Amravati Instagram murder : इन्स्टाग्रामवरील वादातून युवकाची निर्घृण हत्या; कोयत्याच्या हल्ल्यात हाताचा पंजा छाटला, ताब्यात घेतलेल्य चौघांपैकी तिघे अल्पवयीन

Youth murdered in Amravati : अमरावती शहरातील राजेंद्रनगर कॉलनी परिसरात इन्स्टाग्रामवरील वादातून 24 वर्षीय युवकाची निर्घृण हत्या झाल्याची धक्कादायक घटना बुधवारी सकाळी घडली.

शेख अफाक शेख अकील (वय 24, रा. ताजनगर) असे मृत युवकाचे नाव असून, त्याच्यावर धारदार शस्त्राने हल्ला करण्यात आला. गंभीर जखमी अवस्थेत त्याला रुग्णालयात दाखल करण्यात आले; मात्र उपचार सुरू होण्यापूर्वीच त्याचा मृत्यू झाला.

पोलिसांच्या प्राथमिक माहितीनुसार, मृतक आणि आरोपी यांच्यात इन्स्टाग्राम चॅटिंगवरून गेल्या काही दिवसांपासून वाद सुरू होता. हा वाद मिटवण्यासाठी दोन्ही बाजूंनी अमरावतीच्या (Amravati) राजेंद्रनगर काॅलनी भेट झाली होती. मात्र, चर्चेदरम्यान पुन्हा वाद उफाळून आला आणि त्यानंतर शेख अफाक याच्यावर धारदार शस्त्राने हल्ला करण्यात आला.

या प्रकरणात चार संशयितांना ताब्यात घेण्यात आले असून, त्यापैकी तिघे अल्पवयीन असल्याची माहिती पोलिसांनी (Police) दिली आहे. पोलिस उपायुक्त यशवंत सोळंके यांनी दिलेल्या माहितीनुसार, या गुन्ह्यात एकूण आठ जणांचा सहभाग असल्याचा प्राथमिक अंदाज असून, उर्वरित संशयितांचा शोध घेण्यासाठी विशेष पथके रवाना करण्यात आली आहेत.

घटनेचे सीसीटीव्ही फुटेजही समोर आले असून, त्यामध्ये हल्लेखोर शस्त्राने हल्ला करताना दिसत असल्याची माहिती पोलिसांनी दिली आहे. सीसीटीव्ही आणि अन्य डिजिटल पुराव्यांच्या आधारे तपास सुरू असून, सर्व संबंधितांची भूमिका तपासली जात आहे.

या घटनेनंतर परिसरात तणावाचे वातावरण निर्माण झाले असून, पोलिसांनी नागरिकांना अफवांवर विश्वास न ठेवण्याचे आणि अधिकृत माहितीवरच विश्वास ठेवण्याचे आवाहन केले आहे. आरोपींना ताब्यात घेतल्यानंतर आणि तपास पूर्ण झाल्यानंतर या प्रकरणातील नेमकी पार्श्वभूमी व कारण स्पष्ट होईल, असे पोलिसांनी सांगितले आहे.