Manoj Jarange News: येवल्यामध्ये शिवसृष्टीला मनोज जरांगे पाटील यांनी भेट दिली. या भेटीनंतर शिवसृष्टीबाहेर छगन भुजबळ यांचे समर्थक जमले होते. त्यांनी जरांगे पाटील यांच्या विरोधात घोषणाबाजी केली. त्यानंतर जरांगे पाटील यांचे समर्थकांनी देखील घोषणाबाजी करत प्रत्युत्तर दिले. दोन्ही गट घोषणाबाजी करत भिडल्याने तणावाचे वातावरण निर्माण झाले होते.
मनोज जरांगे पाटील यांच्याबद्दल अपशब्द वापरल्याच्या निषेधार्थ जरांगे पाटील यांच्या समर्थकांनी इंदोर-पुणे मार्गावर रास्ता रोको केला. तेथे मनोज जरांगे पाटील यांनी रस्ता रोको मागे घेण्याचे आवाहन करत नाव न घेता छगन भुजबळ यांना प्रत्युत्तर दिले.
मनोज जरांगे पाटील म्हणाले, 'काय झालं हे मला माहीत नाही. पण असले चिल्लर चाळे करायची मला सवय नाही. मी डायरेक्ट भिडत असतो. आपला समज एक झाला आहे. आपली चूक नसली तरी ते म्हणतील आपली चूक आहे. मराठ्यांनी मोठं मन करायचं आहे. शांततेत आपण जायचं आहे.'
'मराठ्यांचं मन मोठं आहे. त्यांच्याच्या सारखे आम्ही स्वार्थी संकुचित मनाचे नाही. एका मिनिटात आम्ही रस्ता मोकळा केला. फडणवीससाहेब, अजितदादा यांचा हात त्यांच्या पाठीवर आहे. त्यामुळे ते गोरगरीब जनतेवर अन्याय करणारचं', असा टोला देखील जरांगे पाटील यांनी भुजबळांचे नाव न घेता लगावला.
'लहान भाऊ मोठा भाऊ म्हणून आपण सांभाळून घ्यायचं. कारण गाव खेड्यात आपल्या राहायचं आहे. ज्यावेळी नरड्याला येईल त्यावेळी बघू. मनगटाला मनगट लागायचे असले तर तेव्हा बघू', असा इशारा देखील जरांगे पाटील यांनी दिला.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.