कंबोज यांना इक्बालसिंग चहल यांनी सुनावले; आम्हाला त्यात ओढू नका...

मुंबई : शिवसेना (shivsena) नेते व मुंबई महापालिकेचे (Mumbai Municipal Corporation) माजी स्थायी समिती अध्यक्ष यशवंत जाधव (Yashwant Jadhav) यांच्या बेहिशेबी मालमत्तांच्या प्रकरणात पालिका आयुक्त इक्बालसिंग चहल (Iqbal Singh Chahal) यांच्यावरही भाजप (BJP) नेते मोहित कंबोज (Mohit Kamboj) यांनी आरोप केले होते. हे सर्व आरोप फेटाळून लावत चहल यांनी कंबोज यांना इशारा दिला आहे.

चहल म्हणाले, तुमची राजकीय लढाई तुम्हा राजकारणाच्या पातळीवर लढा, त्यामध्ये अधिकाऱ्यांना ओढू नका, असा इशारा त्यांनी दिला. यशवंत जाधव यांच्या निवासस्थानी प्राप्तीकर विभागाने छापे मारून ७२ तास शोधमोहीम राबवली होती. या चौकशीत जाधव यांनी मोठ्या प्रमाणावर भ्रष्टाचार करून २०० कोटींचा गैरव्यवहार केल्याचा आरोप करण्यात येत आहे.

पालिकेतील विकासकामांचे प्रस्ताव स्थायी समितीकडे येण्यापूर्वी त्याला आयुक्तांची मंजुरी लागते. त्यामुळे या भ्रष्टाचारात आयुक्तांचाही समावेश असल्याचा आरोप कंबोज यांनी सोशल मीडियावरुन केला होता. आयुक्तांनी भ्रष्टाचार करून परदेशात अमेरिकेत मालमत्ता गोळा केली असल्याचेही कंबोज म्हणाले होते. तसेच काळ्या यादीतील कंत्राटदारांना कोरोनाकाळात कामे दिल्याचे आरोपही कंबोज यांनी केले होते. आयुक्तांची अमेरिकेत कोट्यवधींची संपत्ती असल्याचा दावा करत येत्या आठवड्याभरात प्राप्तीकर विभागाकडे माहिती देणार असल्याचे मोहित कंबोज यांनी सांगितले होते. यशवंत जाधव यांच्याशीही चहल यांचे साटेलोटे असल्याचा खळबळजनक आरोप कंबोज यांनी केला होता.

हे सर्व आरोप आयुक्तांनी फेटाळून लावले. तसेच हे सर्व आरोप धादांत खोटे आणि बिनबुडाचे असल्याचे त्यांनी सांगितले. निष्कारण आपल्याला वादात ओढले जात असल्याचे त्यांनी म्हटले आहे. अमेरिकेत आपली कोणतीही मालमत्ता नाही, असेही त्यांनी स्पष्ट केले.