NCP : रोहित पवारांनी 'तो' व्हिडिओ शेअर करीत भाजपवर केला हल्लाबोल

पुणे : महापुरामुळे उत्तरप्रदेशातील शेतकऱ्यांचे मोठ्या प्रमाणात नुकसान झाले आहे.यावरुन मुख्यमंत्री योगी आदित्यनाथ यांच्यावर विरोधकांनी निशाणा साधला आहे. शेतकऱ्यांच्या दयनीय अवस्थेवरुन मुख्यमंत्र्यांना विरोधकांनी धारेवर धरले आहे. विरोधकासोबतच भाजपच्या नेत्यांनीही भाजपला घरचा आहेर दिला आहे. (brijbhushan singh video)

उत्तरप्रदेशातील भाजपचे खासदार बृजभूषण सिंह यांचा एक व्हिडिओ सध्या समाज माध्यमांवर व्हायरल होत आहे. या व्हिडिओवरुन राष्ट्रवादी काँग्रेस पक्षाचे आमदार रोहित पवार (MLA Rohit Pawar) यांनी भाजपवर जोरदार हल्लाबोल केला आहे. रोहित पवार यांनी खासदार बृजभूषण सिंह यांचा हा व्हिडिओ टि्वट करीत भाजपवर टीका केली आहे.

रोहित पवार आपल्या टि्वटमध्ये म्हणतात, 'हातातोंडाशी आलेला घास परतीच्या पावसाने हिरावल्याने ऐन दिवाळीच्या तोंडावर बळीराजाचं दिवाळं निघालंय. त्याचे अश्रू पुसण्यासाठी आता राज्य सरकारने तातडीने पुढं यावं. UP तही अशीच स्थिती असून त्याचं वर्णन खुद्द भाजप खासदार पैलवान बृजभूषणसिंह यांच्याच तोंडून ऐका'

"मी माझ्या जीवनात महापुराच्या दरम्यान असा ढिसाळ कारभार पाहिला नाही," असे म्हणत अप्रत्यक्षपणे बृजभूषण सिंह यांनी योगी सरकारवर टीका केली आहे. "आम्ही रडू शकत नाही, भावना व्यक्त करु शकत नाही, राज्यातील जनता रामभरोसे आहे.महापुराच्या परिस्थितीची माहिती असूनही लोकप्रतिनिधी बोलू शकत नाही, त्यांना फक्त ऐकावे लागते," असे बृजभूषण सिंह यांनी आपल्या व्हिडिओमध्ये म्हटलं आहे.