`एसटी`च्या ५७ आंदोलकांचे निलंबन; त्यांनी मांडली रस्‍त्‍यावर चूल!

नाशिक : राज्‍य स्‍तरावर सुरू असलेल्‍या एसटी कर्मचाऱ्यांच्या आंदोलनाची तीव्रता जिल्‍ह्यात कायम आहे. आतापर्यंत ५७ कर्मचाऱ्यांवर निलंबनाची कारवाई झाली असताना, कर्मचाऱ्यांनी बुधवारी आंदोलनात सहभाग कायम ठेवला. इगतपुरी आगार वगळता अन्‍य सर्व आगारांतील बससेवा ठप्प राहिली. दरम्‍यान, आंदोलनकर्त्यांनी आगारातच ठाण मांडत रस्‍त्‍यावर चूल पेटवली.

एसटी महामंडळाच्‍या बहुतांश सर्वच आगारातील बससेवा सध्या ठप्प आहे. इगतपुरी वगळता अन्‍य सर्व आगारातून बस निघाली नाही. मंगळवारी मुंडन आंदोलन केल्‍यानंतर बुधवारी आंदोलनकर्त्यांनी प्रातिनिधिक स्‍वरूपात भिक मांगो आंदोलन केले. या अंतर्गत मित्र, नातेवाइकांकडून पैसे मागत शासनाच्‍या धोरणाचा निषेध नोंदविला, तर संघटनाचे काही पदाधिकारी सुनावणीसाठी मुंबईला रवाना झाले. एन. डी. पटेल मार्गावर आंदोलनकर्त्यांनी ठाण मांडले असून, बुधवारी थेट चूल पेटविली.

ट्रान्‍सपोर्ट असोसिएशनचा पाठिंबा

नाशिक डिस्ट्रिक्ट ट्रान्सपोर्ट असोसिएशनने आंदोलनाला पाठिंबा दिला. असोसिएशनचे अध्यक्ष राजेंद्र फड यांनी यासंदर्भात भूमिका जाहीर केली आहे. एसटी कर्मचारी कृती समितीस पाठिंबा पत्र दिले. अध्यक्ष राजेंद्र फड, सुभाष जांगडा, विशाल पाठक, दीपक ढिकले, सिद्धेश्वर साळुंके आदी उपस्थित होते.

आणखी कर्मचाऱ्यांचे निलंबन

मंगळवारी निलंबनाची कारवाई केल्‍यानंतर बुधवारी आणखी आंदोलनकर्त्यांवर निलंबनाची कारवाई केली आहे. कारवाई केलेले कर्मचारी नांदगाव, मालेगाव, पेठ आगारातील असल्‍याची माहिती मिळत आहे. दरम्‍यान, संबंधित आगारांच्‍या सूचना फलकावर नोटीस चिटकवत यासंदर्भात माहिती कळविली आहे.

सुमारे दोन हजार फेऱ्या रद्द

आंदोलनाची धग कायम असल्‍याने बुधवारी जिल्‍ह्यात सुमारे दोन हजार बसफेऱ्या रद्द कराव्‍या लागल्‍या. यामुळे दिवाळीत महामंडळाच्‍या तिजोरीत येणाऱ्या संभाव्‍य उत्‍पन्नावर पाणी फेरले जात आहे.

...