Nashik Politics : नागपूर, अमरावतीनंतर काँग्रेसचे लक्ष नाशिक 'शिक्षक'वर ; पटोलेंचे गुळवेंना तयारीला लागण्याचे आदेश

Nashik News : राज्यातील नागपूर व अमरावती पदवीधर निवडणुकीत बाजी मारल्यानंतर काँग्रेसने आता नाशिक शिक्षक मतदारसंघाच्या निवडणुकीत उडी घेतली आहे. काँग्रेसचे प्रदेशाध्यक्ष नाना पटोले (Nana Patole) यांनी या निवडणुकीत उतरण्याची घोषणा करत मराठा विद्या प्रसारक समाज शिक्षण संस्थेचे संचालक ॲड. संदीप गुळवे यांना निवडणूक तयारीला लागण्याचे आदेश दिले आहेत. त्यामुळे गत निवडणुकीत पैठणी वाटपाने गाजलेल्या या मतदारसंघाच्या निवडणुकीत आता आमदार किशोर दराडे विरुध्द ॲड. संदीप गुळवे अशी रंगतदार लढाई होऊ शकते.

जून २०१८ मध्ये नाशिक शिक्षक मतदारसंघाची निवडणूक पार पडली. या निवडणुकीत विद्यमान आमदार किशोर दराडे यांच्या 'गिफ्ट' वाटपाची राज्यभर चर्चा झाली. नाशिक स्थानिक स्वराज्य संस्थेच्या निवडणुकीत आमदार नरेंद्र दराडे यांनी बाजी मारल्यानंतर अवघ्या १५ दिवसांत त्यांचे बंधू किशोर दराडेही विधिमंडळात आले होते. त्यामुळे या विषयाची राज्यात जोरदार चर्चा झाली होती.

शिक्षक मतदारसंघाची मुदत जून २०२४ मध्ये संपुष्टात येत असल्याने आता मतदार नोंदणी सुरू झाली आहे. त्यातच काँग्रेसने (Congress) ॲड. संदीप गुळवे यांची समन्वयकपदी नियुक्ती केली आहे. त्यांची उमेदवारी जवळपास निश्चित मानली जात असून त्यांना निवडणुकीची तयारी करण्याचे आदेशच प्रदेशाध्यक्ष पटोलेंनी दिले आहेत.

कोण आहेत ॲड. संदीप गुळवे ?

काँग्रेसचे एकनिष्ठ नेते स्व. गोपाळराव गुळवे यांचे चिरंजीव असलेले ॲड. संदीप गुळवे यांना मोठा राजकीय वारसा आहे. त्यांच्या मातोश्री या जिल्हा परिषदेच्या माजी उपाध्यक्ष होत्या. स्व. गुळवे यांनी काँग्रेसच्या संकटकाळात नाशिक लोकसभा, विधानसभा तसेच स्थानिक स्वराज्य संस्थांची निवडणूक लढवली. त्यांच्या पश्चात ॲड. गुळवे हे त्यांचा वारसा चालवत आहेत.

त्यांनी जिल्हा परिषदेची निवडणूक जिंकली, जिल्हा मध्यवर्ती सहकारी बँकेत संचालक म्हणून बिनविरोध पोहोचले. तसेच जिल्ह्यातील सर्वात मोठी शिक्षण संस्था म्हणून नावलौकिक असलेल्या मराठा विद्या प्रसारक समाज शिक्षण संस्थेचे ते विद्यमान संचालक आहेत. तसेच लोकनेते गोपाळरावजी गुळवे ही स्वत:ची शिक्षण संस्थादेखील ते चालवतात.

Edited by : Amol Jaybhaye