ज्ञानेश्वर सिंह यांच्याविरोधात समीर वानखेडेंची राष्ट्रीय अनुसूचित जाती आयोगाकडे तक्रार

मुंबई : मुंबईतील प्रसिद्ध क्रूझ ड्रग प्रकरणातील अमली पदार्थ नियंत्रण विभागाचे (एनसीबी) माजी अधिकारी समीर वानखेडे यांनी एनसीबीचे उपसंचालक ज्ञानेश्वर सिंग, डीडीजी, एनसीबी यांच्याविरोधात राष्ट्रीय अनुसूचित जाती आयोगाकडे तक्रार केली आहे. क्रुझ ड्रग प्रकरण (आर्यन खान प्रकरण) नंतर ज्ञानेश्वर सिंह यांनी त्यांच्या आणि इतरांविरुद्ध दक्षता चौकशी केली. दक्षता चौकशीत, वरिष्ठ अधिकाऱ्यांसह एनसीबीच्या 7 ते 8 अधिका-यांवर अनेक प्रक्रियात्मक त्रुटी आणि दक्षतेच्या समस्या आढळून आल्या आहेत.

क्रुझ ड्रग्ज प्रकरणात समीर वानखेडे आणि एनसीबीच्या इतर आधिकाऱ्यांविरोधात झालेल्या आरोपांबाबत ज्ञानेश्वर सिंह यांनी चौकशी केली होती. १७ ऑक्टोबरला समीर वानखेडे यांनी राष्ट्रीय अनुसूचित जाती आयोगाकडे तक्रार केली होती. त्यानंतर आयोगाने या प्रकरणाची चौकशी करण्याचा निर्णय घेतला आहे. तसेच वानखेडे यांनी आयोगाच्या अध्यक्षांचीही भेट घेतली असून त्यांच्याशी या प्रकरणाबाबत चर्चा केल्याची माहिती आहे.

या प्रकरणात याचिकाकर्त्यांशी (वानखेडे आणि इतर अधिकाऱ्यांशी) भेदभाव आणि छळ होत असल्याचे निरीक्षण आयोगाने नोंदवले आहे, त्यामुळे प्रकरण प्रलंबित असेपर्यंत पुढील कारवाई करू नये, अशी सूचना आयोगाने दिलेल्या आदेशात नमूद करण्यात आली आहे. त्यावर एनसीबीच्या विशेष चौकशी पथकाने सादर केलेली मूळ कागदपत्रेही सादर करावीत. तसेच, नोटीस मिळाल्यापासून पंधरा दिवसांच्या आत या प्रकरणाची संपूर्ण वस्तुस्थिती सादर करण्याचे आदेश दिले आहेत. तसेच उत्तर न दिल्यास आयोग दिवाणी न्यायालयांच्या अधिकारांतर्गत वापर करेल, अशी सूचनाही देण्यात आली आहे.

आर्यन खान प्रकरणातील साक्षीदार प्रभाकर साईल यांनी दिलेल्या प्रतिज्ञापत्राद्वारे एनसीबीने केलेल्या तपासाबाबत गंभीर आरोप केले होते. या आरोपांच्या तपासणीसाठी एनसीबीचे उपमहासंचालक ज्ञानेश्वर सिंग यांच्या मार्गदर्शनाखाली एका विशेष पथकाची स्थापना करण्यात आली होती. या पथकाने त्याचा अहवाल एनसीबी महासंचालक कार्यालयाला सोपवला होता. या अहवालानुसार एनसीबीच्या सात ते आठ अधिकाऱ्यांनी विभागीय व दक्षता पातळीवर काही चुका केल्याचे आढळून आले होते.