Narendra Modi Photo : भाजपने निषेध केला उद्धव ठाकरेंचा; मात्र फोटो जाळला पंतप्रधान मोदींचा, ठाण्यात नेमके काय घडले?

Mumbai News : शिवसेना ठाकरे गटाच्या मुखपत्रातून उपमुख्यमंत्री देवेंद्र फडणवीसाचा बोचऱ्या शब्दात समाचार घेतला आहे. यावरून आक्रमक झालेल्या भाजप कार्यकर्त्यांनी शिवसेनेचे मुखपत्र असलेले वृत्तपत्र जाळून खासदार संजय राऊतांसह माजी मुख्यमंत्री उद्धव ठाकरेंचा निषेध केला. मात्र आंदोलनात जाळलेल्या मुखपत्रावर पंतप्रधान नरेंद्र मोदींचाही फोटो असल्याचे लक्षात येताच आंदोलनकर्ते भाजपचे पदाधिकारी गोंधळले. मोदींचा फोटो जाळल्याचे निदर्शनास आणून देत ठाकरे गटाचे नेते हे आंदोलन भाजपवरच उलटवण्याच्या प्रयत्नात आहेत. त्यामुळे या आंदोलनाच्या झळा आंदोलनकर्त्यांना भीती आहे. (Latest Political News)

उपमुख्यमंत्री देवेंद्र फडणवीस यांना शनिवारी ठाकरे गटाने आपल्या मुखपत्रातून टार्गेट केले. यामुळे भाजपच्या ठाणे शहरातील कार्यकर्त्यांनी या वृत्तपत्राची होळी केली. या वृत्तपत्रात १६ ऑगस्ट रोजी प्रकाशित झालेल्या अंकाचाही समावेश होता.

या अंकाच्या पहिल्या पानावर नरेंद्र मोदी यांचा फोटा आणि बातमी छापलेली होती. याकडे मात्र अतिउत्साही कार्यकर्त्याचे लक्षच गेले नाही. भावनेच्या भरात त्यांनी तो अंकही पेटवला. ही बाब लक्षात येताच भाजप पदाधिकाऱ्यांची मात्र भलतीच ताळांबळ उडाल्याचेही दिसून आले. ठाण्यातील या प्रकारामुळे भाजप आता काय निर्णय घेणार याकडे राजकीय वर्तुळाचे लक्ष लागले आहे.

मुखपत्राच्या आग्रलेखात उपमुख्यमंत्री फडणवीस यांच्या जोरदार टीका करण्यात आली होती. त्यामुळे भाजपचे पदाधिकारी आणि कार्यकर्ते अस्वस्थ झाले. या आग्रलेखाचा निषेध करण्यासाठी ठाणे शहरातील भाजप कार्यकर्त्यांनी शनिवारी सायंकाळी खोपट येथील चौकात मुखपत्राच्या अंकांची होळी केली.

होळी करण्यासाठी फक्त शनिवारी प्रकाशित झालेल्या अंकांसह काही जुन्या अंकही आणले. त्यामध्ये १६ ऑगस्टच्या अंकात स्वातंत्र्यदिनी लाल किल्ल्यावर झालेल्या ध्वजारोहण सोहळ्यातील पंतप्रधान नरेंद्र मोदींच्या फोटोसह बातमी होती. हा मोदींचा फोटो असलेला अंकही अतिउत्साही कार्यकर्त्यांनी यावेळी पेटवला. काही जणांच्या हा प्रकार निदर्शनास आल्यानंतर कार्यकर्त्यांची एकच पळापळ उडाल्याचे दिसून आले.

(Edited by Sunil Dhumal)