Sharad Pawar Vs Ajit Pawar : शरद पवारांनी सांगितली अजित पवार गटाची खोड; म्हणाले, "पांडुरंग म्हणायंच अन्..."

Maharashtra Political Crisis Live : राष्ट्रवादी काँग्रेसमध्ये बंड करूनही अजित पवार आणि त्यांच्या गटातील नेते शरद पवार यांना दैवत मानतात. कुणी ते आमच्या ह्रदयात असल्याचे सांगतात. तर कुणी शरद पवार आमच्यासाठी पांडुरंग मानतात. पण त्या विठ्ठलाला बडव्यांनी घेरल्याचा आरोपही ते करतात. यावर शरद पवारांनी अजित पवार गटात सहभागी नेत्यांवर सडकून टीका केली. (Latest Political News)

मुंबईतील वाय.बी. सेंटरवर उपस्थित पदाधिकारी, कार्यकर्त्यांना शरद पवार यांनी मार्गदर्शन केले. यावेळी ते बोलत होते. शरद पवार म्हणाले, "राष्ट्रवादी काँग्रेसमधून बाहेर पडल्यानंतर माझेच फोटो लावतात. मला पाडुरंग म्हणतात. दैवत मानतात. राज्यभरातून लोक पंढरपुरात येतात. हालअपेष्टा सहन करून पांडुरंगाचे दर्शन घेतात. मला पांडुरंग म्हणणारे मात्र देवळाबाहेरुच हात जोडून निघून जात होते. दर्शन घेतानाही तोंड दुसरीकडे करत होते. असे करुन ते आमच्याकडे दुर्लक्ष केल्याचा आरोप करतात. एकीकडे पांडुरंग म्हणायचे आणि सोडून जायचे."

छगन भुजबळ यांनी पवारांना पांडुरंग म्हटले होते. तर जयंत पाटील यांना बडवे म्हणत टीका केली होती. यावर पवारांनी छगन भुजबळ यांचाही समाचार घेतला. पवार म्हणाले, "पक्षात फूट पडत असल्याचे छगन भुजबळ यांना समजले. त्यांना मला सांगितले की तिकडे काय चालले आहे ते पाहून येतो. भुजबळ तिकडे गेले आणि त्यांनीच शपथ घेतली. अशा फुटीर वृत्तीवर बोलणे योग्य नाही. फुटीरांबाबत माझी काहीही तक्रार नाही."

वारंवार सांगितले तरी ते माझा फोटो वापरतात, असा टोलाही पवार यांनी अजित पवार यांना लगावला. शरद पवार म्हणाले, "ते मला पांडुरंग म्हणतात आणि माझ्यावर आरोपही करतात. आज त्यांच्या कार्यक्रमात माझा सर्वात मोठा फोटो होता. याबाबत त्यांना सांगितले होते की फोटो लावू नका. मात्र त्यांना माहीत आहे की माझ्या फोटोशिवाय त्यांचे नाणे चालणार नाही. आपले नाणे खणखणीत असले की दुसऱ्याचे फोटो लावायची वेळ येत नाही."

Edited by Sunil Dhumal