धनुष्यबाण शिंदे गटाकडे गेल्यास शिवसैनिक रस्त्यावर उतरेल...युवासेनेचा इशारा

Shivsena : मुख्यमंत्री एकनाथ शिंदे (Eknath Shinde) यांनी बंड केल्यापासून शिवसेना (Shivsena) आणि बंडखोरी केलेल्या शिंदे गटाची लढाई आता कायदेशीर झाली असून याबाबतची सुनावणी न्यायालयात प्रलंबित असून पक्ष चिन्ह कुणाच हे ठरवण्याचा अधिकार हा निवडणूक आयोगाला सुप्रीम कोर्टाने देत शिंदे गटाला दिलासा दिला आहे.

यामुळे आयोगाने धनुष्यबाण हे पक्षचिन्ह जर शिंदे गटाला दिले, तर शिवसैनिक रस्त्यावर उतरेल यामुळे कायदा सुव्यवस्थेचा प्रश्न निर्माण होऊ शकेल,असा गंभीर इशारा युवासेनेकडून युवासेनेचे राज्य विस्तारक शरद कोळी यांनी दिला आहे. (Sharad Koli Latest News )

कोळी यांनी शिवसेनेत प्रवेश केल्यापासूनच ते सातत्याने शिंदे गटावर टीका करत आहेत. दरम्यान निवडणूक आयोग शिंदे गटाला धनुष्यबाण चिन्ह देईल, असा गौप्यस्फोट शिंदे गटाचे नेते आणि मंत्री अब्दुल सत्तार यांनी केल्यावर राज्यत एकच खळबळ उडाली आहे. यानंतर कोळी आक्रमक झाले असून, असे झाल्यास शिवसैनिक रस्त्यावर उतरेल. दंगलही होऊ शकेल त्यामुळे राज्यभरात कायदा व सुव्यवस्थेचा प्रश्न निर्माण होईल, असा इशारा त्यांच्याकडून देण्यात आला आहे.

कोळी यांनी मंत्री सत्तारांवर जोरदार टीका केली ते म्हणाले की, सत्तार म्हणजे उतावळा नवरा, गुडघ्याला बाशिंग आहेत. शिवसेनाचे धनुष्यबाण चिन्ह देण्याची जबाबदारी ही सुप्रीम कोर्टाने निवडणूक आयोगावर टाकली आहे. मात्र आयोगाने जर पक्षपातीपणा करत निर्णय दिला अथवा शिंदे गट आणि निवडणूक आयोगांनी '५० खोके एकदम ओके' कार्यक्रम केला, तर शिवसैनिक रस्त्यावर उतरतील, असा इशाराही त्यांनी दिला आहे.

दरम्यान, मंत्री तानाजी सावंतांच्या विधानावरही कोळींनी त्यांना सडेतोड उत्तर दिले होते. आता त्यांनी पुन्हा शिंदे गटाला आव्हान दिले आहे. यावर शिंदे गटाची काय प्रतिक्रिया येते हे बघावे लागणार आहे.