हाजीर हो! सोमय्यांना अडवणारे पोलिसच येणार अडचणीत

मुंबई : भाजपचे नेते किरीट सोमय्या (Kirit Somaiya) दररोज महाविकास आघाडीतील (MahaVikas Aghadi) कोणत्या ना कोणत्या नेत्याविरोधात आवाज उठवत आहेत. भ्रष्टाचाराच्या मुद्यावरून त्यांनी काही मंत्र्यांना अडचणीतही आणले आहे. आता त्यांच्या तक्रारीनंतर पोलिसही (Police) अडचणीत येणार आहे. कोल्हापूरला (Kolhapur) जाताना रोखलेल्या पोलिसांविरोधात सोमय्यांनी दंड थोपटले आहेत. संबंधित पोलिसांची चौकशी केली जाणार आहे.

ग्रामविकासमंत्री हसन मुश्रीफ (Hasan Mushrif) यांच्यावर सोमय्या यांनी गंभीर आरोप केले आहेत. त्यासाठी ते 20 सप्टेंबर रोजी कोल्हापूर येथे जाणार होते. पण त्यांना पोलिसांनी मुंबईतच रोखले. यादिवशी मुंबईत हायहोल्टेज ड्रामा पहायला मिळाला. मात्र, त्यानंतरही किरीट सोमय्या दुसऱ्यादिवशी पहाटे कोल्हापूरच्या सीमेवर जाऊन आले. पोलिसांनी शहर प्रवेश बंदीच्या आदेश दिल्यानंतर सोमय्या यांनी माघार घेतली होती.

पण या घटनेनंतर सोमय्या यांनी अडवणूक करणाऱ्या पोलिसांविरोधात राज्य पोलिस तक्रार प्राधिकरणाकडे तक्रार केली आहे. त्यावर झाललेल्या सुनावणीवेळी प्राधिकरणाने मुंबई पोलीस आयुक्त, आझाद मैदान विभागाचे सहाय्यक पोलीस आयुक्त व माता रमाबाई आंबेडकर मार्ग पोलीस ठाण्याचे वरिष्ठ पोलीस निरीक्षक यांना सुनावणीला हजर राहण्याची नोटीस बजावली आहे. त्यामुळे पोलिसांच्या अडचणींमध्ये वाढ झाली आहे.

प्राधिकरणाकडे या प्रकरणावर आता 19 जानेवारी रोजी सुनावणी होणार असल्याची माहिती सुत्रांनी दिली. प्राधिकरणाकडे तक्रार करण्यापूर्वी वरिष्ठ पर्यवेक्षकीय अधिकाऱ्यांकडे याप्रकरणी तक्रार करणे आवश्यक असते. त्यानंतर एक महिन्यानी कारवाई झाली नाही, तर प्राधिकरणाकडे तक्रार करता येते.

सोमय्या यांनी यापूर्वी कोणत्याही वरिष्ठ पोलीस अधिकाऱ्याकडे तक्रार केलेली नव्हती. या तांत्रिक बाबीमुळे त्यांचा अर्ज फेटाळण्यात आला होता. त्यानंतर सोमय्या यांनी उपायुक्त (परिमंडळ-१) कार्यालयात तक्रार केली होती. त्यावर कार्यवाही न झाल्याने त्यांनी प्राधिकरणाकडे पुन्हा धाव घेतली आहे. या तक्रारीची दखल घेत प्राधिकरणाने संबंधितांना नोटीस बजावली आहे.