एकनाथजी, फक्त माझ्या कानात सांगितलं असतं तर..! अजितदादांनी आदित्य ठाकरेंनाही टाकलं पेचात

मुंबई : मागील तेरा दिवस महाराष्ट्राच्या राजकारणात घडलेल्या घडामोडींचे पडसाद रविवारी विधानसभेतही उमटले. नवनियुक्त अध्यक्ष राहुल नार्वेकर (Rahul Narwekar) यांची अध्यक्षपदी निवड झाल्यानंतर मुख्यमंत्री एकनाथ शिंदे यांनीच हा मुद्दा उपस्थित करून चर्चेला तोंड फोडलं. त्यानंतर माजी उपमुख्यमंत्री अजित पवार यांनीही आपल्या खास शैलीत शिंदे यांच्या बंडाचा समाचार घेतला. (Ajit Pawar Latest Marathi News)

आपल्या भाषणात बोलताना अजित पवारांनी महाविकास आघाडी सोडून भाजपसोबत गेलेल्या आमदारांवरही निशाणा साधला. एकनाथ शिंदे (Eknath Shinde) यांनी केलेल्या बंडावर बोलताना अजितदादा म्हणाले, एकनाथ शिंदे, आपण एकत्र काम केलं आहे. कसं घडलं, काय घडलं, हे मला माहिती नाही. पण तुम्ही फक्त माझ्या कानात सांगितलं असतं की, अजित जरा उद्धवजींना सांग आता अडीच वर्षे झालीत. तर मीच तुम्हाला तिथं बसवलं असतं, असं चिमचा अजितदादांनी काढला.

एवढ्यावर न थांबता अजितदादांनी आदित्य ठाकरेंकडे बघत 'आदित्य काय प्रॉब्लेम आला नसता ना', असा प्रश्न विचारला. 'काय प्रॉब्लेमचं आला नसता. काहीच अडचण नव्हती. आदित्य काय प्रॉब्लेम आला नसता ना. बरं जाऊ द्या, या विषयावर उद्या बोलूया. आज जास्त बोलत नाही. आजचा आनंदाचा दिवस आहे, असं म्हणत अजितदादांनी याविषयावर बोलणं थांबवलं.

जावयाने हट्ट पुरवण्याची वेळ

आजपर्यंत आम्ही जावई हट्ट पुरवत आलो आहे. आता जावयाने हट्ट पुरवण्याची वेळ आली आहे, असं म्हणत अजित पवारांनीही नार्वेकरांची फिरकी घेतली. उपमुख्यमंत्री देवेंद्र फडणवीस यांनीही विधान परिषदेचे सभापती रामराजे नाईक निंबाळकर आणि नार्वेकर यांच्यातील नात्याचा उल्लेख करून फिरकी घेतली होती.

अजितदादांकडून भाजप आमदारांना चिमटा

आम्हाला वेगळी अपेक्षा होती. आज कुणी काही म्हटलं तरी सगळ्यांच्या मनात धाकधुक आहे. आज भाजपच्या आमदारांनी सद्सद्विवेकबुध्दीला स्मरून विचारावे की, जे घडलं आहे ते योग्य घडलंय का. दादा तुम्ही बाकडं वाजवू नका, तुमचं मंत्रिपदचं येईल का नाही, सांगता येत नाही. आता शिवसेनेतून गेलेल्यांपैकी किती जणांना मंत्रिपदं मिळेल, हे सांगता येत नाही. पहिल्या रांगेत तर आमच्याकडचीच मंडळी आहेत, असं पवार म्हणाले. बबनराव पाचपुते, राधाकृष्ण विखे पाटील, उदय सामंत, दीपक केसरकर यांचा नावांचा उल्लेख अजित पवारांनी यावेळी केला.