Eknath Shinde Live Update : ठाकरे आणि शिवसेना नाव न वापरता लोकांमध्ये जाऊन दाखवा: उद्धव ठाकरे

एकनाथ शिंदे काही वेळापूर्वी ते दिल्लीला रवाना झाल्याची माहिती पुढे आली आहे. दिल्लीला जाऊन ते भाजप पक्ष श्रेष्ठींशी सत्तास्थापनेबाबत चर्चा करण्याची शक्यता वर्तवण्यात येत आहे.

सेना चालवायला लायक नसेल तर बाळासाहेबांचा फोटो काढून टाका. मी बाळासासहेबांचा मुलगा आहे हे विसरून जा. मी वर्षा बंगला सोडला म्हणजे जिद्द सोडली असं नाही. पण ज्यांना आपण मोठं केलं त्यांची स्वप्न मोठी झाली ती मी पुर्ण करु शकलो नाही. वर्षा की मातोश्री असं झोपेतही विचारलं तरी माझं उत्तर मातोश्री असंच असेल. असंही मुख्यमंत्री उद्धव ठाकरे यांनी म्हटलं.

''मी मुख्यमंत्री पदासाठी योग्य नसेल तर सांगा मी पद सोडायला तयार आहे. एकनाथ शिंदेंसाठी मी काय कमी केलं, त्यांना नगरविकास खातं दिलं. अनेकदा एकनाथ शिंदेंना त्यांच्या नाराजीबाबत विचारलं, संजय राठोड यांच्यावर वाईट आरोप होऊनही त्यांना सांभाळून घेतलं. पण आता ठाकरे आणि शिवसेना नाव न वापरता लोकांमध्ये जाऊन दाखवा.हे सर्व भाजपने केलं आहे, आता त्यांची आग्र्याहून सुटका करावी लागेल.'' अशी भूमिका मुख्यमंत्री उद्धव ठाकरे यांनी घेतली.

आज मुख्यमंत्री उद्धव ठाकरेंच्या अध्यक्षतेखाली जिल्हा प्रमुखांची बैठक झाली. या बैठकीत त्यांनी बंडखोर आमदारांवर निशाणा साधला. " कुटूंबप्रमुखाला धोका देता याचं वाईट वाटलं.पण आता शिवसेनेचा पहिला नारळ फुटला अशी परिस्थिती आहे, असं समजा.पण आता मी बाळासाहेब ठाकरेंचा मुलगा आहे हे विसरून जा आणि शिवसेना पुढे न्या.शिवसेनेची मुळं माझ्यासोबत जे गेले ते कधीच माझे नव्हते.''

शिवसेनेकडून बंडखोर गटातील आणखी पाच आमदारांवर अपात्रतेची कारवाई करण्याची मागणी विधानसभेेचे उपाध्यक्ष नरहरी झिरवळ यांच्याकडे केली आहे. सदा सरवणकर, प्रकाश आबिटकर, संजय रायमुळकर, बालाजी किणीकर, रमेश बोरनारे यांची नावं अपात्र करण्यासाठी देण्यात आली आहेत. याआधी शिवसेनेने एकनाथ शिंदे यांच्यासह बारा आमदारांवर कारवाई करण्याची मागणी झिरवळ यांच्याकडे केली होती.

गुवाहाटीत असलेल्या शिंदे गटाकडून आजच मोठं पाऊल उचललं जाण्याची शक्यता व्यक्त केली जात आहे. गटाकडून राज्यपाल भगतसिंह कोश्यारी आणि विधानसभा उपाध्यक्ष नरहरी झिरवळ यांना पत्र पाठवणार असल्याचे समजते. यामध्ये त्यांच्याकडून आपल्या गटाला मान्यता देण्याची मागणी केली जाऊ शकते. शिंदे यांच्याकडे 40 हून अधिक आमदार आहेत. त्यामुळे त्यांचाच गट शिवसेनेचा अधिकृत असल्याचा दावा केला जाणार आहे. तसं झाल्यास राज्यपाल आणि उपाध्यक्ष काय निर्णय घेणार, कोणते कायदेशीर पेच निर्माण होणार, याबाबत उत्सुकता वाढली आहे.

बंडखोर आमदारांचा ठिय्या असलेल्या गुवाहाटीतील रेडिसन हॉटेलमधून एकनाथ शिंदे काही वेळापूर्वीच बाहेर पडल्याचे समजते. ते विमानतळाकडे रवाना झाले असून मुंबईकडे निघणार असल्याचे समजते. मात्र, अद्याप याबाबत अधिकृत माहिती समोर आलेली नाही. शिंदे यांच्या गटातील इतर आमदार मात्र हॉटेलमध्येच आहेत.

शिवसेनेचे बंडखोर नेते एकनाथ शिंदे यांना मोठा धक्का बसला आहे. विधानसभेचे प्रभारी अध्यक्ष नरहरी झिरवळ यांनी शिवसेना विधीमंडळ गटनेता पदावर अजय चौधरी तर प्रतोद पदावर सुनिल प्रभू यांनाच मान्यता दिली आहे. तर शिंदे यांनी केलेला आपण गटनेता असल्याचा आणि अजय गोगावले यांची प्रतोदपदी नियुक्ती केल्याचा दावा त्यांनी फेटाळून लावल्याचे समजते. त्यामुळे आता यावर शिंदे गट काय भूमिका घेणार, याबाबत उत्सुकता वाढली आहे. झिरवळ यांच्या निर्णयाला न्यायालयात आव्हान दिले जाऊ शकते. झिरवळ यांनी माध्यमांशी बोलताना शिंदे गटाने केलेला ठराव संशयास्पद असल्याची भूमिका मांडली होती. त्यानंतर त्यांनी चौधरी आणि पभू यांच्या नियुक्तीला मान्यता दिली आहे.

मुख्यमंत्री उद्धव ठाकरे यांचे मुंबईतील कट्टर समर्थक आमदार दिलीप लांडे हेही गुवाहाटीत दाखल झाले आहेत. त्यामुळे आता शिवसेनेचे मुंबईतील कट्टर शिलेदारही एकनाथ शिंदे यांच्या गटात जाऊ लागले आहेत. दोन दिवसांपूर्वी सदा सरवणकर आणि मंगेश कुडाळकर हे दोघे शिंदे यांच्या गटात सामील झाले आहेत. दिलीप लांडे हे काल रात्रीपर्यंत ठाकरे मुंबईतच असल्याचे सांगितले जात होते. लांडे हेही शिंदे यांच्या गटात सामील होणार असल्याने त्यांच्या ताकद आणखी वाढली आहे. शिंदे यांच्याकडील एकूण आमदारांचा आकडा आता जवळपास पन्नासवर पोहचला आहे.