Shishir Shinde News: कट्टर शिवसैनिक, राज ठाकरेंचे निकटवर्तीय ; कोण आहेत शिशिर शिंदे..

Mumbai News: शिवसेना वर्धापनदिनाच्या पूर्वसंध्येला ठाकरे गटाचे उपनेता शिशिर शिंदे यांनी ठाकरे गटाला सोडचिठ्ठी दिली आहे. एकेकाळी महाराष्ट्र नवनिर्माण सेनेचे अध्यक्ष राज ठाकरे यांचे निकटवर्तीय म्हणून शिशिर शिंदे ओळखले जायचे. त्या शिशिर शिंदेंचा राजकीय प्रवास जाणून घेऊया...

उद्धव ठाकरे भेटीसाठी वेळ देत नसल्याचंही शिशिर शिेंदे यांनी आपल्या राजीनाम्यात म्हटलं आहे. आयुष्यातली चार वर्षे वाया गेली असे त्यांनी या पत्रात म्हटलं आहे. शिवसेना उद्धव बाळासाहेब ठाकरे गटाचे राज्यव्यापी शिबीर मुंबईत रविवारी झाले. त्यापूर्वीच शिशिर शिंदे यांनी मातोश्रीवर जाऊन उद्धव ठाकरे यांच्याकडे राजानामा सुपूर्त केला.

मूळचे कट्टर शिवसैनिक म्हणून शिशिर शिंदे यांची ओळख होती. 2005 मध्ये राज ठाकरे यांनी शिवसेना सोडून नवीन पक्ष स्थापन करण्याचा निर्णय घेतला तेव्हा राज ठाकरे यांच्यासोबत शिवसेनेतून काही नेते बाहेर पडले. यात शिशिर शिंदे हेही होते.

मनसेची स्थापना झाल्यानंतर 2009 मध्ये शिशिर शिंदे भांडुप विधानसभा मतदारसंघातून आमदार म्हणून निवडून आले होते. शिशिर शिंदे हे तेरा वर्ष मनसेमध्ये सक्रिय होते. २०१४ मधील विधानसभा निवडणुकीत त्यांचा पराभव झाला होता. २०१८ मध्ये त्यांनी राज ठाकरेंची साथ सोडली. मनसेत बराच काळ राहिल्यानंतर त्यांनी पक्षांतराचा निर्णय घेतला.

शिशिर शिंदे यांची 19 जून 2018 मध्येशिवसेनेत घरवापसी झाली. त्यानंतर बराच काळ सक्रिय नव्हते. 2022 पर्यंत त्यांच्यावर पक्षाने कोणतीही जबाबदारी दिली नाही. एकनाथ शिंदेंसह 40 आमदारांनी केलेल्या बंडखोरीनंतर म्हणजे जून 2022 मध्ये त्यांचं शिवसेनेत पुनर्वसन करण्यात आलं. ठाकरे गटाकडून त्यांना उपनेता करण्यात आले होते.

1991 मध्ये पाकिस्तानसोबत क्रिकेट सामने खेळवण्यास शिवसेनेने विरोध केला होता.त्यावेळी शिशिर शिंदे आणि इतर काही शिवसैनिकांनी मुंबईतील वानखेडे स्टेडियमवरील खेळपट्टीच खोदली होती.

(Edited By : Mangesh Mahale)