शिरसाटवाडी (ता. पाथर्डी) इथं झाला.

शेवगाव-पाथर्डी तालुक्यात 'कांटे की टक्कर', अशी विधानसभा निवडणूक होत आहे. भाजपच्या विद्यमान आमदार मोनिका राजळे, राष्ट्रवादी काँग्रेस पार्टी शरदचंद्र पवार (Sharad Pawar) पक्षाचे प्रतापराव ढाकणे, माजी आमदार चंद्रशेखर घुले पाटील, लोकनेते गोपीनाथ मुंडे यांच्या कट्टर समर्थक तथा जिल्हा परिषदेच्या माजी सदस्या हर्षदा काकडे यांच्यात चुरशीची लढाई आहे.

पाथर्डी तालुक्यातील शिरसाटवाडी इथं बूथ ताब्यात घेतल्याची माहिती मिळाल्यानंतर भाजप (BJP) आमदार मोनिका राजळे या समर्थकांसह तिथे भेट देण्यासाठी गेल्या होत्या. भाजप आमदार आल्याचे कळाल्यावर शिरसाटवाडीमधील लोक एकत्र आले. रोष व्यक्त करण्यास सुरवात केली. यातून गोंधळ उडाला. यावेळी जमाव आक्रमक होत,आमदारांवर चालून जाऊ लागला.

दरम्यान मोठा जमाव असल्याने आमदार राजळे सावध झाल्या. त्यांनी आपल्या कार्यकर्त्यांसह स्वतःला एका खोलीत बंद करून घेतले. संबंधित खोली बाहेर मोठा जमाव होता. हुल्लडबाजी करत होता. पोलिस बंदोबस्त कमी असल्याने मोनिका राजळे या बाहेर येण्यास तयार नव्हत्या.

आमदार राजळे यांनी शेवटी दूरध्वनीवरून पोलिसांशी संपर्क साधत मदत मागवली. शेवटी अतिरीक्त पोलिस बंदोबस्त आल्यानंतर आमदार राजळे यांना बंदोबस्तात शिरसाटवाडीतून बाहेर पडल्या. खोली बाहेर जमलेला जमाव हा राष्ट्रवादी काँग्रेस पार्टी शरदचंद्र पवार पक्षाचा असल्याचा दावा, आमदार राजळेंकडून केला गेला.