Sambhaji Bhide Controversial Statement : अटकपूर्व जामिनासाठी संभाजी भिडेंची न्यायालयात धाव..

Amravati News: महात्मा गांधी यांच्याबाबत वादग्रस्त विधान करणारे शिवप्रतिष्ठान हिंदुस्थान संस्थेचे प्रमुख संभाजी भिडे हे अटकपूर्व जामिनासाठी आज (सोमवारी) न्यायालयात धाव घेणार आहेत. त्यांच्या विरोधात अमरावती येथील राजापेठ पोलीस ठाण्यामध्ये गुन्हा दाखल करण्यात आला आहे.

अमरावतीमध्ये भिडे यांनी महात्मा गांधी यांच्या संदर्भात वादग्रस्त विधान केले असून त्यांच्या या विधानावरून राज्यातील वातावरण तापलं आहे. भिडेंच्या विधानामुळे शुक्रवारी (२८ जुलै) विधानसभेत विरोधी पक्षातील नेते आक्रमक झाल्याचे पाहायला मिळाले. माजी मुख्यमंत्री पृथ्वीराज चव्हाण यांनी संभाजी भिडे यांच्या अटकेची मागणी केली आहे.

महात्मा फुले, साईबाबा यांच्याबद्दलही वादग्रस्त विधान

महात्मा गांधी यांची बदनामी करणारे संभाजी भिडे यांनी महात्मा फुले आणि साईबाबा यांच्याबद्दलही वादग्रस्त विधान केल्याची ऑडिओ क्लिप सोशल मीडियावर व्हायरल झाली आहे. त्यांच्या भाषणाची दुसरी ऑडिओ क्लिप व्हायरल झाली आहे. महात्मा फुले यांचे समर्थकही भिडेंच्या विरोधात आक्रमक झाले आहेत. त्यांनी भिडेंचा निषेध केला.

देशद्रोहाचा गुन्हा दाखल करा

अमरावतीत गुन्हा दाखल झाल्यानंतर भिडे त्यांच्या अटकपूर्व जामीनासाठी आज (सोमवारी) त्यांच्या समर्थकांकडून जिल्हा व सत्र न्यायालयात अर्ज दाखल करण्यात येणार असल्याची माहिती आहे. काँग्रेस नेत्या, आमदार यशोमती ठाकूर या आज अमरावती जिल्हाधिकारी कार्यालयावर सकाळी अकरा वाजता धरणे आंदोलन करणार आहेत. संभाजी भिडे यांच्यावर देशद्रोहाचा गुन्हा दाखल करावा, अशी मागणी त्यांनी केली आहे.

भिडे हे अफजल खानाच्या वकिलाचे वंशज ?

यशोमती ठाकूर यांनी पुन्हा संभाजी भिडेंवर निशाणा साधला आहे. संभाजी भिडे हे अफजल खानाच्या वकिलाचे वंशज असल्याची प्रतिक्रिया ठाकूर यांनी दिली आहे. ठाकूर यांनी संभाजी भिडे यांच्याबाबत अपशब्द वापरला आहे. या पार्श्वभूमीवर भाजपाचे राज्यसभा खासदार अनिल बोंडे आणि शिवप्रतिष्ठानचे महानगरप्रमुख निषादसिंह जोध यांनी कार्यकर्त्यांसह कोतवाली पोलीस स्टेशनमध्ये यशोमती ठाकूर यांच्यावर गुन्हा दाखल करण्याची मागणी केली आहे.

Edited By : Mangesh Mahale