Tehsildar: जमिनीच्या अनुकूल निकालाच्या बदल्यात 10 लाखांची मागणी! नायब तहसीलदारांचा झाला करेक्ट कार्यक्रम

Sinnar Naib Tehsildar: भ्रष्ट सरकारी कर्मचाऱ्यांची आणि अधिकाऱ्यांनी जनतेला कामाच्या बदल्यात मोबदल्यासाठी वेठीला धरण्याच्या अनेक घटना आपण आसपास पाहत असतो. अनेकदा अशा अधिकाऱ्यांच्या घरांमध्ये पडलेल्या छाप्यांमध्ये मोठं घबाड मिळाल्याच्या घटना देखील उघडकीस येतात. पण सरकारी बाबूंची खाबूगिरी मात्र संपवण्याचं नाव घेत नाही. असाच खाबुगिरीचा प्रकार नाशिकमध्ये घडला असून जमिनीचा निकाल बाजूनं लावून देण्याच्या बदल्यात जिल्ह्यातल्या नायब तहसिलदारांना लाच मागितल्याप्रकरणी रंगेहाथ पकडल्यानं मोठी कारवाई करण्यात आली आहे. साम टीव्हीनं याबाबत वृत्त दिलं आहे.

नाशिकच्या लाचलुचपत प्रतिबंधक विभागाने अर्थात एसीबीनं केलेल्या या कारवाईनंतर महसूल विभागात खळबळ उडाली आहे. अडीच लाख रुपयांची लाच घेताना सिन्नरचे नायब तहसीलदार संजय धनगर यांना एसीबीच्या अधिकाऱ्यांनी रंगेहाथ पकडलं आहे. या अधिकाऱ्यांनी लावलेल्या जाळ्यात धनगर अडकले त्यामुळं त्यांच्यावर आता मोठी कारवाई केली जाणार आहे. जमिनीचा अनुकूल निकाल लावून देण्याच्या बदल्यात त्यांनी १० लाख रुपयांची मागणी केली होती. याच व्यक्तीनं पुढे लाचलुचपत विभागाकडं तक्रार दिली.

दरम्यान, एसीबीकडं तक्रार आल्यानंतर इथल्या अधिकाऱ्यांनी ट्रॅप लावला. यावेळी तक्रारदारानं नायब तहसीलदारांना पैशांबाबत तडजोड करण्यास सांगितलं. त्यानुसार तक्रारदारानं तहसीलदारांकडं तशी विनंती केल्यानंतर तडजोडीत अडीच लाखांची लाच स्वीकारताना नाशिकच्या एसीबीनं धनगर यांना रंगेहाथ पकडले. सोपान हॉस्पिटलसमोर लाच स्वीकारताना नायब तहसीलदार संजय धनगर यांना अटक करण्यात आली आहे. मुंबई नाका पोलीस ठाण्यात त्यांच्यावर गुन्हा दाखल झाला आहे.