Gulabrao Patil politics: गुलाबराव पाटील यांनी भाजपच्या मंगेश चव्हाण यांची केली सव्याज परतफेड

Gulabrao Patil News: जिल्हा नियोजन मंडळाच्या बैठकीत आमदार मंगेश चव्हाण यांनी मंत्री गुलाबराव पाटील यांची राजकीय कोंडी केली होती. त्यानंतर या दोघांमधील दुरावा वाढला होता. राजकीय हेवेदावे तीव्र झाले आहेत. त्यामुळे महायुतीत सर्व काही अलबेला नसल्याचे चित्र आहे.

जळगाव जिल्हा दूध संघातर्फे काल दूध संघांच्या प्रतिनिधींसाठी कार्यशाळा झाली. या कार्यशाळेला पालकमंत्री गुलाबराव पाटील उपस्थित होते. मात्र दूध संघाचे अध्यक्ष आणि भाजपचे आमदार मंगेश चव्हाण यांनीच दांडी मारली. त्यामुळे अध्यक्षांच्या अनुपस्थितीतच ही महत्त्वाची कार्यशाळा झाली.

पालकमंत्री पाटील या बैठकीला उपस्थित असल्याने आमदार चव्हाण यांच्याबाबत काय भूमिका घेतात याची उत्सुकता होती. यावेळी आमदार चव्हाण अनुपस्थित असले तरी, पालकमंत्री पाटील यांनी आमदार चव्हाण यांच्या कारभाराचे चागंलेच वाभाडे काढले. त्यांना चांगलेच टोमणे मारत इशाराही दिला. कामकाज सुधारा अन्यथा मला वेगळा काहीतरी निर्णय घ्यावा लागेल, असा कडक इशाराच मंत्री पाटील यांनी दिला.

दोनच दिवसांपूर्वी जिल्हा नियोजन मंडळाच्या बैठकीत भाजपचे आमदार चव्हाण आणि पाचोर्‍याचे आमदार किशोर पाटील यांनी पालकमंत्री गुलाबराव पाटील यांच्यावर गंभीर आरोप केले होते. जळगाव जिल्ह्यातील जल जीवन योजनेतील पाणीपुरवठा कामांवर बाराशे कोटी रुपयांचा निधी मंजूर आहे.

जिल्ह्यात केवळ दोनशे कोटीच खर्च झाले. ठेकेदारांनी अधिकारी आणि राजकीय नेत्यांशी संगणमत करून भ्रष्टाचार केला. त्याला कोणाचे राजकीय संरक्षण आहे. एकाही गावात पाणी मिळालेले नाही. या सगळ्याची चौकशी करण्याची मागणी या दोन्ही आमदारांनी केली होती.

त्या आरोपांमुळे बैठकीत पालकमंत्री गुलाबराव पाटील यांची चांगलीच अडचण झाली. त्या आरोपांची उत्तरे देताना पालकमंत्री पाटील अक्षरशः हतबल झालेले दिसले. यामध्ये राज्याचे ग्रामविकास मंत्री गिरीश महाजन हे त्यांच्या मदतीला धावून आले होते. या राजकीय अंकाची सव्याज परतफेड पालकमंत्री गुलाबराव पाटील यांनी तिसऱ्याच दिवशी केली.

आगामी काळात जिल्हा दूध संघात एकनाथ खडसे यांच्यानंतर त्यांचे कट्टर विरोधक आमदार चव्हाण यांच्या विरोधात वातावरण पेटवले जाऊ शकते. विशेषतः पालकमंत्री आणि आमदार चव्हाण यांच्यात आगामी विधानसभा निवडणुकीच्या पार्श्वभूमीवर आरोप प्रत्यारोप सुरू आहेत. महायुतीच्या दोन पक्षांच्या नेत्यांमध्येच हा वाद रंगल्याने तो चर्चेचा विषय आहे.

यावेळी गुलाबराव पाटील यांनी दूध संघाच्या कारभारावर चांगलेच ताशेरे देखील ओढले. शेतकऱ्यांचे दूध नाकारले जात आहे. मग हा संघ कोणासाठी काम करतो?. शेतकऱ्यांवर अन्याय झाला तर मी सहन करणार नाही. शेतकऱ्यांना न्याय देऊ शकलो नाही तर, मी दूध संघात राहायचे की नाही याचा देखील वेगळा निर्णय घेईल.

यापूर्वी काय घडले ते सोडा, असे सांगत त्यांनी एकनाथ खडसे यांचा उल्लेख करणे टाळले. मात्र यापुढे काय करायचे, अशी विचारना करीत खडसे यांचे कट्टर विरोधक आमदार चव्हाण यांना घेरण्याचे संकेत दिले. त्यामुळे आगामी काही दिवसात जळगाव जिल्हा दूध संघ पुन्हा एकदा राजकीय आखाडा होतो की काय, अशी स्थिती आहे.

---