भाजप आमदार समाधान आवताडेंना धक्का; 'दामाजी'वर समविचारी गटाची सत्ता

पंढरपूर : मंगळवेढा तालुक्यातील श्री संत दामाजी सहकारी साखर कारखान्याच्या निवडणुकीत भाजपचे आमदार समाधान आवताडे यांना मोठा धक्का बसला आहे. आमदार समाधान आवताडेंसह त्यांच्या पॅनलचा दारूण पराभव झाला आहे. (Damaji Sugar Factory Election Results)

आमदार आवताडे यांच्या विरोधात आलेल्या समविचारी गटाने कारखान्यावर सत्ता मिळविली आहे‌. आमदार आवताडे गटाला २१ पैकी फक्त दोन जागांवर समाधान मानावे लागले आहे. अत्यंत चुरशीने झालेल्या या निवडणुकीत 24 हजार 521 मतदारांनी मतदानाचा हक्क बजावला होता. निकाल जाहीर होताच समविचारी आघाडीच्या कार्यकर्त्यांनी फटाक्यांची आतिषबाजी करत गुलालाची उधळण केली.

काल (गुरुवारी)सकाळी मतमोजणी सुरू झाली.सुरवातीपासूनच समविचाराचे उमेदवार आघाडीवर राहिले. रात्री उशिरा मतमोजणी संपली. त्यामध्ये कारखान्याचे विद्यमान अध्यक्ष आमदार समाधान आवताडे, उपाध्यक्ष अंबादास कुलकर्णी यांच्यासह जवळपास दहा संचालकांनाचा पराभव झाला आहे.

समविचारी गटातून तानाजी खरात, शिवानंद पाटील, भाजपाचे तालुकाध्यक्ष गौरीशंकर बुरकुल, शहराध्यक्ष गोपाळ भगरे, जिल्हा उपाध्यक्ष औदुंबर वाडदेकर, जिल्हा कार्यकारणी सदस्य गौडापा बिराजदार, तालुका सरचिटणीस दिगंबर भाकरे हे तर राष्ट्रवादीचे तालुकाध्यक्ष पी.बी. पाटील , भारत बेदरे , माजी सभापती निर्मला काकडे , लता कोळेकर , तर राजेद्र पाटील , महादेव लुगडे, माजी संचालक बसवराज पाटील , भिवा दौलतडे, मुरलीधर दत्तू , दयानंद सोनगे, रेवणसिद्ध लिगाडे, तानाजी कांबळे हे विजयी झाले.