दादा भुसेंच्या व्यासपीठावर भाजपचे सुभाष भामरे शिवसेनेला डिवचतील का?

मालेगाव : राज्याचे कृषी मंत्री दादा भुसे (Shivsena minister Dada Bhuse) यांचा विधानसभा मतदारसंघ माजी केंद्रीय राज्यमंत्री डॅा सुभाष भामरे (BJP`s Ex Minister Dr Subhash Bhamre) यांच्या लोकसभा मतदारसंघात मोडतो. हे दोन्ही नेते आज एका व्यासपीठावर येत आहेत. विकासाचा प्रश्न असो वा भाजपचे राजकारण यामध्ये डॅा भामरे सातत्याने राज्य सरकारला लक्ष्य करीत असतात. आज ते भुसे यांच्या उपस्थितीत शिवसेनेला डिवचतील काय? याची उत्सुकता आहे.

शहरातील मोसमपुल-संगमेश्‍वर, कॅम्प व द्याने-रमजानपुरा या तीन वेगवेगळ्या विभागात ४२ कोटी रुपये खर्चून तीन नवीन सुसज्ज रुग्णालय साकारत आहेत. आज या रुग्णालयांचे भुमिपूजन व त्यानिमित्त सायंकाळी सहाला पोलिस परेड मैदानावर कोरोनाकाळात विविध चाळीसपेक्षा अधिक क्षेत्रात उल्लेखनीय सेवा देणाऱ्या विविध घटकांचा शहरवासिय व सर्व पक्षीयांतर्फे कोरोना योद्धा सन्मान सोहळा होणार आहे, अशी माहिती कृषीमंत्री दादा भुसे यांनी दिली.

या सोहळ्यास खासदार सुभाष भामरे, आमदार सुहास कांदे, आमदार मौलाना मुफ्ती मोहंमद इस्माईल, महापौर ताहेरा शेख, उपमहापौर नीलेश आहेर आदी प्रमुख पाहुणे असतील. डॉक्टर, परिचारिका, आरोग्य कर्मचारी, स्वच्छता कर्मचारी, चालक, वाहक, अंत्यविधी करणाऱ्या, रूग्णवाहिकेची सेवा देणारे, ऑक्सिजन पुरवठा करणारे, अंगणवाडी, आशासेविका आदींसह विविध क्षेत्रातील दोन हजार कोरोना योद्ध्यांचा या वेळी सन्मान करण्यात येईल. त्यासाठी भव्य सभामंडप उभारण्याचे काम सुरु आहे. या सोहळ्यास शहर व तालुकावासियांनी उपस्थित रहावे, असे आवाहन सन्मान सोहळा समितीतर्फे करण्यात आले आहे.

आरोग्यात शहर होणार सक्षम...

राष्ट्रीय आरोग्य अभियानांतर्गत मोसम पुलावरील महिला व बाल रुग्णालयाच्या जागेत ३३ कोटी ७७ लाख रुपये खर्चून १०० खाटांचे सुसज्ज रुग्णालय, द्याने-रमजानुरा भागात चार कोटी १५ लाख रुपये खर्चून प्रधानमंत्री जनविकास कार्यक्रमांतर्गत १५ खाटांचे रुग्णालय होईल. यात केंद्राचा हिस्सा २ कोटी ४९ लाख तर राज्याचा हिस्सा १ कोटी ६६ लाख रुपये आहे. कॅम्प भागात अमेरिकन इंडिया फाऊंडेशन ट्रस्टच्या सीएसआर निधीतून साडेचार कोटी रुपये खर्चून रावळगाव नाका येथे मॉड्युलर हॉस्पीटल होईल. या रुग्णालयांमुळे आरोग्य सुविधांच्या बाबतीत शहर सक्षम होणार आहे.

----